رەسمي اقپاراتقا سۇيەنسەك, باستاپقىدا جەتى اۋلاعا جانە مۇحتار اۋەزوۆ اتىنداعى مەكتەپ اۋلاسىنا سۋ كىرگەنى انىقتالعان. ال سوڭعى مالىمەتكە جۇگىنسەك, وتىزدان استام اۋلاعا سۋ كىرگەن. ءوڭىر باسشىسى ەربول قاراشوكەەۆ باستاپ, توتەنشە جاعدايلار دەپارتەمەنتىنىڭ ماماندارى قوشتاپ, دەر كەزىندە وقيعا ورنىنا جەتكەن.
كۇن ۇزاققا تولاسسىز جاۋعان نوسەر جاڭبىر سالدارىنان كەلگەن كولبەۋ سۋ اعىنىنىڭ بەتىن قايتارۋ جۇمىستارى دەر كەزىندە قولعا الىنعان.
«15 ءساۋىر كۇنى كەشكى ساعات 20.30-دا تولاسسىز جاۋعان نوسەر سالدارىنان جينالعان سۋ جاسوركەن اۋىلىنا جەتكەن. نەگىزى 40 سانتيمەترگە دەيىن جەتكەن. اۋىل بويىنشا 30 اۋلاعا سۋ كىرگەن. ونىڭ ىشىندە ءۇي ىشىنە سۋ كىرگەن ءبىر عانا ءۇي بولدى. زارداپ شەككەندەر جوق. توتەنشە جاعداي دەپارتامەنتى مەن پوليتسيا دەپارتامەنتىنىڭ وكىلدەرى دەر كەزىندە اۋىلعا كەلگەن. اۋىلدىق اكىمدىك قىزمەتكەرلەرى دە ۋاقتىلى جۇمىسقا جۇمىلدىرىلعان. جالپى سانى 300-دەن استام مامان جۇمىسقا كىرىسكەن. 22 موتوپومپا, 60-قا جۋىق بىرلىك تەحنيكا جۇمىس ىستەپ جاتىر. سۋ قويمالارى شتاتتىق رەجىمدە جۇمىس ىستەپ تۇر. شۋ, تالاس وزەندەرىندەگى سۋ دەڭگەيى تۇراقتى باقىلاۋعا الىندى. ەشقانداي قاۋىپ جوق», دەيدى ءوڭىر باسشىسى ە قاراشوكەەۆ.
سوڭعى دەرەككە سەنسەك, بيىكتىگى باستاپقىدا 40 سانتيمەترگە جەتكەن سۋ دەڭگەيى قازىر 10 سانتيمەترگە دەيىن تۇسكەن. سۋ باسقان اۋلالاردى تازارتۋ ماقساتىندا ماماندار موتوپومپالارمەن ۇزدىكسىز جۇمىس ىستەپ جاتىر.
