بيىل باستالعان اعاش ەگۋ جۇمىسى اياسىندا قارااعاش شارۋاشىلىعىندا 1,7 ميليون ءتۇپ اعاش وتىرعىزۋ كوزدەلىپ وتىر.
جالپى وبلىس تۇرعىندارى «تازا قازاقستان» رەسپۋبليكالىق ەكولوگيالىق اكتسياسىنىڭ «جاسىل ايماق» اپتالىعىنا بەلسەندى قاتىسۋدا. وبلىستىڭ قالا, اۋداندارىندا ەڭبەك ۇجىمدارى, قوعامدىق ۇيىمدار مەن ءدىني بىرلەستىكتەر وكىلدەرى جاپپاي اعاش وتىرعىزۋدا. 24 ساۋىردە اكتسيا اياسىندا جەزقازعان قالاسىنىڭ جاستارى «ناۋرىز» ساياباعىنا 100 ءتۇپ تەرەك وتىرعىزدى.
وبلىس ورتالىعىندا وتكەن اكتسيانىڭ ماقساتى – قالا تۇرعىندارىن قالانى تازا ۇستاۋعا, جاستاردى ەڭبەككە جۇمىلدىرۋ ارقىلى, قالانى تازا ءارى جاسىل قالاعا اينالدىرۋعا شاقىرۋ.
«قالامىزدىڭ كوگالدانىپ, اباتتانۋى ءۇشىن وتكىزىلىپ جاتقان اكتسياعا تۇرعىنداردى بەلسەندى اتسالىسۋعا شاقىرامىن. سونىمەن قاتار اعاشتاردى سىندىرماۋعا, كۇتىپ-باپتاۋعا, قولدارىڭىزدان كەلگەنشە ۇيلەرىڭىزدىڭ الدىنا اعاش وتىرعىزىپ, ولاردى سۋارىپ تۇرۋعا كەڭەس بەرەمىن!» دەيدى ۇلتتىق ۆولونتەرلار جەلىسى ۇلىتاۋ وبلىستىق فيليالىنىڭ جەتەكشىسى دارىن تولەۋباي.
اكتسياعا وبلىستىڭ جاڭاارقا اۋدانى دا بەلسەندى قاتىسىپ, وندا بۇگىن 200 ءتۇپ اعاش وتىرعىزىلدى.
اتاپ وتەيىك, 27 ساۋىردە وتەتىن سەنبىلىكتە وبلىس ورتالىعىندا تاعى 9 مىڭ ءتۇپ اعاش وتىرعىزۋ جوسپارلانۋدا.
