فوتو: تجم
ەراسىل سايپاشتىڭ ايتۋىنشا, جاپپاي جۇمىلدىرىلعان كۇشتەر مەن تەحنيكالىق قۇرالداردىڭ كومەگىمەن 9,7 ميلليون تەكشە مەتردەن استام ەرىگەن سۋ سورىلعان. تاسقىنعا توسقىن ماقساتىندا 2,4 ميلليون قاپ پەن 1,2 ميلليون توننا ينەرتتى ماتەريال توسەلدى.
«وسى ۋاقىتقا دەيىن 13 543 ادام ۇيلەرىنە ورالدى. ەۆاكۋاتسيا پۋنكتتەرىندە 7 014 ادام, ونىڭ ىشىندە 3 144 بالا جاتىر. سۋ تاسقىنى باستالعالى باس-اياعى 113 693 ادام, ونىڭ ىشىندە 39 922 بالا قۇتقارىلىپ, ەۆاكۋاتسيالاندى. 107 613 اۋىل شارۋاشىلىعىنان 3570 باس جانۋار قاۋىپسىز جەرگە كوشىرىلدى. 2195 تۇرعىن ءۇيدىڭ اۋلاسىنا كىرگەن سۋ باسقا باعىتقا بۇرىلدى», دەدى ەراسىل سايپاش.
پاۆلودارلىق قۇتقارۋشىلار سولتۇستىك قازاقستان وبلىسىندا قارعىن سۋمەن كۇرەسىپ جاتىر. اتاپ ايتقاندا, پاۆلودار وبلىسى تجد كۇشتەرى مەن قۇرالدارى تۇرعىنداردى, ءۇي جانۋارلارىن, باسقا دا قاجەتتى زاتتاردى ەۆاكۋاتسيالاۋمەن اينالىسىپ, سۋ باسقان اۋداندارعا ازىق-ت ۇلىك جەتكىزۋ بويىنشا جۇمىس اتقاردى. قۇتقارۋشىلار ساياجاي ۋچاسكەلەرىن ارالاپ, جەرگىلىكتى تۇرعىنداردى ەۆاكۋاتسيالاۋ تۋرالى حاباردار ەتىپ جاتىر. ەۆاكۋاتسيا كەزىندە ەرتىس ءوڭىرىنىڭ اپاتتار مەديتسيناسى ورتالىعىنىڭ قىزمەتكەرلەرى زارەچنىي كەنتى مەن پەتروپاۆل قالاسىنىڭ 9 تۇرعىنىن تەكسەردى. جۇمىستار تاۋلىك بويى اتقارىلىپ جاتىر.
قازىرگى ۋاقىتتا اقتوبە, قوستاناي, اقمولا, اتىراۋ جانە سولتۇستىك قازاقستان وبلىستارىندا 5708 جەكە تۇرعىن ءۇيدى, 1609 اۋلا اۋماقتارىن جانە 2035 ساياجايدى سۋ باسقان. اۆاريالىق-قۇتقارۋ جانە سۋ تاسقىنىن جويۋ جۇمىستارىنا 34 مىڭ ادام, 4242 تەحنيكا, ونىڭ ىشىندە 890 سۋ سورۋ تەحنيكاسى, 335 سۋ كولىگى, 19 ۇشاق جۇمىلدىرىلعان.
اقمولا وبلىسى ساندىقتاۋ اۋدانىنداعى سۋ تاسقىنى جاعدايى:
سارقىراما وزەنىنىڭ ارناسىنان اسۋىنا بايلانىستى ساندىقتاۋ اۋدانى كامەنكا اۋىلىنان الدىن الا 80 ادام ءوز كۇشتەرىمەن قاۋىپسىز ايماققا كوشىپ, بارلىعى تۋىستارىنىڭ ۇيىنە ورنالاستى.
قۇتقارۋشىلار 100-دەن استام مالدى ەۆاكۋاتسيالادى. جاو جانە تجم كۇشتەرىمەن وزەن دەڭگەيىن باقىلاۋ جۇمىستارى جۇرگىزىلىپ جاتىر.
