سۋرەتتى تۇسىرگەن – ارمان مۋحوتوۆ
بيىل بايقاۋدىڭ رەسپۋبليكالىق كەزەڭىنە قاتىسۋعا مىڭداعان ۇمىتكەر ءوتىنىش قالدىرىپ, «اسار», «تۋعان جەر», «باتىل جۇرەك», «مەيىرىم جولىندا», «قايىرىمدىلىق تاريحى» سىندى بەس اتالىم بويىنشا ءوڭىر-وڭىردەن كەلگەن 46 لاۋرەات ماراپاتتالعان. اقپاندا وتكەن وسى بايقاۋعا ەلوردادان 62 ۇمىتكەر قاتىسىپتى. رەسپۋبليكالىق بايقاۋدىڭ ىزىمەن قازىر ءار ءوڭىر وزىنشە قايىرىمدى جاندارعا قۇرمەت كورسەتىپ, العىس ايتۋدى باستاپ كەتتى. مىسالى, بايقاۋدىڭ استانا قالاسىنداعى لاۋرەاتتارىن ماراپاتتاۋ سالتاناتىن وتكىزۋگە قازاقستان ىسكەر ايەلدەر قاۋىمداستىعىمەن قاتار قالالىق اكىمدىك ىنتالى بولىپتى.
– قوعامنىڭ تۇتاستىعىن, ەلدىڭ اماندىعىن ويلايتىن ىزگى نيەتتى جاندار كوپ. سول جاقسى-جايساڭدارعا العىسىمىز شەكسىز. قيىن-قىستاۋ كۇندەردە سۇرىنگەنگە دەمەۋ بولىپ, جەتىمىن جىلاتپاعان حالىقپىز. سول قالپىمىزدان تانباي, قىسىلتاياڭدا بىرىمىزگە-ءبىرىمىز دەمەۋ بولىپ كەلەمىز. توسىننان كەلگەن تاسقىنعا وڭىرلەردەن مىڭداعان ەرىكتى, اسكەريلەر تاس-ءتۇيىن جۇمىلىپ, تۇرعىندارعا جاردەمدەسىپ جاتىر. گۋمانيتارلىق كومەك جونەلتىپ جاتقاندار قانشاما؟ مۇنىڭ بارلىعى – قايىرىمدى, مەيىربان, جاناشىر, وتانسۇيگىش ازاماتتاردىڭ قولىنان كەلەتىن ءىس. ءيا, قايىرىمدى جاندار كوبىنە-كوپ بايقاۋعا ءوتىنىشتى وزدەرى قالدىرمايدى. ارىپتەستەرى, دوسجاراندارى بىزگە حابارلاپ جاتادى. ءبىز سول ءوتىنىشتى قابىلداپ, شىن جاناشىر جانداردى نازاردان تىس قالدىرماۋعا تىرىسامىز. ويتكەنى مۇنىڭ بارلىعى كەيىنگى تولقىن جاس بۋىنعا ۇلگى-ونەگە دەپ بىلەمىز, – دەيدى قازاقستان ىسكەر ايەلدەر قاۋىمداستىعىنىڭ توراعاسى راۋشان سارسەمباەۆا.
سونىمەن «باتىل جۇرەك» اتالىمىندا كوپپاتەرلى تۇرعىن ءۇيدىڭ 20-قاباتىنداعى قىزدى قۇتقارعان نارۇل تورەقۇل, قىزىل جالىن شارپىعان ۇيدەن بالانى امان الىپ قالعان ەسەن قارابەكوۆ ماراپاتتالدى. «اسار» اتالىمىندا كاسىپكەر, يننوۆاتور, شىعارماشىلىق ستۋديا-اتەلە جەتەكشىسى مادينا دانياروۆا ىنتالاندىرۋ سىيلىعىن الدى. سول سەكىلدى باسقا دا اتالىمدار بويىنشا ۇمىتكەرلەرگە سىي-قۇرمەت كورسەتىلدى. جاناشىر جانداردى گەنەرال-لەيتەنانت باقىتجان ەرتاەۆ قۇتتىقتاپ, العىس ايتتى.
كوپتىڭ قۇرمەتىنە بولەنگەن ازاماتتاردىڭ قاتارىنداعى استانا قالاسى توتەنشە جاعدايلار دەپارتامەنتىنىڭ ازاماتتىق قورعاۋ كاپيتانى بالنۇر شدەرينا سۋ باسقان ولكەلەرگە كومەككە اتتانعان ارىپتەستەرىن ماقتان تۇتاتىنىن ايتتى.
– قازىر توتەنشە جاعدايلاردى جويۋ باسقارماسىندا ەڭبەك ەتەمىن. سالادا جۇمىس ىستەپ جۇرگەنىمە 8 جىلدان اسىپتى. جىل سايىن رەسپۋبليكالىق وقۋ-جاتتىعۋ جيىندارىنا قاتىسامىز. شىڭدالامىز. بۇگىن دەپارتامەنتتە ەڭبەك ەتىپ جۇرگەن بىرنەشە ارىپتەسىمىز ماراپاتتالدى. بىراق ولاردىڭ باسىم كوپشىلىگى قازىر سۋ تاسقىنىنا بايلانىستى قوستاناي, اقتوبە, اتىراۋ وبلىستارىندا ساپاردا. توتەنشە جاعداي جاريالانعان اۋماقتاردا جۇمىسىن ابىرويمەن اتقارىپ ءجۇر, – دەپ ارىپتەستەرىنە تابىس تىلەدى ب.شدەرينا.
«مەيىرىم جولىندا» اتالىمىندا ماراپاتتالعان سپورت جاناشىرى ساۋلە تاسبولاتقىزى قور اشىپ, سپورتتان الىستاعان وعلاندارعا قولدان كەلگەن كومەگىن كورسەتىپ جۇرگەن جايى بار. ءيا, ءدۇبىرلى دودالاردا جاسىنداي جارقىراپ, كوپتىڭ الدىندا جۇرگەن سپورتشىلاردىڭ ىشىندە كاسىبي مانسابىن اياقتاعان سوڭ, قوعام نازارىنان تىس قالىپ قوياتىندار كەزىگەدى. ساۋلە تاسبولاتقىزى وسىنداي سپورتشىلاردى قولداپ, جىگەرلەندىرۋگە تىرىسىپ باعادى. ۇيىمداستىرۋشىلار «مەيىرىمدىلىك كەرۋەنى» بايقاۋىنا قاتىسقان جاناشىر جاننىڭ بارلىعى قۇرمەت-قوشەمەتكە لايىق ەكەنىن ەسكە سالىپ, العىس ايتتى.
