دەسانتشى دەسانتشىنى پانا تۇتادى. بۇل قاعيدا قاشاندا كوك بەرەت پەن الا كەۋدەشە كيگەن «قاناتتى جاياۋ اسكەرلەردىڭ» جاۋىنگەرلەرىن بىرىكتىرىپ كەلەدى. ارداگەرلەر ايماققا وزدەرى قىزمەت ەتكەن اسكەر ءتۇرىنىڭ جاۋىنگەرلەرى كەلگەنىن ەستىگەندە, قولداۋ كورسەتۋگە اسىقتى.
– بۇل ءبىزدىڭ 37-دەسانتتىق-شابۋىلداۋ بريگاداسىنىڭ جاۋىنگەرلەرىمەن العاشقى كەزدەسۋىمىز ەمەس. مۇندا ءبىز قازانىمىزدى الا كەلدىك. بايتەرەك اۋدانىندا ولار جۇمىس ىستەپ جاتقان جەردە پالاۋ ازىرلەدىك. ال بۇگىن جاۋىنگەرلىك رۋحىن كوتەرۋ ءۇشىن شاعىن كونتسەرتتىك باعدارلاما ۇيىمداستىرىلدى, – دەدى ارداگەرلەر ۇيىمىنىڭ توراعاسى مارلەن يمانعاليەۆ.
پسكوۆ 76-اۋە-دەسانتتىق ديۆيزياسىندا قىزمەت ەتكەن باتىس قازاقستان وبلىستىق فيلارمونياسىنىڭ ءانشىسى مارات ساربوپەەۆ پەن الەكساندر سۋحارەۆ ورىنداعان «جان دوسىم», «باتالون بارلاۋى», «دەسانت» اسكەري-پاتريوتتىق اندەرى جانە دەسانتشىلاردىڭ ءانۇرانى ىسپەتتى بوپ كەتكەن «سينەۆا» ءانى ەرەكشە قوشەمەتپەن تىڭدالدى.
– ءبىز ورالعا كومەككە كەلگەن الماتى مەن تالدىقورعاننىڭ جىگىتتەرىنە وتە ريزامىز. مۇنداعىلار ءبىر ادام ءبىر قاپتى كوتەرەدى, ال دەسانتشى بىردەن ءۇش قاپ كوتەرە الادى دەيدى. ءبىر كۇندىك جۇمىستى ولار ءبىر-ەكى ساعاتتا ورىندايدى, سول ءۇشىن ولارعا ۇلكەن راحمەت, – دەدى گەرمانيانىڭ كوتبۋس قالاسىنداعى 35-گۆارديالىق دەسانتتىق-شابۋىلداۋ بريگاداسىندا قىزمەت ەتكەن ارداگەر الىبەك سۇندەتباەۆ.
كەزدەسۋ سوڭىندا ارداگەرلەر اسكەري قىزمەتشىلەرگە گەنەرال-مايور يۆان پانفيلوۆ اتىنداعى 37-دەسانتتىق-شابۋىلداۋ بريگاداسىنىڭ مۇراجايىنا بەرىلەتىن اۋە-دەسانتتىق اسكەرلەردىڭ تۋىن سىيعا تارتتى.
دەسانتتىق-شابۋىلداۋ اسكەرلەرىنىڭ 300-دەن اسا اسكەري قىزمەتشىسى باتىس قازاقستان وبلىسىنىڭ اقجايىق, تەرەكتى, بايتەرەك اۋداندارىندا وزەن جاعالاۋلارىن نىعايتۋ جانە بوگەتتەر سالۋ جۇمىستارىن جالعاستىرىپ جاتىر.
باتىس قازاقستان وبلىسى
