سولتۇستىك قازاقستان وبلىسىنداعى «ابىلاي حان رەزيدەنتسياسى مۋزەي كەشەنىندە» ۇلى حاننىڭ زامانىنا قاتىستى كوپتەگەن تاريحي جادىگەر ساقتالعان. ازاتتىق كۇرەستىڭ ءباھادۇرى, قازاققا ۇلى حان بوپ وتكەن ابىلاي حاننىڭ مۇرالارى ەرتىستىڭ پاۆلودار وڭىرىندە العاش رەت كورسەتىلدى.
كوشپەلى كورمەنى باستاپ كەلگەن «ابىلاي حان رەزيدەنتسياسى مۋزەي كەشەنىنىڭ» ديرەكتورى ايان ساداەۆ مەكەمەدە جالپى سانى 500-دەن استام ەكسپونات بارىن جەتكىزدى.
«ابىلاي زامانىنا قاتىستى سوعىس قارۋ-جاراعى, تاريحي قۇجاتتار, ەتنوگرافيالىق بۇيىمدار كوپ. بۇگىنگى كوشپەلى كورمەگە سولاردىڭ نەگىزگىلەرىن عانا اكەلىپ وتىرمىز. بۇل جادىگەرلەردىڭ كوبى سول زاماننىڭ ۇلگىسىمەن جاڭادان جاسالعان بۇيىمدار ەكەنىن بايقاپ وتىرعان بولارسىزدار. قالامىزدا ۆيكتور جاۆورونكوۆ ەسىمدى شەبەر ازامات بار. وعان تاپسىرىس بەرەمىز. ۇستا بۇيىمدى جاساماس بۇرىن ونىڭ تاريحي نەگىزىن زەرتتەپ, ماعلۇماتتار جينايدى. ناتيجەسىندە, وتە كەرەمەت تۋىندىلار جاساپ شىعاردى. ال كەيبىر جادىگەرلەردى «مۋزەيگە سىيلىق» اكتسياسى اياسىندا جەرگىلىكتى جۇرتشىلىق اكەلىپ تاپسىردى», دەيدى ول.
كورمەدە ابىلايدىڭ اق ءۇيىنىڭ ۇلگىسى, حاننىڭ ءمور ساقيناسىنىڭ كوشىرمەسى, زۇلپىقار قىلىش, قازاق باتىرلارىنىڭ ساۋىت-سايمانى مەن سەمسەر, نايزا, شوقپار, قىلىش, ايبالتا, كۇرزى, اكيناك, سيراقتى مىلتىق سياقتى سوعىس قۇرالدارى, سول كەزەڭدەگى ديپلوماتيالىق حاتتار مەن ارحيۆتىك قۇجاتتاردىڭ كوشىرمەلەرى, تاعى دا باسقا كوپتەگەن جادىگەر ۇسىنىلدى.
پاۆلودار
