كوشپەلىلەر ويىنىنا قانشالىقتى دايىنبىز؟

اتشاباردىڭ الەۋەتى

ەلوردا ىرگەسىندەگى «قازانات» اتشابارىندا دۇنيەجۇزىلىك كوشپەلىلەر ويىندارىنىڭ اشىلۋ سالتاناتى وتەدى. ودان كەيىن بايگە تۇرلەرى, كوكپار دوداسى ۇيىمداستىرىلادى. كلاسسيكالىق ۇشقىر بايگە ءۇش قاشىقتىقتا (1 600, 2 400, 3 200 مەتر) وتسە, جورعا سايىسى 9 شاقىرىمدا ءوربيدى. قۇنان بايگە 11 شاقىرىمعا, توپ بايگە 18 شاقىرىمعا جىبەرىلسە, الامان دوداسىنا قوسىلاتىن سايگ ۇلىكتەر 25 شاقىرىمعا ايدالادى. بايگە فەدەراتسياسىنىڭ ەرەجەسىنە ساي وتكىزىلەتىن بايگەدە اتقا شاباتىن شاباندوز 8 جاسقا تولۋعا ءتيىس. قۇنان بايگەدە جىلقىنىڭ تۇقىمىنا ەشقانداي شەكتەۋ بولمايدى, تەك ءتىسىن ساناپ, ەكى جاس­تان اسقانىن قاداعالايدى. ەلىمىزدىڭ اتبەگىلەرىنە زور مۇمكىندىك 6 قۇنانعا دەيىن قوسۋعا رۇقسات ەتىلەدى. ال شەتەلدەن كەلەتىن كوماندالاردىڭ ارقايسىسى 3 جۇيرىگىن عانا كومبەگە جىبەرىپ, بايگە توبە باسىنان كۇتەدى.

توپ بايگە مەن الاماندا دا وسى تالاپ ساقتالادى, ياعني شەتەلدىك كوماندالار توپ بايگەگە 3 تۇلپارىن, الامانعا دا 3 جۇيرىگىن عانا قوسادى. مىسالى, بايگە تۇرلەرىنەن نەگىزگى باسەكەلەس سانالاتىن قىرعىزستان ەلى الامانعا بۇعان دەيىن اۆتوكولىك, ءتىپتى پاتەر ۇتىپ جۇرگەن ايگىلى قاراقىز تۇلپارمەن بىرگە تاعى ەكى جۇيرىكتى دوداعا قوسا الادى دەگەن ءسوز.

ۇشقىر بايگەنىڭ تالابى وزگەشە. حالىقارالىق تۇقىمدىق جىلقى كىتا­بىنا تىركەلگەن ءارى جەكە تولقۇجاتى بار اعىلشىن تۇقىمدى جۇيرىكتەر جىبەرىلەدى. ۇشقىر بايگەنىڭ دوداسى «Qazaq Jockey Club» حالىقارالىق قوعامدىق ۇيىم ەرەجەسىنە ساي وتكىزىلمەك. شاباندوزعا ارنايى تىگىلگەن كيىم كيىپ شابۋى مىندەتتەلمەك. جىلقىنىڭ جاسى مەن جىنىسى, بايگە ساناتىنا ساي سالماعى ساراپتالىپ دوداعا جىبەرىلەدى. 1 600 مەتر قاشىقتىقتاعى ۇشقىر بايگەگە ەكى جاسقا شىققان قۇنان مەن بايتال دوداعا تۇسەدى. مۇندا دا ەلىمىزدىڭ اتبەگىلەرىنە مۇمكىندىك زور. شەتەلدىك ءار دەلەگاتسيا ۇشقىر بايگەنىڭ ءاربىر قاشىقتىعىنا 2 تۇلپاردان عانا قوسسا, ءبىزدىڭ اتبەگىلەر 6 جۇيرىگىنىڭ جولىنان جۇلدە كۇتە الادى. جورعا جارىسىنىڭ دا تالابى وسىنداي. شەتەلدەردەن كەلەتىن اتبەگىلەرگە ەكى جورعادان عانا قوسۋىنا رۇقسات بەرىلەدى.

بەلگىلى اتبەگى, 2018 جىلى قىرعىز­ستاندا وتكەن دۇنيەجۇزىلىك كوشپەلىلەر ويىندارىنىڭ الامان بايگەسىندە جۇيرىگى توپ جارعان سەرىك مايماقوۆ اتشابار الاڭىنا باسا ءمان بەرىلۋگە ءتيىس دەپ سانايدى. جەر قىرتىسىنىڭ ۇستىڭگى قا­باتى قاتتى بولۋى دا تۇلپاردىڭ تۇيا­عىن قىزدىرىپ, جاراقاتتانۋىنا اكەپ سوعاتىنىن ايتادى.

– «قازانات» يپپودرومىنىڭ بايگە الاڭى وتە قولايلى. بۇعان دەيىن دە ءتۇر­لى دەڭگەيدەگى بايگە تۇرلەرى ءوتىپ ءجۇر. دۇنيەجۇزىلىك كوشپەلىلەر ويىندارىندا دا اتتارىمىزدىڭ اياعىن شاۋىپ الماسا, جاراقاتتان امان بولسا دەپ تىلەيمىن. ارينە, ەڭ باستى تىلەك – الاماننىڭ باس بايگەسىن قانجىعامىزعا بوكتەرۋ. ءوز ەلىمىزدە وتەتىن دودادا نامىستى قايراۋ ماڭىزدى بولماق, – دەيدى س.مايماقوۆ.

دۇنيەجۇزىلىك كوشپەلىلەر ويىندارىن قابىلدايتىن سپورتتىق ين­فراقۇرىلىمنىڭ الەۋەتى قانشالىقتى ەكەنىن تاعى ءبىر سالماقتاپ كوردىك. قا­زىنادان قوماقتى قارجى ءبولىنىپ, قايتا جوندەۋ كورەتىن «قازانات» اتشابارىن ەل يگىلىگىنە جاراتۋ – ماڭىزدى ماسەلە. كوشپەلىلەر ويىندارىنا اتتارىن اكەلەتىن كوماندالار ءۇشىن ارنايى سالىناتىن قورا دا توي وتكەن سوڭ قاڭىراپ بوس قالماۋعا ءتيىس. 2007 جىلى پايدالانۋعا بەرىلگەن «قازانات» اتشابارىندا وسى كۇنگە دەيىن تالاي بايراقتى دودا ۇيىمداستىرىلدى. 2017 جىلى ەكسپو حالىقارالىق كورمەسىنە وراي حالىقارالىق دارەجەدە بايگە بەرىلىپ, كوكپاردان الەم چەمپيوناتى دا وسى اتشابار الاڭىندا وتكىزىلدى. بايگە الاڭىنا قۇم توسەلىپ, تۇلپارلار تۇياقتان قالماس ءۇشىن قاۋىپسىزدىك شارالارى دا قاتاڭ ساقتالادى. بۇعان دەيىن 3 مىڭ كورەرمەنگە ارنالعان اتشابار كۇردەلى جوندەۋدەن كەيىن جاڭارىپ جاڭعىرا تۇسەتىنى ءسوزسىز. كورەرمەندەرگە ارنالعان ورىن سانى دا ارتىپ, قوسىمشا جينالمالى ورىندىق ورناتۋ دا كوزدەلىپ وتىر. قايتا جوندەۋ جۇمىستارى جۇرگىزىلىپ, جاڭعىرتىلاتىن «قازانات» اتشابارى حالىقارالىق ستان­دارتقا ساي جاسالسا, ۇشقىر بايگە تۇر­لەرىنەن الەمدىك دودالاردى وتكىزۋگە دە مۇمكىندىك تۋادى.

كەيىنگى جىلدارى ۇشقىر بايگە دوداسىندا ورالدىق اتبەگى تىلەك مۇحانبەتقا­ليەۆتىڭ كابىرحان جۇيرىگى ەلدىڭ اتىن اسپانداتىپ ءجۇر. شەتەلدە وتەتىن گران-پري دودالارىندا ولجا سالىپ جۇرگەن جۇيرىكتىڭ داڭقى ەلدىڭ مەرەيىن اسىردى. وسى دودا جان­كۇيەرلەرىنىڭ قاتارى قالىڭداي تۇسۋىنە دە وراسان سەپتىگىن تي­گىزىپ وتىر. دەمەك دۇنيەجۇزىلىك كوش­پەلىلەر ويىندارى قارساڭىندا كۇر­دەلى جوندەۋ, قايتا جاراقتاۋ جۇمىستارى جۇرگىزىلىپ جاتقان اتشابار دا كەيىن ۇشقىر بايگە كورىگىن قىزدىرار مەكەنگە اينالادى.

دۇنيەجۇزىلىك كوشپەلىلەر ويىندا­رىن وتكىزۋ – وليمپيادا دوداسىن قابىلداۋمەن پارا-پار اۋقىمدى شارا. ماڭىزدى دودانى وتكەرگەننەن كەيىن دە «قازانات» اتشابارى قاڭىراپ بوس قالماۋعا ءتيىس. قالا تۇرعىندارى مەن قونا­قتارىنىڭ ەر ۇستىنە قونىپ, اتپەن سە­رۋەندەۋدى اقىلى نەگىزدە ۇيىمداستىرىپ دا تابىس كوزىن تابۋعا بولادى. قايىرىمدى يگى امال ءۇشىن يپپوتەراپيا شاراسىنا دا اتتاردى ۇيرەتىپ, مۇمكىندىگى شەكتەۋلى بالالاردىڭ ەم-دوم الۋىنا سەپتەسۋدىڭ مۇمكىندىگى زور. ويتكەنى ەلىمىزدە ەرەكشە جانداردىڭ يپپوتەراپياعا زارۋلىگى ەسەلەپ ارتىپ كەلەدى.

«الاۋ» مۇز ايدىنى سارايى V دۇنيە­جۇزىلىك كوشپەلىلەر دوداسىندا حالىق ويىندارىن قابىلدايدى. اتاپ ايتقاندا, اسىق اتۋ, قىرعىزدىڭ وردا ويىنى, ارقان تارتىس وسى مۇز ايدىنى كەشەنىندە وتەدى. 2011 جىلى قىسقى ازيا ويىندارىن وتكىزۋ ماقساتىندا سالىنعان «الاۋ» مۇز سارايى كەشەنى بۇعان دەيىن دە بىرنەشە سالماقتى سايىستى قابىلداعان. قىسقى ازيا ويىن­دارىنداعى قۇرلىقتىق رەكوردتاردى بىلاي قويعاندا, كونكيمەن جۇگىرۋدەن الەم كۋبوگىنىڭ كەزەڭدەرى ءوتتى. الەم چەمپيوناتىن دا قابىلدادى. 7 460 كورەرمەندى ەركىن سىيدىراتىن مۇز سارايىندا قىسقى سپورت تۇرىنەن سىرت 2015 جىلى دزيۋدودان الەم چەمپيوناتى تۇڭلىگىن ءتۇردى. ەلىمىز جاپون كۇرەسىنەن الەم بىرىنشىلىگىن العاش رەت قابىلداپ, 100-دەن اسا مەملەكەتتەن كەلگەن سپورت­شىلار «الاۋدىڭ» تورىندە دۇنيە دوداسىنىڭ جالاۋىن جەلبىرەتتى. قوڭىر كۇزدە دۇنيەجۇزىلىك كوشپەلىلەر ويىندارىن دا قابىلداۋعا «الاۋ» مۇز سارايى ءازىر.

ەتنواۋىلدىڭ دۋمانى تارقامايدى

«قازانات» يپپودرومىنا ىرگەلەس بوي كوتەرەتىن ەتنواۋىلدىڭ سالتاناتتى اشىلۋ ءراسىمى دۇنيەجۇزىلىك كوشپەلىلەر ويىندارى باستالاردان ءبىر كۇن بۇرىن ۇيىمداستىرىلماق. ەتنواۋىلدا اۋدا­رىسپاق, تەڭگە ءىلۋ, جامبى اتۋمەن قاتار قۇس سالۋدىڭ ۇلتتىق تۇرلەرى بويىنشا دودا وتەدى. بۇركىتىن, قارشىعاسى مەن يتەلگىسىن باپتاعان قۇسبەگىلەردىڭ قىراعىلىعى وسى ماڭدا سىنالادى. 10 گەكتار جەرگە قونىس تەبەتىن دەكوراتسيالىق اۋماققا بىرنەشە كيىز ءۇي تىگىلەدى. دۋ­مانى تارقامايتىن اۋىلدا اقىندار ايتىسى, جىر ءمۇشايراسى, «كوشپەلىلەر عالامى» فەستيۆالى ءوتىپ, دۇبىرگە ءدۇبىر قوسادى. دۇنيەجۇزىلىك كوشپەلىلەر ويىندارىن تاماشالاۋعا كەلگەن جەتكىنشەك جانكۇيەرلەرگە دە ەتنواۋىلدا قىزىق كوپ. تانىمدىق ويىندار, ساۋىقتىق باعدارلاما ۇيىمداستىرىلىپ, ەتنوستىق ستيلدەگى اتتراكتسيوندار قۇرىلادى. ەتنوستىق كيىم ۇلگىلەرىنىڭ ءسان فەستيۆالى دە ەتنواۋىلدى دۋمانعا بولەيدى. قولونەر شەبەرلەرى مەن ىسمەرلەردىڭ قولىنان شىققان تۋىندىلار كورمەگە قويىلادى.

ساداقشى ايىم تىلەپبەرگەن ەكى جىل بۇرىن تۇركيانىڭ يزنيك كولى جاعاسىندا وتكەن دۇنيەجۇزىلىك كوشپەلىلەر ويىن­دارىنىڭ ءسان-سالتاناتى كەلىستى بولعانىن ايتادى.

– كوشپەلىلەر ويىن­دارىنىڭ ەرەك­شەلىگى – بۇل كوشپەلى ءومىر سالتىن ۇس­تانعان حالىقتارعا ءتان ويىن تۇرلەرىنەن وتكىزىلۋىندە دەر ەدىم. ياعني وتەتىن ورنى دا ۇلتتىق سپورت تۇرلەرىن ناسيحات­تاپ, دارىپتەپ, دامىتىپ جۇرگەن حالىق­تاردىڭ وكىلدەرىن, وسى سپورت تۇرلەرىنە قى­زىعاتىن ادامداردى ءبىر جەردە شوعىرلاندىراتىن تەڭدەسسىز دودا. تۇركيا كوشپەلىلەر ويىندارىن بارىنشا تابيعات اياسىندا وتكىزۋگە كۇش سالعانىن اڭعاردىق. انادولى ەلى دۇنيەجۇزىلىك كوشپەلىلەر ويىندارىنا كەلگەن سپورت­شىلاردىڭ, ەرىكتىلەردىڭ, مەديتسينالىق قىزمەت­كەرلەردىڭ, جاتتىق­تىرۋ­شىلارعا ارناپ سال­عان قالاشىق كونتەينەردەن بوي كوتەرىپتى. قوس قاباتتى كەرەۋەتتەر ىڭعايلى ورنالاسقان. كوش­پەلىلەر ويىندارىنا كەلگەن 3 مىڭ­­نان اسا دەلەگاتتىڭ ءبارىن ەركىن جايعاستىرعان قالاشىقتىڭ ءىشى بىرنەشە بولىككە بولىنگەن. كەشكىلىك سەرۋەندەۋگە ارنالعان الاڭ, شاعىن ساۋدا ورنى, اس-اۋقات بەرەتىن الاڭ – ءبارى-ءبارى رەتىمەن جۇيەلى ورىن تەپتى. قالاشىقتىڭ ىشىندەگى تاس توسەلگەن جولدىڭ پايداسى دا زور بولدى, جاۋىن-شاشىندا باتپاققا باتپادىق. قالاشىقتان جارىس وتەتىن الاڭعا, كونتسەرتتىك ساحناعا بارۋدا دا اسفالت جولدىڭ يگىلىگىن كوردىك, – دەيدى ساداقشى.

ل.ن.گۋميلەۆ اتىنداعى ەۋرازيا ۇلت­تىق ۋنيۆەرسيتەتىندە دوكتورانتۋرادا وقيتىن ا.تىلەپبەرگەننىڭ ديسسەرتاتسيا تاقىرىبى – «قازاقستانداعى ۇلتتىق سپورت تۇرلەرىنىڭ ينفراقۇرىلىمى». عىلىمي ەڭبەگىن جازۋعا ىزدەنىس ۇستىندەگى زەرتتەۋشى دۇنيەجۇزىلىك كوشپەلىلەر ويىندارى ءۇشىن دەكو­راتيۆ­تىك قالاشىق تۇر­عىزىپ, دودادان كەيىن بۇزىلاتىن ينفراقۇرىلىم «بەكەر مال شاشپاق» دەگەن پىكىر­دە. ەلىمىز كوشپەلىلەر ويىندارىنىڭ ينفرا­قۇرىلىمىن ازىرلەۋدە بۇل باعىتتى ۇستانبايدى. كە­رىسىنشە, دۇنيەجۇزىلىك كوشپەلىلەر ويىندارى وتكەن سوڭ ينفرا­قۇرى­لىمدى ۇلتتىق سپورتتى وركەندەتۋگە پايدالانۋ­دى كوزدەيتىن جولدى تاڭ­داعانىن ايتادى.

– جالپى, ۇلتتىق سپورت تۇرلەرى نەگىزىنەن وڭ­تۇستىك ايماقتاردا, سونىڭ ىشىندە تۇركىستان مەن جامبىل وبلىستارىن­دا جاقسى دامىعان. ال سولتۇستىك ايماق­تاردا ات سپورتى تۇرلەرىن دامى­تۋعا ارنالعان ينفراقۇرىلىم سىن كو­تەرمەيدى. كوش­پەلىلەر ويىندارى وتكەن­نەن كەيىن دە تولىققاندى قولدانۋعا بولاتىن ينفراقۇرىلىمدى سالىپ جاتىر. «قازانات» اتشابارىنا كۇردەلى جوندەۋ جۇمىستارى باستالدى. ودان سىرت قو­سىمشا الاڭدار دا سالىنادى. وسى ويىن­داردان كەيىن ەلىمىزدە, اسىرەسە, سول­تۇستىك ايماقتاردا ۇلتتىق سپورتقا كوپ­شىلىكتىڭ ىقىلاسى ارتىپ, ءتول ونەر­دى مەڭگەرۋگە ۇمتىلاتىن جانداردىڭ قاتارى ارتاتىنىنا سەنىمدىمىن, – دەيدى ا.تىلەپبەرگەن.

ۇنەمدەۋ ىسىراپقا جول بەرمەيدى

ەرىگەن قار سۋى ەلىمىزدىڭ بىرنەشە ايماعىن ءالى دە ابىگەرگە سالىپ وتىر. شا­ڭىراعى, قورا-جايى, مال-مۇلكى قار­عىن سۋدىڭ استىندا قالعان اعايىننىڭ ارقاسىنان دەمەۋ – قاشاندا مەملەكەتتىڭ مۇددەسى. سولتۇستىك قازاقستان وبلىسىنا جۇمىس ساپارىمەن بارعان مەملەكەت باسشىسى قاسىم-جومارت توقاەۆ سۋ تاسقىنى سالدارىنان قالىپتاسقان كۇردەلى احۋالدى ەسكەرىپ, بيۋدجەت قارجىسىن بارىنشا ۇنەمدەۋ ماقساتىندا يميدجدىك, باسقا دا اۋقىمدى ءىس-شارالاردى وتكىزبەۋ جونىندە ۇكىمەت پەن ورتالىق مەملەكەتتىك جانە جەرگىلىكتى اتقارۋشى ورگاندارعا تاپسىرما بەرگەنىن ايتتى.

«بيۋدجەت قارجىسىن ۇنەمدەۋ ماق­ساتىندا ءىرى حالىقارالىق فورۋمدى وت­كىزۋدەن باس تارتتىم. سونىمەن قاتار دۇنيەجۇزىلىك كوشپەلىلەر ويىندارىنا جۇمسالاتىن شىعىندى قىسقارتامىز. ارينە, قازىر بۇل شارادان تۇپكىلىكتى باس تارتۋ مۇمكىن ەمەس. بىراق وعان جۇمسالاتىن قارجى كولەمى ايتارلىقتاي ازايادى. بۇعان قوسا ەلىمىزدىڭ توكيودا وتەتىن دۇنيەجۇزىلىك كورمەگە قاتىسۋىنا بولىنگەن بيۋدجەت تە قىسقارادى», دەدى ق.توقاەۆ.

دۇنيەجۇزىلىك كوشپەلىلەر ويىندا­رىنىڭ وتكىزىلىپ كەلە جاتقانىنا – بيىل 10 جىل. الەمنىڭ ءار قيىرىنان 100-دەن اسا ەلدەن سپورتشى قاتىسادى دەپ جوسپارلانعان دودانى وتكىزۋگە مەملەكەتتىك قازىنادان 8 ملرد تەڭگە بو­لىنەدى دەپ جوسپارلانعان. سۋ تاس­قىنى زاردابىن جويۋعا باعىتتالعان ءىس-شارالارعا كۇش قوسۋ ماقساتىندا دۇنيەجۇزىلىك كوشپەلىلەر ويىندارىنا بولىنەتىن قارجى دا قىسقارتىلادى. ءدۇيىم ەلگە ساۋىن ايتىلىپ, ۇيىمداستىرۋ جۇمىستارى قولعا الىنعان كوشپەلىلەر دوداسىن كەيىنگە ىسىرۋعا تاعى بولمايدى. ەندى تەك ىسىراپقا جول بەرمەي, قازىنانىڭ ءار تيىنىن ۇنەممەن جۇمساۋ مىندەتى تۇر.

ءماجىلىس دەپۋتاتى جاناربەك ءاشىم­جان كۇن ساناپ ۋاقىتى تاياپ كەلە جاتقان دۇنيەجۇزىلىك كوشپەلىلەر ويىن­دارىن ابىرويمەن وتكىزۋ تۇتاس ەلدىڭ جا­ۋاپكەرشىلىگى ەكەنىن جاۋاپتىلار سەزىنسە دەيدى. ۇكىمەتتىك كوميسسيا ۇيىمداستىرۋ جۇمىستارىن جەدەلدەتىپ, دۇنيەجۇزىلىك كوشپەلىلەر ويىندارىن وتكىزۋ تەك استانا قالاسىنا عانا جۇكتەلمەۋگە ءتيىس. تۇتاس ەلدىڭ جاۋاپكەرشىلىگى بولعاندىقتان ۇيىمداستىرۋ جۇمىستارىنا وڭىرلەر دە بەلسەندى كۇش قوسىپ, ء«بىر ءوڭىر – ءبىر نىسان» قاعيداتىنا باسىمدىق بەرۋ قاجەتتىگىن جەتكىزدى.

– دۇنيەجۇزىلىك كوشپەلىلەر ويىنىندا قازاق ەلىنىڭ تۋريزم الەۋەتىن تابىستى پايدالانۋ باعىتىندا ناقتى جوبالار ازىرلەۋ كەرەك. ۇلتتىق سپورتتى جانە سپورتشىلاردى ناسيحاتتايتىن ءتۇرلى فورماتتاعى اقپاراتتىق ۇگىت-ناسيحات جۇمىستارىن قولعا الۋ – ماڭىزدى شارۋا. دۇنيەجۇزىلىك دودانى وتكىزۋشى ەل رەتىندە ناقتى رەگلامەنتتەردى بەكىتكەندە قازاقتىڭ ۇلتتىق ويىندارى مەن ءتۇرلى ۇستالىق ونەرگە باسىمدىق بەرۋ قاجەت, – دەيدى جاناربەك ءاشىمجان.

ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ جول كار­تاسى ازىرلەنىپ, ءتول ونەردى وليم­پيادالىق سپورت دارەجەسىنە كوتەرۋ جولىندا اۋقىمدى ىستەر اتقارىلىپ كەلە جاتقانىن جەتكىزدى. دەگەنمەن وراسان جوس­پاردى جۇزەگە اسىرۋعا قولبايلاۋ بولىپ وتىرعان دا ينفراقۇرىلىمنىڭ ءيىنىن باسقان ماسەلە ەكەنىن جوققا شىعارمايدى. ي.سالجانوۆ ۇلتتىق سپورت تۇرلەرىنەن مامانداردى وقىتاتىن ارنايى ورتالىق جوق ەكەنىنە قىنجىلىس ءبىلدىردى. ۇلتتىق قۇرىلتايدىڭ مىنبەرىندە وسى ماسەلەنى كوتەرگەن قاۋىمداستىق پرەزيدەنتى قازاق سپورت جانە تۋريزم اكادەمياسى جانە قازاق عىلىمي زەرتتەۋ ينستيتۋتىمەن تىزە قوسىپ, ۇلتتىق سپورت كافەدراسىن اشۋ قولعا الىنعانىن اتاپ ءوتتى. ارنايى ماماندار مەن زەرتتەۋشى عالىمداردىڭ ۇيىتقى بولۋىمەن كەشەندى وقۋ باع­دارلاماسى دا قولعا الىنعان. ۇلتتىق سپورت قاۋىمداستىعى باسشىسىنىڭ ايتۋىنشا, ەلىمىزدە 40-قا جۋىق يپپودروم سالىنعانىمەن, ونىڭ ەشقايسىسى دا حالىقارالىق جارىس وتكىزۋگە جارامايدى ەكەن. سەبەپ – حالىقارالىق ستاندارتقا ساي ەمەس.

ۇلتتىق سپورت قاۋىمداستىعىنا بىر­نەشە فەدەراتسيا قارايدى. وسى ۋاقىتقا دەيىن قۇسبەگىلىكتەن تۇڭعىش الەم چەمپيو­ناتىن, توعىزقۇمالاقتان ءتورتىنشى رەت الەم بىرىنشىلىگىن وتكىزدى. اسىق اتۋدان دا العاش رەت ازيا چەمپيوناتى ۇلتتىق سپورت قاۋىمداستىعىنىڭ ۇيىمداس­تىرۋىمەن ءوتتى.

– جىلدان-جىلعا دۇنيەجۇزىلىك كوشپەلىلەر ويىندارى ۇلتتىق سپورت سالاسىنىڭ وليمپياداسىنا اينالىپ كەلەدى. وسى جارىستى ۇيىمداستىرۋ ارقى­لى ءبىز ءوز مادەنيەتىمىز بەن تاريحىمىزدى, رۋحانياتىمىز بەن قولونەرىمىزدى, سالت-ءداستۇرىمىز بەن ۇلتتىق بولمىسىمىزدى بۇكىل الەمگە ناسيحاتتاۋعا زور مۇمكىندىك الامىز, – دەيدى ي.سالجانوۆ.

«تويدىڭ بولعانىنان بولادىسى قىزىق» قاشاندا. كۇن وزعان سايىن دۇنيەجۇزىلىك كوشپەلىلەر ويىندارىنىڭ ءدۇبىرى قۇلاق تۇبىنەن ەستىلىپ كەلەدى. تورتكۇل دۇنيە ديدارىنا اينالاتىن دۇنيەجۇزىلىك دوداعا قاتىسۋشىلاردىڭ تالعامىنا تاتۋ وڭاي سىن بولماي تۇر. وليمپيادالىق سپورت تۇرلەرىنەن الەم چەمپيوناتىن, قىسقى ازيا ويىندارىن, قىسقى ۋنيۆەرسيادا سالتاناتىن اسىرا ۇيىمداستىرعان ەلىمىز ءۇشىن دۇنيەجۇزىلىك كوش­پەلىلەر ويىندارىن ويداعىداي وتكى­زەمىز دەگەن سەنىم باسىم.