پاپيرۋس ەجەلگى گەركۋلانۋم قالاسىنان تابىلعان. اتالعان ەجەلگى ريم قالاسى پومپەيگە وتە جاقىن ورنالاسقان. ءبىزدىڭ زامانىمىزدىڭ 79 جىلى بولعان ۆەزۋۆي جانارتاۋىنىڭ اتقىلاۋىنان شاھاردى تولىق ءورت شالعان. ال پاپيرۋستىڭ ك ۇلى عانا ارنايى قۇتىدا ساقتالىپ قالعان.
عالىمدار ونداعى ءماتىندى جاساندى ينتەللەكت كومەگىمەن وقىدى. ولار كۇيگەن پاپيرۋستارعا جۇزدەگەن ينفراقىزىل ساۋلە ءتۇسىرىپ, پروەكتسياسىن قاعازعا بەدەرلەدى. وسى ارقىلى عالىمدار پاپيرۋستىڭ الدىڭعى بەتىن عانا ەمەس, ارتقى بەتىن دا وقۋعا مۇمكىندىك الدى. زەرتتەۋ ناتيجەسىندە ماتىننەن مىڭ ءسوز انىقتالعان ەكەن. بۇل بۇكىل ءماتىننىڭ شامامەن 30 پايىزىن قۇرايدى.
ۇزىندىدە نەگىزىنەن گادارالىق فيلوسوف فيلودەمنىڭ اكادەمياسى تۋرالى ايتىلادى. فراگمەنتتە بۇرىن بەلگىسىز تاعى ءبىر اقپارات بار. مىسالى, وندا پلاتوننىڭ ءبىزدىڭ داۋىرىمىزگە دەيىنگى IV عاسىردا قۇرعان اكادەمياسى تۋرالى ماعلۇمات بار. سونداي-اق فيلوسوفتىڭ افيناداعى, مۋسەيون نەمەسە «مۋزالار حرامى» ماڭىنداعى اكادەميانىڭ ارنايى باعىندا جەرلەنگەنى حاقىندا جازىلعان.
بۇل جاساندى ينتەللەكت كومەگىمەن قۇپياسى اشىلعان العاشقى پاپيرۋس ەمەس. بۇعان دەيىن ءبىر توپ باعدارلاماشى ستۋدەنتتەر – گەرمانيالىق يۋسيف نادير, امەريكالىق ليۋك فارريتور جانە شۆەيتساريالىق دجۋليان شيللينگەر كۇيگەن پاپيرۋستان 2000 بەلگىنى انىقتاي الدى.
