– اسان قۋانىش ۇلى, اڭگىمەمىزدى قارۋلى كۇشتەرىمىزدىڭ قۇرلىق اسكەرلەرى باس قولباسشىسىنىڭ باسقارماسىنا جۇكتەلگەن مىندەتتەردەن باستاساق. بۇل اسكەر ءتۇرى قانداي قىزمەتپەن اينالىسادى؟
– نەگىزگى قىزمەتىمىز – اسكەردەگى باسقارۋ ورگاندارىنىڭ, قۇرامالاردىڭ, بولىمدەر مەن بولىمشەلەردىڭ جاۋىنگەرلىك ازىرلىگىن ۇنەمى ءتيىستى دەڭگەيدە ۇستاۋ, جاۋىنگەرلىك ءىس-قيمىلداردى جۇرگىزۋ بارىسىندا اسكەر تەكتەرىنىڭ الەۋەتىن پايدالانۋدى قامتاماسىز ەتۋ. قۇرلىق اسكەرلەرىنىڭ باستى كۇش-جىگەرى ۇدايى جاۋىنگەرلىك ازىرلىكتى قولداۋعا, اسكەري باسقارۋ ورگاندارى مەن اسكەرلەردى جاۋىنگەرلىك ماقساتقا سايكەس مىندەتتەردى شەشۋ ءۇشىن دايىنداۋعا باعىتتالعان.
ءبىز كەز كەلگەن ساتتە اسكەردى بەيبىت جاعدايدان سوعىس جاعدايىنا اۋىستىرۋعا, احۋالدى تۇراقتاندىرۋدا باتىل ءىس-قيمىلدارعا دايىنبىز. سونداي-اق يدەولوگيا جانە اسكەري-پاتريوتتىق تاربيە سالاسىنداعى مەملەكەت ساياساتىن ىسكە اسىرۋ جونىندەگى جۇمىس تا ماڭىزدى. وسى مىندەتتەردىڭ بارلىعىن ىسكە اسىرۋ ءبىرىنشى كەزەكتە جەدەل جانە جاۋىنگەرلىك دايارلىقپەن كەلەدى. سول ارقىلى باسقارۋ ورگاندارى, شتابتار مەن اسكەرلەر جاۋىنگەرلىك ءىس-قيمىلدىڭ نەعۇرلىم ءتيىمدى تاسىلدەرىن ۇيرەنەدى.
– قۇرلىق اسكەرلەرىنىڭ قازىرگى قۇرامى تۋرالى ايتىپ بەرسەڭىز؟
– قارۋلى كۇشتەر قۇرامىنداعى باسقا دا اسكەر تەكتەرىنىڭ زامان اعىمىنا ساي دامىپ جاتقانىنا قاراماستان, قۇرلىق اسكەرلەرى قاي كەزدە دە الدىڭعى قاتارلى قۇرىلىم بولىپ سانالادى جانە الەمنىڭ بارلىق ارمياسىنىڭ نەگىزىن قۇرايدى. قازىرگى ۋاقىتتا قۇرلىق اسكەرلەرى باس قولباسشىسى باسقارماسىنىڭ قۇرامىندا ون ەكى باس باسقارما مەن جەتى باسقارما, ءتورت ءبولىم مەن ەكى قىزمەت بار. سونداي-اق ۇيىمداستىرۋشىلىق تۇرعىدان «استانا», «شىعىس», «باتىس», «وڭتۇستىك» وڭىرلىك قولباسشىلىقتارى, ودان وزگە تىلدىق جانە تەحنيكالىق قامتاماسىز ەتۋ قۇرامالارى مەن بولىمدەرى, ساعادات نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتى, شوقان ءۋاليحانوۆ اتىنداعى قورعانىس مينيسترلىگىنىڭ اسكەري كوللەدجى جۇمىس ىستەيدى.
– كەز كەلگەن ۋاقىتتا سىرتتان ءتونۋى مۇمكىن قاتەرلەرگە قارسى قۇرلىق اسكەرلەرىنىڭ بۇگىنگى دايىندىعى قالاي؟
– ەل پرەزيدەنتى مەن مەملەكەتىمىزدىڭ قورعانىس سالاسىنا جاۋاپتى بارلىق مەكەمەنىڭ قامقورلىعى ارقاسىندا قۇرلىق اسكەرلەرىنىڭ الەۋەتى ىقتيمال قاۋىپ-قاتەرلەرگە دەر كەزىندە دەن قويۋعا, شابۋىلدىڭ بەتىن قايتارۋعا دايىن. كەيىنگى جىلداردا بولىپ جاتقان سوعىس قيمىلدارى اۋە جانە عارىشتىق شابۋىل تەحنيكالارىنىڭ ءرولi ارتقانىنا قاراماستان, قارۋ-جاراقتىڭ سوڭعى ۇلگىلەرىمەن جاراقتاندىرىلعان قۇرلىق اسكەرلەرiنiڭ وزەكتىلىگى ەشقاشان جوعالمايدى. سوندىقتان ونىڭ ازىرلىگىنە ءاردايىم كوپ كوڭىل بولىنەدى. بۇل تەك تەوريالىق ساباقتار ەمەس, ۇزاق ۋاقىتقا سوزىلاتىن وقۋ-جاتتىعۋلاردى دا قامتيدى. ءبىز كوپ باعىت بويىنشا جاۋىنگەرلىك دايارلىق باعدارلامالارىن ىسكە اسىرامىز.
كەز كەلگەن ءىستىڭ ءساتتى ورىندالۋى بىلىكتى مامانعا بايلانىستى. سوندىقتان قۇرلىق اسكەرلەرىنىڭ وقۋ-جاتتىعۋ ورتالىقتارىندا ماماندار دايارلاۋ ۇدايى جۇرگىزىلىپ كەلەدى. زاماناۋي تەحنولوگيالاردى پايدالانا وتىرىپ, بارلاۋ قۇرالدارىن اتىس قارۋ-جاراعىمەن ىقپالداستىرۋ جۇزەگە اسىرىلىپ جاتىر. جاۋىنگەرلىك ءىس-قيمىلداردى جۇرگىزۋدىڭ جاڭا ءادىس-تاسىلدەرى سىناقتان وتكىزىلەدى. قۇرلىق اسكەرلەرىنە ارنالعان ماماندار ەلىمىزدە عانا ەمەس, شەتەلدىك اسكەري جوعارى وقۋ ورىندارىندا دا دايارلانىپ جاتىر. سونىڭ ىشىندە زىمىران اسكەرلەرى مەن ارتيللەريا ماماندارىن, بارلاۋشىلاردى, اۋە شابۋىلىنا قارسى قورعانىس, ينجەنەرلىك اسكەرلەر, رادياتسيالىق جانە حيميالىق قورعانىس ماماندارىن دايارلاۋعا ەرەكشە نازار اۋدارىلادى.
– زاماناۋي قارۋ-جاراق دەمەكشى, قۇرلىق اسكەرلەرى اسكەري تەحنيكامەن تولىق جابدىقتالعان با؟
– قازىرگى ۋاقىتتا قۇرلىق اسكەرلەرى بارلىق قاجەتتى قارۋ-جاراقپەن, اسكەري تەحنيكامەن جاراقتالعان. سونىمەن قاتار بتر-82ا, «كوبرا», «ارلان» بروندى دوڭگەلەكتى ماشينالارى سياقتى زاماناۋي تەحنيكا ۇلگىلەرىمەن جوسپارلى تۇردە كەشەندى قايتا جاراقتاندىرۋ جالعاسىپ جاتىر. بولىمشەلەر ارتيللەريالىق بارلاۋ قۇرالدارىمەن, ت-72 تانكتەرىمەن, اۋە شابۋىلىنا قارسى قورعانىستى باسقارۋدىڭ جىلجىمالى پۋنكتتەرىمەن, وزدىگىمەن قوزعالاتىن كەشەندەرمەن قامتاماسىز ەتىلۋ ۇستىندە. نارىق مونيتورينگi جانە تەحنيكالىق جاراقتاندىرۋدىڭ بالامالى جولدارىن iزدەۋ جونiندەگi جۇمىستار تۇراقتى نەگiزدە جۇرگiزiلىپ كەلەدى.
جالپى العاندا, قۇرلىق اسكەرلەرىنىڭ بۇگىنگى الەۋەتى ەلىمىزدىڭ اۋماقتىق تۇتاستىعى مەن ەگەمەندىگىن قورعاۋ, مەملەكەتتىك جانە اسكەري نىسانداردى كۇزەتۋ, زاڭسىز قارۋلى توپتارمەن كۇرەس بويىنشا قويىلعان مىندەتتەردى شەشۋگە, سونداي-اق ەلىمىز راتيفيكاتسيالاعان حالىقارالىق شارتتارعا سايكەس مىندەتتەردى ورىنداۋعا تولىق قابىلەتتى.
– دالالىق وقۋ-جاتتىعۋ سارباز اكادەمياسى ەكەنى بەلگىلى. قۇرلىق اسكەرلەرىنىڭ جەكە قۇرامى قاتىساتىن وقۋ-جاتتىعۋلار مەن ءىس-شارالار, ولاردىڭ ناتيجەلەرى تۋرالى نە ايتار ەدىڭىز؟
– كەيىنگى بىرنەشە جىلدا قۇرلىق اسكەرلەرىندەگى جاۋىنگەرلىك دايارلىقتىڭ قارقىنى بىرنەشە ەسە ارتتى. قۇرامالارىمىز بەن بولىمدەرىمىز ءارتۇرلى وقۋ-جاتتىعۋعا, ونىڭ ىشىندە حالىقارالىق اۋقىمداعى جيىندارعا ۇنەمى قاتىسىپ, وزدەرىنىڭ تاجىريبە جۇزىندەگى داعدىلارى مەن دالالىق داعدىلارىن جەتىلدىرىپ كەلەدى. اتاپ ايتقاندا, رەسپۋبليكالىق «شىعىس», «باتىل-تويتارىس», «ايبالتا», «كوكجال», حالىقارالىق ء«وزارا ءىس-قيمىل», «مىزعىماس باۋىرلاستىق», «بەيبىت ميسسيا», «ىزدەستىرۋ», «قازيند» سەكىلدى وقۋ-جاتتىعۋلاردىڭ تۇراقتى قاتىسۋشىسىمىز.
سونىمەن قاتار قۇرلىق اسكەرلەرىنىڭ جاۋىنگەرلەرى ەل اۋماعىندا دا, ودان تىس جەردە دە ارميا حالىقارالىق ويىندارىنىڭ ءتۇرلى سىندارىندا باق سىناپ كەلەدى. قارۋلى كۇشتەر جوعارعى باس قولباسشىسىنىڭ قاتىسۋىمەن وتان قورعاۋشى كۇنىندە, 9 مامىر مەرەكەسىنە ارنالعان شەرۋلەردە اسكەر قاتارىنان كورىندى. ال بيىل «وڭتۇستىك» وڭىرلىك قولباسشىلىعىنىڭ اسكەري قىزمەتشىلەرى پاكىستان يسلام رەسپۋبليكاسىندا وتكەن حالىقارالىق جارىستىڭ جەڭىمپازى اتانىپ, جاۋىنگەرلىك دايىندىعىنىڭ جوعارى ەكەنىن كورسەتتى.
بارلىق وتكىزىلگەن ءىس-شارا دالالىق داعدىلاردىڭ دەڭگەيىن ارتتىرۋعا, جاۋىنگەرلىك تەحنيكالار كومانديرلەرىنىڭ جوعارى كاسىبي ءبىلىم مەن بىلىككە يە بولۋىنا, ولاردىڭ كومانديرلىك قاسيەتتەرىن, قويىلعان مىندەتتەردى ورىنداۋ كەزىندە بولىمشەنى باسقارۋ داعدىلارىن دامىتۋعا, جەكە قۇرامنىڭ پسيحولوگيالىق تۇراقتىلىعىن, باتىلدىعى مەن فيزيكالىق توزىمدىلىگىن قالىپتاستىرۋعا ىقپال ەتەدى. مۇنداي ءىس-شارالار جالپى اسكەري قىزمەتتىڭ بەدەلىن ارتتىرۋعا سەپتىگىن تيگىزەتىنى ءسوزسىز.
– كۇنى كەشە قۇرلىق اسكەرلەرىنىڭ قۇرىلعانىنا 31 جىل تولدى. وسى ورايدا قارۋلاس ارىپتەستەرىڭىزگە قانداي تىلەك ايتار ەدىڭىز؟
– قۇرلىق اسكەرلەرى باس قولباسشىسى باسقارماسىنىڭ وفيتسەرلەرى مەن سەرجانتتارى كۇندەلىكتى ەڭبەگىنىڭ, ۇيلەسىمدى ءىس-ارەكەتىنىڭ, كاسىبي شەبەرلىگىنىڭ ارقاسىندا قورعانىس مينيسترلىگىنىڭ باسشىلىعى العا قويعان بارلىق مىندەتتى جەدەل ورىنداپ كەلەدى. الداعى ۋاقىتتا دا ءدال وسى باعىتتان تايمايمىز. ويتكەنى وتان قورعاۋ قىزمەتى – ءبىر ءسات تە قالعۋعا مۇرسات بەرمەيتىن مىندەت. قۇرلىق اسكەرلەرى قولباسشىلىعىنىڭ جانە ءوزىمنىڭ اتىمنان بۇكىل جەكە قۇرامدى, اسكەري قىزمەتشىلەر مەن ارداگەرلەردى قۇرلىق اسكەرلەرى باس قولباسشىسى باسقارماسىنىڭ قۇرىلعان كۇنىمەن, الدا كەلە جاتقان وتان قورعاۋشى كۇنىمەن شىن جۇرەكتەن قۇتتىقتايمىن! وتانىمىز – قازاقستان رەسپۋبليكاسىنىڭ گۇلدەنۋى جولىنداعى ەڭبەكتەرىنە تابىس تىلەيمىن!
– اڭگىمەڭىزگە راحمەت.
اڭگىمەلەسكەن –
ەسكەندىر زۇلقارناي,
«Egemen Qazaqstan»
