قور قىزمەتكەرلەرى گۋمانيتارلىق كومەك پەن قاراجات جيناپ, وڭىرلەردە اۆاريالىق-قۇتقارۋ جۇمىستارىنا, زاقىم كەلگەن نىساندار مەن تۇرعىن ۇيلەردىڭ ينفراقۇرىلىمىن جوندەۋگە بەلسەندى كومەكتەسىپ جاتىر.
«قورعا قاراستى اۆياكومپانيالاردا بيلەتتەردىڭ قۇنىن تومەندەتۋ ءۇشىن ارنايى تاريف ەنگىزىلدى. بۇل تاسقىن سۋعا تاپ بولعان وڭىرلەردەن زارداپ شەككەندەردى قاۋىپسىز جەرلەرگە شىعارۋعا مۇمكىندىك بەرەدى. ول ءۇشىن «ەير استانا» كومپانياسى 33 قوسىمشا رەيس جانە «Qazaq Air» كومپانياسى 2 قوسىمشا رەيس ۇيىمداستىردى», دەدى «سامۇرىق-قازىنا» اق باسقارما توراعاسى نۇرلان جاقىپوۆ.
ايتا كەتەيىك, اۆياكومپانيالار سۇرانىستىڭ ارتۋىنا قاراماستان تاريفتەردىڭ قۇنىن كوتەرگەن جوق, كەرىسىنشە, 13-24 ءساۋىر ارالىعىندا اتىراۋدان ۇشاتىن تىكەلەي رەيستەرگە ارنايى تاريف ەنگىزىلدى. «ەير استانا» جانە FlyArystan اۋەكومپانيالارىنىڭ ءبىر بيلەتى (ەكونوم) 40 مىڭ تەڭگەنى قۇرايدى. Qazaq Air كومپانياسىندا 24 ساۋىرگە دەيىن سۋ تاسقىنىنا تاپ بولعان وڭىرلەر ءۇشىن بارلىق باعىت بويىنشا اۆيابيلەتتەردىڭ قۇنى 40 مىڭ تەڭگەدەن اسىرىلمايدى.
«ەير استانا» جانە FlyArystan سۋ تاسقىنى باستالعالى بەرى 60 توننادان استام گۋمانيتارلىق جۇكتى تەگىن جەتكىزدى.
سونىمەن قاتار تابيعي اپاتپەن كۇرەسۋ ءۇشىن قور قاجەتتى تەحنيكالار مەن ادام كۇشىن ۇسىندى. كومپانيالار توبىنان 25 مىڭنان استام ادام سۋ تاسقىنىمەن كۇرەس جۇمىستارىنا جۇمىلدىرىلىپ, 865 بىرلىك تەحنيكا جانە 414 توننا ججم ءبولىندى.
شتاتتان تىس جاعدايلارعا جەدەل ارەكەت ەتۋ ءۇشىن 45 شايىپ كەتۋگە قارسى جانە 47 ءورت ءسوندىرۋ پويىزدارى ۇيىمداستىرىلدى. «قتج» ۇك» اق قازاقستاننىڭ باسقا وڭىرلەرىنەن سۋ باسۋ ايماقتارىنا قاجەتتى تەحنيكالاردى جەدەل جەتكىزۋ ءۇشىن ارنايى ۆاگوندار ءبولدى.
بۇل رەتتە تەمىرجول ترانسپورتى ارقىلى جالپى سانى 22 مىڭعا جۋىق ادام تاسىمالداندى, ونىڭ ىشىندە 12 مىڭ ادام قتج ەسەبىنەن تەگىن جەتكىزىلدى. تاسقىن كەزىندە تەمىرجول بيلەتتەرىنىڭ قۇنى كوتەرىلگەن جوق جانە سول دەڭگەيىندە قالعانىن اتاپ وتكەن ءجون.
ماسەلەن, ورال – قىزىلوردا جانە اتىراۋ – الماتى باعىتتارى بويىنشا كۋپە ۆاگوندارىنا بيلەت قۇنى – 13 915 تەڭگە, پلاتسكارت – 9 216 تەڭگە. «اتىراۋ – استانا» باعىتتارىنداعى كۋپە بيلەتىنىڭ قۇنى - 18 114 تەڭگە, پلاتسكارت - 11 898 تەڭگە.
