وتكەن جىلى ءوڭىر باسشىسى نۇرلان نوعاەۆ, «سامۇرىق-قازىنا» ۇاق» اق توراعاسى نۇرلان جاقىپوۆ, «قازمۇنايگاز» ۇك» اق توراعاسى ماعزۇم مىرزاعاليەۆتىڭ قولداۋىمەن ساتىپ الۋدى جۇزەگە اسىرۋ تارتىبىنە تولىقتىرۋلار ەنگىزىلگەن بولاتىن. تولىقتىرۋعا سايكەس, «ومگ» اق جاڭاوزەن قالاسى اۋماعىندا ءوندىرىس ورنىن اشىپ, جەرگىلىكتى تۇرعىنداردى تۇراقتى جۇمىسپەن قامتۋدى ءوز مىندەتىنە العان ينۆەستورمەن ءبىر كوزدەن ۇزاق مەرزىمگە كەلىسىمشارت جاساۋعا ءتيىس.
وسىعان وراي, «قازمۇنايگاز» باسقارماسىنىڭ شەشىمىمەن ينۆەستوردى ىرىكتەۋ رەگلامەنتى بەكىتىلىپ, ونىڭ نەگىزىندە «وزەنمۇنايگاز» اق, «قازمۇنايگاز» ۇك» اق, ماڭعىستاۋ وبلىسى اكىمدىگى, «اتامەكەن» وڭىرلىك كاسىپكەرلەر پالاتاسى وكىلدەرىنەن قۇرالعان جۇمىس توبى قۇرىلدى. الدىن الا جاريالانعان حابارلاندىرۋعا سايكەس, ينۆەستورلاردان كەلىپ تۇسكەن وتىنىمدەردى ءتيىستى جۇمىس توبى قاراپ, ناتيجەسىندە, جاڭاوزەن قالاسىنىڭ اۋماعىندا جاڭا ءوندىرىس وشاعىن سالاتىن ينۆەستور انىقتالدى.
اتالعان زاۋىتتا 16 ءتۇرلى تاۋار وندىرىلمەك. قاجەتتى تاۋارلاردىڭ تىزبەسى «ومگ» اق-نىڭ 2025-2028 جىلدارعا ارناپ بەكىتىلگەن بيزنەس-جوسپارى نەگىزىندە جاساقتالدى. الداعى ۋاقىتتا بوي كوتەرەتىن زاۋىتتىڭ قۇرىلىسى مەن قىزمەت ەتۋ كەزەڭىندە جاڭاوزەندىكتەر ءۇشىن 250-دەن استام جاڭا جۇمىس ورنى اشىلادى دەپ جوسپارلانىپ وتىر.
«جاڭا ءوندىرىس ورىندارىنىڭ اشىلۋى كومپانيامىزدىڭ يمپورتقا تاۋەلدىلىكتەن ارىلۋىنا, قالانىڭ دامۋىنا, ءوڭىر ەكونوميكاسىنىڭ وركەندەۋىنە, جەرگىلىكتى جانە رەسپۋبليكالىق بيۋدجەتكە تۇسەتىن سالىق تۇسىمدەرىنىڭ ۇلعايۋىنا ىقپال ەتپەك. جاڭاوزەن مۇنايلى قالادان وندىرىستىك قالاعا اينالاتىن ءسات تە كەلدى. ءبىز مۇندا جەرگىلىكتى جاستارعا جۇمىس ۇسىناتىن ينۆەستورلاردى تارتۋ ءىسىن جالعاستىرا بەرەمىز. وتاندىق كاسىپكەرلەردى جاڭاوزەنگە ينۆەستيتسيا قۇيۋعا شاقىرامىز», دەدى «وزەنمۇنايگاز» اق باس ديرەكتورى نۇرداۋلەت قيلىباي.
جاڭا زاۋىت جاڭاوزەن قالاسىندا جاڭا جۇمىس ورىندارىن اشۋعا جانە مۇناي سالاسىنا قاجەتتى جابدىقتاردى باعاسىن اسپانداتىپ الىستان تاسىمالداۋدى ازايتۋعا مۇمكىندىك بەرەدى.
ماڭعىستاۋ وبلىسى
