بەردەنبەك ەدىلحان – جايرەمنىڭ تۋماسى. ول 2012 جىلدان بەرى جەكە كاسىپپەن اينالاسادى. كاسىبىنىڭ باعىتى ءار الۋان. جۇك تاسىمالى دا, مال شارۋاشىلىعى دا بار. «ەڭبەك ەتكەنگە ءناسىپ مول» دەيدى ول. ون شاقتى جىلدىڭ اياسىندا كاسىبىن دوڭگەلەتە بىلگەن بەردەنبەك وسىدان ءۇش جىل بۇرىن كەنتتەگى بۇرىنعى «بالاباقشانى» ساتىپ الدى. بۇل جەردە بالاباقشا ءسوزىن تىرناقشالاپ وتىرعانىمىز بەكەر ەمەس, ويتكەنى, 90-جىلداردىڭ جويقىن جەكەشەلەندىرۋى تۇسىندا جەكەنىڭ قولىنا ءوتىپ, سودان ابدەن توزعان نىساننىڭ قاڭقاسى عانا قالعان ەدى. كاسىپكەر سوندا نە ءۇشىن قىزىقتى ەكەن؟
– بۇرىنعى بالاباقشا ورنىنا جاڭاسىن ورناتقىم كەلدى. ءسويتىپ, سوعان دەيىنگى جيعان-تەرگەنىمدى جۇمساپ, قۇرىلىس جۇمىسىن باستاپ جىبەردىم. «كوز – قورقاق, قول – باتىر» دەگەن ەمەس پە؟ نىساننىڭ ءبىر باسىنا شاعىن-ماركەت ورنالاستى. 2023 جىلى كەنتىمىزگە وبلىس باسشىسى كەلگەندە ءوزىمنىڭ بالاباقشا تۋرالى ويىمدى ايتىپ ەدىم, ول كىسى تولىق قولداۋ تانىتتى, – دەيدى ب.ەدىلحان.
ول بالاباقشا اتاۋىن «اجار» دەپ اتادى. بۇل سوزدە كوپ ماعىنا بار. ەڭ باستىسى, «اجارىمىز اشىق بولسىن» دەگەن ماقسات-مۇرات جاتىر اتاۋدىڭ استارىندا.
بالاباقشا 125 ورىنعا ارنالعان. 20 مامان جۇمىسپەن قامتىلعان مۇندا 2-5 جاس ارالىعىنداعى بالدىرعاندار تاربيەلەنەدى. عيمارات بالالاردىڭ جان-جاقتى دامۋىنا مۇمكىندىك بەرەتىن زاماناۋي دامۋ ايماقتارىمەن, STEM كابينەتىمەن, حورەوگرافيا زالى جانە ەمدىك تۇزدى بولمەمەن جابدىقتالعان.
«اجاردىڭ» تاعى ءبىر ەرەكشەلىگى, مۇنداعى ءار توپتىڭ ءوز اتاۋى بار. ايتالىق, «الاش», «اباي», «ىبىراي», «قانىش» دەگەن ءتارىزدى.
– ماعان مۇنداي اقىل -كەڭەس بەرگەن قازاقستان حالقى اسسامبلەياسى انالار كەڭەسى توراعاسىنىڭ ورىنباسارى بايان اقاتاي. ۇلتتىق قۇندىلىقتاردى بالالاردىڭ بويىنا جاستايىنان سىڭىرە ءبىلۋ – باستى ماقسات. ەندەشە, توپ اتاۋلارىن ۇلتتىڭ ۇلى تۇلعالارىنىڭ ەسىمدەرىمەن اتاپ, ولاردىڭ ونەگەلى ءومىر جولىن بالالارعا نەعۇرلىم كەڭىرەك تۇسىندىرە بەرەتىن بولساق, ۇتارىمىز بولماسا ۇتىلىسىمىز بولا قويماس, – دەگەن بەردەنبەكتىڭ ءسوزى ونىڭ بالا تاربيەسىندەگى جان-جاقتى ىزدەنىسىن كورسەتەدى.
مەملەكەت ارقاشان كاسىپكەرلىكتىڭ دامۋىنا, كەڭ قانات جايۋىنا مۇددەلىلىك تانىتىپ كەلەدى. بۇل بەكەردەن-بەكەر ەمەس. ويتكەنى شاعىن جانە ورتا كاسىپكەرلىك دامىعان سايىن ەلىمىزدەگى كەز كەلگەن سالا دامي تۇسەدى. بەردەنبەكتىڭ بالاباقشاسى سونىڭ ءبىر ايعاعى ءتارىزدى.
ۇلىتاۋ وبلىسى,
جايرەم كەنتى
