جارىستىڭ العاشقى كۇنى ەرجەت جارىلقاسىن قازاق جانكۇيەرلەرىن قۋانتتى. 63 كگ سالماق دارەجەسىندە سايىسقا تۇسكەن 23 جاستاعى جامبىلدىق بالۋان وسىدان ەكى جىل بۇرىن بىشكەكتە ۇيىمداستىرىلعان جاستاردىڭ ازيا بىرىنشىلىگىندە قولا مەدالدى موينىنا ىلگەن ەدى. قانداسىمىزدىڭ ودان باسقا اۋىز تولتىرىپ ايتارلىقتاي تابىسى جوق. ەسەسىنە وسى جولى ەرجەت ەرلەدى. الاتاۋدىڭ بوكتەرىندە قازاق جىگىتى جارىلقاسىن دوكۋنگ يۋنگ (وڭتۇستىك كورەيا), رايان حاۆساۆي (ساۋد ارابياسى), چان كيم (سولتۇستىك كورەيا) جانە اياتا سۋزۋكيگە (جاپونيا) سان سوقتىرىپ, سارى قۇرلىقتىڭ تەڭدەسسىزى دەپ تانىلدى.
باستاپقى باسەكەلەردە لي سەۋنگۆان (وڭتۇستىك كورەيا) مەن راحيمجون وزوكوۆتىڭ (وزبەكستان) اياعىن كوكتەن كەلتىرگەن نۇرسۇلتان تۇرسىنوۆتىڭ شەشۋشى تۇستا يراننىڭ مىقتىسى ناسسەر اليزادەگە ءالى جەتپەدى. وسىلايشا, ول 87 كگ سالماقتا سىنعا تۇسكەن سايىپقىراندار اراسىندا كۇمىس مەدالدى قاناعات تۇتتى. بۇل – تۇرسىنوۆتىڭ ازيا چەمپيوناتىندا بەسىنشى رەت جەڭىس تۇعىرىنا كوتەرىلۋى. ەستەرىڭىزگە سالا كەتەيىك, 2014 جىلى نۇرسۇلتان باس جۇلدەنى ولجالاسا, 2015 پەن 2023 جىلدارى كۇمىسپەن كۇپتەلدى. ال 2022 جىلى قولاعا قول سوزدى.
بىلتىر استانادا ۇيىمداستىرىلعان ازيا چەمپيوناتىندا ەلىمىزدىڭ «كلاسسيكتەرى» اراسىنان جالعىز يبراگيم ماگومادوۆ قانا التىن تۇعىرعا كوتەرىلگەن ەدى. ول كەزدە وتانداسىمىز 72 كگ سالماقتا ونەر كورسەتتى. بيىل ول وليمپيادالىق سالماققا اۋىستى. يبراگيمنىڭ بىشكەكتەگى ونەرى وتە جاقسى اسەر قالدىردى. جارتىلاي فينالدا 34 جاستاعى ساقا سپورتشىنىڭ جولى توكيو وليمپياداسىنىڭ كۇمىس جۇلدەگەرى, الەمنىڭ ەكى جانە ازيانىڭ ءۇش دۇركىن چەمپيونى, ازيا ويىندارىنىڭ جەڭىمپازى اقجول ماحمۇدوۆپەن قيىستى. ەكەۋى ابدەن تىرەستى. ءبىراز ۋاقىت بويى ماگومادوۆ 3:1 ەسەبىمەن الدا كەلە جاتتى. بىراق اتاعى الىسقا جايىلعان قىرعىز بالۋانىنىڭ ىعىنا جىعىلعان تورەشى باسەكەنىڭ اياقتالۋىنا نەبارى 20 سەكۋند قالعاندا يبراگيمدى تورتتاعانعا قويدى. سول مەزەتتە اقجول تارازى باسىن تەڭسەلتىپ كەتتى. ودان كەيىن قاراعاندى كۇرەس مەكتەبىنىڭ تۇلەگى قولا مەدال ءۇشىن تارتىستا يراندىق ءامىر ءالي ابديدەن ايلاسىن اسىرىپ, جەڭىس تۇعىرىنا كوتەرىلدى. ال نۇرزات قابدىراقىموۆ (55 كگ), ەۆگەني پوليۆادوۆ (82 كگ) جانە مانسۇر شادۋكاەۆ (130 كگ) ءۇشىن اتالعان جارىس ءساتسىز اياقتالدى. بۇل بالۋانداردىڭ بويىنان جەڭىسكە دەگەن جىگەر مەن قۇلشىنىستى بايقاي المادىق.
جارىستىڭ سوڭعى كۇنى جەرلەستەرىمىزدىڭ اراسىنان يۋسۋف ماتسيەۆتىڭ عانا فينالعا شىعۋعا كۇش-جىگەرى جەتتى. 97 كگ سالماق دارەجەسىندە كۇرەسكەن قوستانايدىڭ كوكجالى امانگەلدى اعامامەدوۆ (تۇرىكمەنستان), بەكسۇلتان ماحمۇدوۆ (قىرعىزستان) جانە حوۋجي حاونى (قىتاي) جولىنان ىعىستىرىپ, فينالدا وليمپيا ويىندارىنىڭ كۇمىس جۇلدەگەرى, الەم جانە ازيا چەمپيونى موحاممادحادي ساراۆيمەن (يران) ارپالىستى. بۇل باسەكە پارسى پەحلەۆانىنىڭ پايداسىنا شەشىلدى. عالىم قابدۋناساروۆ (60 كگ), الماتبەك امانبەك (63 كگ) جانە ءادىلحان ساتاەۆ (72 كگ) ءۇشىنشى ورىن ءۇشىن تالاستى. ۇشەۋى دە شەشۋشى تۇستا وڭباي ءسۇرىندى. عالىم الەم مەن ازيا بىرىنشىلىگىنىڭ قولا جۇلدەگەرى تساوگ ليگو (قىتاي), الماتبەك بىلتىر ازيا ويىندارى مەن قۇرلىق چەمپيوناتىندا ۇزدىك ۇشتىكتىڭ قاتارىنان كورىنگەن چۋنگ حان چجەن (وڭتۇستىك كورەيا) جانە ءادىلحان دجي لەنگتىڭ (قىتاي) الدىندا دارمەنسىزدىك تانىتتى.
جۇلدەلەردىڭ سانى مەن ساپاسى جاعىنان جالپىكوماندالىق ەسەپتە يران قۇراماسى (4+3+2) كوش باستادى. ەكىنشى ورىندا – جاپونيا (3+2+1). ءۇشىنشى جانە ءتورتىنشى ساتىلارعا قىرعىزستان (1+2+3) مەن قازاقستان (1+2+1) جايعاستى. سونداي-اق جۇلدە العاندار قاتارىندا سولتۇستىك كورەيا (1+0+1), وڭتۇستىك كورەيا (0+1+2), قىتاي (0+0+5), وزبەكستان (0+0+4) جانە يراكتىڭ (0+0+1) سپورتشىلارى بار.
ەندى سارى قۇرلىقتىڭ ەڭ ۇزدىك بالۋاندارى 19–21 ءساۋىر ارالىعىندا ءدال سول بىشكەكتە وتەتىن ليتسەنزيالىق تۋرنيردە كۇش سىناسادى. پاريجدە الاۋى تۇتاناتىن وليمپيا ويىندارىنىڭ جۇلدەلەرى ساراپقا سالىناتىن جارىستا قازاق ەلى نامىسىن مىنا بالۋاندار قورعايدى:
گرەك-ريم كۇرەسى: ايدوس سۇلتانعالي (60 كگ), مەيىرجان شەرماحانبەت (67 كگ), دەمەۋ جادىراەۆ (77 كگ), ولجاس سىرلىباي (97 كگ) جانە ءالىمحان سىزدىقوۆ (130 كگ).
ەركىن كۇرەس: ەراسىل مۇحتار ۇلى (57 كگ), مايىس اليەۆ (65 كگ), نۇرقوجا قايپانوۆ (74 كگ), الىشەر ەرعالي (97 كگ) جانە يۋسۋپ باتىرمۇرزاەۆ (125 كگ).
ايەلدەر كۇرەسى: لاۋرا عانيقىزى (50 كگ), جۇلدىز ەشىموۆا (53 كگ), ەمما تيسينا (57 كگ), يرينا كۋزنەتسوۆا (62 كگ), ەلەنا شالىگينا (68 كگ) جانە ءجاميلا باقبەرگەنوۆا (76 كگ).
