سەنات دەپۋتاتى ولگا بۋلاۆكينا ورمان شارۋاشىلىعى قىزمەتكەرلەرىنە تولەنەتىن ەڭبەكاقى رەسپۋبليكا بويىنشا ەڭ تومەن ەكەنىن اتاپ ءوتتى. قوستاناي وبلىسىنداعى ورمان ءورتى مەن اباي وبلىسىنداعى قايعىلى وقيعاعا ۇلاسقان ەكولوگيالىق اپاتتار ورمان شارۋاشىلىعى قىزمەتكەرلەرىنىڭ جۇمىسى مەن ەڭبەكاقى مولشەرى سايكەس ەمەستىگىن جانە الەۋمەتتىك شيەلەنىس تۋ قاۋپىن اشىپ كورسەتتى.
«ورمان ءورتىنىڭ جيىلەپ كەتۋى, ورماندى زاڭسىز كەسۋ, براكونەرلىك, رۇقسات ەتىلمەگەن جەرلەرگە قوقىستىڭ جينالۋى, قورشاعان ورتانىڭ لاستانۋى, سونىڭ ناتيجەسىندە سيرەك كەزدەسەتىن وسىمدىك تۇرلەرى مەن تابيعي رەسۋرستاردىڭ جويىلۋى ەل ەكونوميكاسىنا وراسان زور زالال كەلتىرىپ قانا قويماي, ءاربىر تۇرعىننىڭ ءال-اۋقاتىنا دا اسەر ەتەدى. ماسەلە ورتكە قارسى پروفيلاكتيكالىق جۇمىستاردى ناشار ۇيىمداستىرۋ مەن ورمان ورتىنە ۋاقتىلى ارەكەت ەتپەۋدەن تۋىندايدى. ماتەريالدىق-تەحنيكالىق بازانىڭ ازدىعى, ورمان سالاسى قىزمەتكەرلەرىنىڭ ەڭبەك جاعدايىنىڭ تالاپقا ساي بولماۋى, وسى سالا قىزمەتكەرلەرىنىڭ جالاقىسى مەن الەۋمەتتىك قولداۋ دەڭگەيىنىڭ تومەندىگى, سونداي-اق كادرلاردىڭ جەتىسپەۋشىلىگى تەرىس اسەر ەتەدى», دەدى و.بۋلاۆكينا.
ورمان شارۋاشىلىعى جانە جانۋارلار دۇنيەسى كوميتەتىنىڭ وكىلى ءوز كەزەگىندە بۇل ماسەلەنى شەشۋ ماقساتىندا ەكولوگيا مينيسترلىگى ورمان شارۋاشىلىعى قىزمەتكەرلەرىنىڭ سالالىق كاسىپوداعىمەن بىرلەسىپ, بيۋدجەت قارجىسى مەن اقىلى قىزمەتتەردى ۇنەمدەۋ ەسەبىنەن تابيعاتتى قورعاۋ ۇيىمدارىنىڭ شتاتتان تىس جۇمىسشىلارى مەن شتاتقا كىرەتىن اكىمشىلىك قىزمەتشىلەردىڭ جالاقىسىن ۇلعايتۋ مۇمكىندىگىن كوزدەيتىن كەلىسىم جاساسقانىن اتاپ ءوتتى.
