سونداي-اق تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى وبلىستىق اكىمدىكتەردىڭ سۇرانىسىنا ساي تاسقىن سۋ باسقان وڭىرلەرگە 48 «Starlink» تەرمينالىن جىبەردى. دالىرەك ايتقاندا, قوستاناي وبلىسىنا – 30, اقتوبە وبلىسىنا – 3, باتىس قازاقستان وبلىسىنا – 3, ۇلىتاۋ وبلىسىنا –1, اتىراۋ وبلىسىنا – 6, شىعىس قازاقستان وبلىسىنا –2, سولتۇستىك قازاقستان وبلىسىنا – 3 تەرمينال بەرىلدى. بۇل الدىمەن ۇزدىكسىز وقۋ ۇدەرىسىن قامتاماسىز ەتۋ ءۇشىن سول وڭىردەگى مەكتەپتەرگە جەتكىزىلەدى. سونىمەن قاتار وسى اپتادا رەسپۋبليكا كولەمىندە ءبىر ۋاقىتتا قوسىلۋعا قوسىمشا تەرمينال كەشەنىن جىبەرۋ جوسپارلانىپ وتىر.
قازىرگى تاڭدا 447 اۋىل مەكتەبى «Starlink» تەحنولوگياسىن قولدانىپ, عالامتورمەن قامتىلدى. تەرمينالدى ورناتقاننان كەيىن مەكتەپتەردەگى ينتەرنەتتىڭ ورتاشا جىلدامدىعى 200 مبيت/س جەتەدى. بۇدان باسقا ۇيالى بايلانىس وپەراتورلارى تاسقىن شايعان ايماقتاعى ابونەنتتەردىڭ تاريفتىك جوسپارىنا قوسىمشا رەسۋرستار (40-50 مين, 40-50 سمس جانە 7 كۇنگە 8-10 گب) قوستى. مينيسترلىك جەدەل, ۇزدىكسىز بايلانىستى ۇيىمداستىرۋ ءۇشىن اقتوبە وبلىسىنىڭ اكىمدىگىنە «Thuraya» (2 دانا) سپۋتنيكتىك تەلەفونىن پايدالانۋعا بەردى.
ال «Astana Hub» سۋ تاسقىنىن باسقارۋ بويىنشا 30-دان اسا يننوۆاتسيالىق شەشىمدى جيناپ, ولاردى قاراۋ ءۇشىن توتەنشە جاعدايلار مينيسترلىگىنە تاپسىردى.
امەريكالىق ستارتاپ «ARC Drones» نەگىزىن قالاعان الىبەك ەلتاي مەن اسەل تۇرسىن ەلىمىزدەگى سۋ تاسقىنىنا قارسى كومەك كورسەتۋگە اۆتونومدى دروندارىن ۇسىندى. تەحنوپاركپەن سەرىكتەستىك اياسىندا 3 ۇشقىشسىز ۇشاتىن اپپاراتتار مەديتسينالىق, گۋمانيتارلىق جانە باسقا دا قاجەتتى زاتتاردى شالعاي وڭىرلەرگە جەتكىزەدى.
