«ماعاشتىڭ» نانىنان ءدام تاتىڭىز!

1 توننادان 20 تونناعا جەتكىزدى

مەكتەپ بىتىرگەن سوڭ سول كەزدەگى لە­­نين­گراد قالاسىنداعى ەسەپ-كرەديت تەحني­كۋمىنان تەحنيك-ەلەكترومەحانيك ماماندىعىن الىپ شىققان ايتجان ساحي ۇلى ەڭبەككە ەرتە ارالاستى.

ەل ەكونوميكاسى نارىققا بەيىم­دەلىپ, كاسىپكەرلىك قولعا الى­نا باستاعان ەلەڭ-الاڭ شاقتا العاش­قىلاردىڭ ءبىرى بولىپ جەكە كاسىپكە تاۋەكەل ەتتى. بۇگىندە كاسى­بىن ورگە دومالاتىپ, ەل ەكونوميكاسىنا ۇلەس قوسىپ وتىر.

ايتجان ساۋعاباەۆتىڭ نان تسەحىن قولعا الۋىنا اقتاۋدا وتكەن حالىقارالىق كورمەگە قويىلعان گەرمانيالىق نان پىسىرەتىن قۇرال-جابدىقتاردى كورۋى اسەر ەتتى.

كورمەگە كەلگەن اپپاراتتاردى ساتىپ الىپ, ءبىر اي بويى ماماندارىنا نەمىس ارىپتەستەرىنىڭ ءتالىم-تاجىريبەسىن ۇيرەتتى. كوپ ۇزاماي, 1994 جىلى قاراشا ايىندا «ماعاش» جاۋاپكەرشىلىگى شەكتەۋلى سەرىكتىستىگىنىڭ العاشقى نان ونىمدەرىن ساتىلىمعا شى­عاردى.

ءبىز جاي عانا «باتون» دەپ اتايتىن فرانتسۋز باگەتىن ءپى­سىرىپ, قالاداعى ۇلكەن بازارعا ورنا­لاستىرعان شاعىن ۆاگوندا نان ساۋداسىن جولعا قويدى. ساتىپ الۋشىلار قاز-قاتار كەزەككە تۇرىپ كاسىپكە جان ءبىتىردى, كەۋدەگە ءۇمىت سىيلادى. ناننىڭ 3-4 تۇرىنەن تاۋلىگىنە 1 توننا نان پىسىرەتىن زاۋىت قۋاتتىلىعى ۋاقىت وتە كەلە 2 تونناعا ارتتى. الايدا بۇل جۇمىس ەكپىنىنە رەسەيلىك پەش­تەر تەك ءبىر-ەكى جىل شىداپ, تە­سىلىپ ىستەن شىقتى. ماسكەۋ قا­لاسىندا ۇيىمداستىرىلعان ءىرى كورمەگە بارعان ايتجان گەر­مانيالىق قۇرال-جابدىقتارعا قىزىعۋشىلىق تانىتتى.

«ناننىڭ نەگىزى – اشىتقى» دەيتىن نەمىستەر سۇيىق اشىتقى دايىندايتىن قۇرالدارىن كور­مەگە شىعارىپ تۇر ەكەن. وسى اپپاراتتاردى ساتىپ العان «ماعاش نان» ەندى نان دايىنداۋ كولەمىن تاۋلىگىنە 10 تونناعا كوتەردى, ارتىنشا اتالعان ەلدەن سۋ جاڭا نان پىسىرەتىن پەشتەردى ساتىپ الىپ, نان ءپىسىرۋ كورسەتكىشىن تاۋ­لىگىنە 20 تونناعا جەتكىزىپ, جۇمىس قارقىنىن ارتتىردى.

زاماناۋي تەحنولوگيالار – ساپالى ءونىمنىڭ كەپىلى

بۇگىندە «MAGA-BREAD» جشس – ماڭ­عىستاۋدىڭ ماق­تا­نىشى, شەتتەن كەلگەندەرگە مە­رەيلەنە كورسەتە الاتىن كاسىپ­ورىن. اقتاۋعا ءار جىلدارى ساپارمەن كەلگەن مەملەكەت باسشىلارى دا «ماعاش نان» زاۋىتىنىڭ جۇمىسىمەن جاقسى تانىس. ار­نايى كەلىپ, ارالاپ كورىپ, العىسىن ايتىپ, ماراپاتىن تاپسى­رىپ جۇرگەنى زاۋىت ءدالىزىنىڭ قا­بىرعاسىنا ىلىنگەن سۋرەتتەر مەن ماداقتاما قاعازداردان كورىنىپ تۇر. اقتاۋدا پىسكەن نان تۇرلەرى الىس شەتەلدەردە وتكەن ءتۇرلى كورمەدە تانىستىرىلىپ, لايىقتى باعاسىن الىپ ءجۇر.

قازىر نان, پەچەنە, كوندي­تەرلىك ونىمدەردىڭ 250-گە تارتا ءتۇرىن, 12 ءتۇرلى ماكارون ونىمدەرىن ءوندىرىپ, تاۋلىگىنە 50 توننا نان, 20 توننا ماكارون ونىمدەرىن ەل يگىلىگىنە ۇسىنىپ وتىرعان «MAGA-BREAD» جشس-نان زاۋىتى 300-گە تارتا ادامدى جۇمىسپەن قامتىپ وتىر. زاۋىتتىڭ ونىمدەرى ماڭعىستاۋ وبلىسى كولەمىنە تو­لىق تارالادى. ساپاسىنا سىن اي­تىلىپ كورگەن ەمەس. زاۋىت حاسسپ جۇيەسىنە ەنگەن, ياعني تەحنولو­گيا­لىق ۇدەرىستەردىڭ ساپاسى دەڭ­گەيىندە ازىق-ت ۇلىك ونىمدەرىنىڭ قاۋىپسىزدىگى باقىلانادى.

«زامان تالابىنا ساي جاب­دىقتاردى جاڭعىرتىپ وتىرۋ, ءونىم الۋانتۇرلىلىگىن ارتتىرۋ, ءونىمنىڭ ساپاسى مەن قاۋىپ­سىزدىگى – كاسىپورىننىڭ باستى سترا­تەگيالىق ماقساتى جانە ۇس­تانىمى. زاۋىتتا ۇنەمى جوعارى ساپالى ءونىم دايىنداۋ ءۇشىن جوعارى دارەجەدەگى تاجىريبەلى ماماندار, ءوز ءىسىنىڭ شەبەرلەرى جۇمىس ىستەيدى», دەيدى كاسىپكەر ا.ساۋعاباەۆ.

نان دايىنداۋدا Diosna, MIWE, Hatton.Kunze, Capway سىندى شەتەلدىك تانىمال زاماناۋي تەحنولوگيالىق قۇرالدار قول­دانىلادى. زاۋىت اۋا تەمپەراتۋراسىن جىل بويى قالىپتى دەڭگەيدە قامتاماسىز ەتىپ تۇراتىن «Airinotec» فيرماسىنىڭ جوعارى ساپالى جەلدەتكىشتەرىمەن جاب­دىقتالعان. «Eberhardt» فير­ما­سىنىڭ جابدىقتارىمەن «كايزەر» بولكەسى, «Fortuna Fritsch» فير­ما­سىنىڭ قۇرالىمەن «برەتتسەل», «Tradirorm» فيرماسى جابدىق­تا­رىمەن «چياباتتا» دايىندالادى. ناندى دايىنداۋ مەن تاراتۋعا دەيىنگى ءۇردىس تولىقتاي زاماناۋي كومپتەرلىك تەحنولوگيامەن اۆتوماتتى تۇردە جۇزەگە اسىرىلادى. 2017 جىلى قولدانىسقا بەرىلگەن «ماعاش» ماكارون ونىمدەرى زاۋىتىندا ونىمدەر گەرمانيالىق, يتاليالىق زاماناۋي قۇرال-جاب­دىقتارمەن حالىقارالىق ستاندارتقا ساي دايىندالادى. 100-دەن استام اتاۋعا يە ماكارون ونىم­دەرىن ءوندىرۋ جانە تاراتۋعا دايىنداۋ ءۇشىن شەتەلدىك «Diosna», «Rondo Doge», «Kaleijer», «Daub Bakery Machine» فيرمالارىنىڭ قۇرالدارى پايدالانى­لادى.

الەۋمەتتىك جاۋاپكەرشىلىك ۇمىت قالعان ەمەس

كاسىپكەر ايتجان ساحي ۇلى دەمەۋشىلىك, قايىرىمدىلىق جاساۋدان تىس قالعان جوق. نارىقتىق ەكونوميكانىڭ العاشقى جىلدا­رىنداعى قيىن كەزەڭدە ءار جۇمىس­شىعا بالا سانىنا قاراي بىرنەشە دانا ناندى تەگىن تاراتسا, بىرنەشە ادامنىڭ ءۇي, كولىك الۋىنا قولۇشىن بەردى. وتپان تاۋداعى تا­ريحي-مادەني كەشەن جۇمىسىنا 1 ميلليون تەڭگە اۋدارعانى دا اتاپ وتۋگە تۇرارلىق ءىس. 2023 جىلى اق­تاۋ قالاسىنىڭ 55 جىلدىعىنا وراي ءوز قارجىسىنا قالاداعى اباي اتىنداعى مادەني-دەمالىس كەشەنىنىڭ الدىنا اباي اقىننىڭ الىپ ەسكەرتكىشىن ورناتتى.

كاسىپكەردىڭ ورىنداسام دەپ قۇلشىنىپ وتىرعان ارمانى مەن ماقساتى از ەمەس. دەگەنمەن قا­زىرگى بيىگىنىڭ ءوزى – ماقتاۋعا دا, ماقتانۋعا دا تۇرارلىق.

ماڭعىستاۋ وبلىسى