مۇنايلى قالادا اشىق فۋتبولدان العاش رەت وتكەن جارىستا, ياعني QFL ءبىرىنشى ليگاسى اياسىندا وتكەن ويىندا اقتاۋلىق «كاسپي» فۋتبول كلۋبى وسكەمەندىك «التاي» كومانداسىن قابىلدادى. جاڭاوزەن قالاسىنداعى ءامين تۇياقوۆ اتىنداعى ستاديون جانكۇيەرلەرگە لىق تولىپ, جيىلعان مىڭداعان جانكۇيەر جەرلەستەرىنە زور قولداۋ كورسەتتى. جانكۇيەرلەردىڭ ىستىق ىقىلاسى تەككە كەتكەن جوق, ويىن ناتيجەسىندە «كاسپي» 4:1 ەسەبىمەن جەڭىسكە جەتتى.
– ءبىرىنشى ليگاعا دايىندىقتى اقپان ايىنان باستاعان ەدىك. بۇل – «كاسپي» كلۋبىنىڭ جىل باسىنان بەرى ەكىنشى ويىنى. العاشقى ويىن ارىس قالاسىندا ءوتىپ, جەڭىسپەن ورالعانبىز. ءدال سول ناتيجەنى بۇگىن كورسەتتىك, – دەيدى «كاسپي» فۋتبول كلۋبىنىڭ باسشىسى نۇرجان جالعاسباەۆ.
ويىن سوڭىندا ەكى كوماندانىڭ وكىلدەرى ءباسپاسوز كونفەرەنتسياسىنا قاتىسىپ, بۇگىنگى ليگا تۋرالى پىكىرىن ءبولىستى. الداعى ۋاقىتتا «كاسپي» فۋتبول كلۋبىنىڭ ءوز جەرىمىزدە بولاتىن جارىستارىنىڭ بارلىعى جاڭاوزەندە وتەدى, سونداي-اق قالادا ۇلكەن فۋتبول وينىنىڭ وتۋىنە قولداۋ كورسەتكەن قالا اكىمى جانسەيىت قاينارباەۆ جاڭاوزەندە «كاسپي» فۋتبول ورتالىعى بولىمشەسىن اشۋدى قولدايتىنىن جەتكىزدى.
– 32 جىلدان كەيىن قالامىزعا ۇلكەن فۋتبول قايتا ورالدى. مەن وسىنداي جوعارى دەڭگەيدەگى جارىسقا العاش رەت كەلىپ تۇرمىن. وتە قاتتى ۇناپ جاتىر. اتموسفەراسى تىم بولەك. «كاسپي» فۋتبول كلۋبىنىڭ جانكۇيەرىمىن. مەنىڭ جانىمدا دوستارىم دا بار. بارلىعىمىز اقتاۋلىق كومانداعا سەنەمىز. «كاسپي», العا! سپورتشىلارىمىز جاقسى ويىن كورسەتىپ جاتىر. ءارى قاراي دا ۇلكەن جەڭىستەر كۇتەمىز. بۇگىنگىدەي جارىستار جاڭاوزەندە كوبەيسە, جانكۇيەر رەتىندە قۋانامىز, – دەيدى جانكۇيەر ەرنار نۇرلان ۇلى.
مۇنايلى قالا الاڭىندا فۋتبول تاماشالاعان جاڭاوزەندىك جانكۇيەرلەردىڭ قۋانىشىندا شەك بولمادى. جاستاردىڭ قىزىعۋشىلىعىن ارتتىرىپ, بوس ۋاقىتىن ماڭىزدى وتكىزۋى ءۇشىن بۇقارالىق سيپاتقا يە فۋتبول سىندى سپورت ويىندارىن, سايىستارىن وتكىزۋدىڭ ماڭىزى زور.
ماڭعىستاۋ وبلىسى
