رەسپۋبليكالىق ۆولونتەرلەر شتابىنىڭ الاڭىندا جاستار ۇيىمدارىنىڭ جەتەكشىلەرى باس قوستى. جيىندا «Amanat»-تىڭ اتقارۋشى حاتشىسى داۋلەت كارىبەك پارتيانىڭ ەل اۋماعىنداعى فيليالدارى جانىنان گۋمانيتارلىق كومەك قابىلداۋ پۋنكتتەرى اشىلىپ, بەلسەندى جۇمىس ىستەپ جاتقانىن اتاپ ءوتتى.
– مەملەكەت باسشىسى ق.توقاەۆ ءار ازاماتتىڭ شىنايى وتانشىلدىعى ناقتى ءىس جۇزىندە بايقالىپ جاتقانىن ايتقان ەدى. پرەزيدەنتتىڭ ۇندەۋىمەن, ەلىمىزدىڭ تۇكپىر-تۇكپىرىندەگى ۆولونتەرلەر سۋ باسقان قالالار مەن اۋىلدارعا اتتاندى. ويتكەنى ەرىكتىلەردە وزگەنىڭ قايعىسى دەگەن ۇعىم جوق. ولار گۋمانيتارلىق كومەك جەتكىزىپ, جاعالاۋلاردى نىعايتىپ, بوگەت تۇرعىزىپ, قۇتقارۋشىلارعا اس-اۋقات ۇيىمداستىرىپ جاتىر. بۇگىندە ۆولونتەرلەر قوزعالىسى قۋاتتى قوعامدىق كۇشكە اينالدى. ءبىر ايعا جەتەر-جەتپەس ۋاقىتتا 4 مىڭ تونناعا جۋىق ازىق-ت ۇلىك, كيىم-كەشەك, گيگيەنالىق كەرەك-جاراقتار, قۇرىلىس ماتەريالدارى جانە وزگە دە قاجەتتى زاتتار جينالدى. ال اتىراۋدا پارتيانىڭ باستاماسىمەن ۇزىندىعى 22 شاقىرىمدى قۇرايتىن بوگەت قۇرىلىسى اياقتالىپ كەلەدى. وعان 1,3 مىڭ جۇمىسشى, 120 تەحنيكا جۇمىلدىرىلدى. بوگەتتى 6 مەترگە دەيىن بيىكتەتۋ جۇمىسى باستالدى, – دەدى ول.
7 ساۋىردە مەملەكەتتىك كەڭەسشى ەرلان قاريننىڭ باستاماسىمەن سۋ تاسقىنىنا قارسى كۇرەس جۇمىسى اياسىندا رەسپۋبليكالىق ۆولونتەرلەر شتابى قۇرىلعان ەدى. وعان ەلىمىزدەگى ءىرى رەسپۋبليكالىق جاستار ۇيىمدارى مەن قوعامدىق قورلار قوسىلدى. بۇل جۇمىستى «Amanat» پارتياسىنىڭ «جاستار رۋحى» جاستار قاناتى ۇيلەستىرىپ جاتىر.
– ۇيىمداردىڭ 50 مىڭعا جۋىق مۇشەسى مەن ۆولونتەرى زارداپ شەككەن تۇرعىندارعا كومەك قولىن سوزىپ وتىر. قۇتقارۋشىلارمەن تەڭ دارەجەدە كومەك كورسەتىپ, العى شەپتە جۇرگەن جاستار سانى كۇن ساناپ ارتىپ كەلەدى. جەرگىلىكتى ورگاندار مەن ۆولونتەرلەر بىرلەسە جۇمىس ىستەيدى. باستى مىندەت – زارداپ شەككەن بارلىق ادامعا بارىنشا جەدەل كومەك كورسەتۋ, – دەدى «جاستار رۋحى» جاستار قاناتىنىڭ توراعاسى اقەركە يسكاندەروۆا.
ءوز كەزەگىندە زاڭگەر اقەركە كۇنعازىقىزى زارداپ شەككەن ادامداردىڭ جوعالعان قۇجاتتارىن راسىمدەۋگە جانە ولاردىڭ وتەماقى الۋ ءۇشىن ءوتىنىش بەرۋىنە كومەك كورسەتۋدى ۇسىندى. ايتا كەتەيىك, ءدال وسى ماقساتتا پارتيانىڭ «قۇقىقتىق كومەك» جوباسى جالعاسىپ جاتىر. «Amanat»-تىڭ وڭىرلىك قوعامدىق قابىلداۋ بولمەلەرى سولتۇستىك قازاقستان جانە قوستاناي وبلىستارىنداعى ەۆاكۋاتسيالاۋ پۋنكتتەرىندە 10 رەت كوشپەلى قابىلداۋ وتكىزدى. يگى ءىس اياسىندا 1 160 ادام كونسۋلتاتيۆتىك-قۇقىقتىق كومەك الدى.
وسى ورايدا «قازاقستان جاستار كونگرەسىنىڭ» اتقارۋشى ديرەكتورى باقداۋلەت جاندىلداەۆ توتەنشە جاعداي كەزىندەگى ۆولونتەرلەر مەن جەرگىلىكتى اتقارۋشى ورگانداردىڭ ءوزارا ءىس-قيمىل الگوريتمىن ازىرلەۋ تۋرالى باستاما كوتەردى. ال قازاقستان ستۋدەنتتەرى اليانسىنىڭ توراعاسى ۇلان ناۋكەن ستۋدەنتتىك قوعامداستىق اتىراۋ قالاسىنىڭ ماڭىنداعى جاعالاۋدى نىعايتۋ جۇمىسىنا بەلسەندى اتسالىسىپ جاتقانىن ءمالىم ەتتى. بەلسەندى تابيعي اپات اياقتالعاننان كەيىن ۆولونتەرلەردى قۇم سالىنعان قاپتاردان تۇرعىزىلعان ۋاقىتشا بوگەتتەردى الىپ تاستاۋ جۇمىسىنا دا جۇمىلدىرۋ قاجەت.
باسقوسۋعا «مەديتسينا جاستارىنىڭ» توراعاسى ابىلايحان ءابدىراش, «اسسامبلەيا جاستارىنىڭ» توراعاسى تيمۋر جۇمىرباەۆ, ۇلتتىق ۆولونتەرلىك جەلى باسشىسىنىڭ ورىنباسارى ايبەك دوسىمبەتوۆ, «Dauletten qory» قايىرىمدىلىق قورىنىڭ ديرەكتورى جاسۇلان قۋاندىق, «اۋىل» حدپپ «اۋىل جاستارى» جاستار قاناتىنىڭ توراعاسى داۋرەن راحىمبەك, قركف جانىنداعى «كەلەشەك» رەسپۋبليكالىق جاستار كەڭەسىنىڭ توراعاسى ايان سالىمگەرەەۆ, «Biz Birgemiz» قورىنىڭ توراعاسى پەريزات قايرات قاتىستى.
