فوتو: azh.kz
وبلىس اكىمىنىڭ ورىنباسارى جاسۇلان بيسەمبيەۆتىڭ ايتۋىنشا, يندەر, ماحامبەت اۋداندارى مەن اتىراۋ قالاسىنىڭ ماڭىنداعى بەرەكە, المالى, بەسىكتى اۋىلدارىن تاسقىن سۋ باسۋ قاۋپى ءتونۋى مۇمكىن. سول سەبەپتەن باستاپقىدا جايىق وزەنىنىڭ مۇنايلى شاھارداعى 105 شاقىرىم جاعالاۋىنا بوگەتى سالۋ كوزدەلگەن. كەيىن بوگەتتىڭ ۇزىندىعى 215,1 شاقىرىمعا ۇلعايعان. ماسەلەن, 13 ساۋىرگە دەيىن 101,2 شاقىرىم بوگەتى سالىندى. اتىراۋ قالاسىنداعى بۇل جۇمىسقا مەكەمەلەردىڭ 3,2 مىڭ قىزمەتكەرى, 3,5 مىڭنان اسا ەرىكتى, 1 مىڭعا جۋىق ارنايى تەحنيكا تارتىلدى.
«باستى ماقساتىمىز – تاسقىن سۋدىڭ ەلدى مەكەندەرگە كىرۋىنە جول بەرمەۋ. دەگەنمەن اتىراۋ قالاسىنىڭ سولتۇستىگىندەگى ەلدى مەكەندەرگە سۋ باسۋ قاۋپى بار. سوندىقتان وسىنداي اۋىلداردىڭ ماڭىندا ەكىقاتارلى قورعاۋ بوگەتى سالىنىپ جاتىر», دەپ ءمالىم ەتتى ج.بيسەمبيەۆ.
بوگەت تەك جايىق وزەنىنىڭ جاعالاۋىندا سالىنىپ جاتقان جوق. ماسەلەن, قاراوزەك كانالىنىڭ جاعالاۋىن بەكىتۋدى جەرگىلىكتى ءتورت كومپانيا قولعا الدى. اتىراۋ – ورال تاسجولىنان باستالىپ, ەركىنقالا اۋىلدىق وكرۋگىنە دەيىن سوزىلاتىن بوگەتتىڭ ۇزىندىعى 35 شاقىرىمنان اسادى. بوگەتتىڭ بيىكتىگى 2 مەترگە كوتەرىلەدى. ارينە, وڭاي جۇمىس ەمەس. سول سەبەپتەن وعان ءتورت كومپانيادان 350 ادام, 80-گە جۋىق جەرگىلىكتى تۇرعىن مەن ەرىكتى, 70-تەن اسا ارنايى تەحنيكا تارتىلدى.
بوگەت سالۋشىلار اراسىندا ءار بۋىننىڭ وكىلدەرى مەن اسكەريلەر بار. ءتىپتى كىشكەنتاي بالالارعا دەيىن كومەكتەسىپ ءجۇر. سونداي بالالار تۋرالى ۆيدەو الەۋمەتتىك جەلىدە تارادى. ۆيدەودا 5 جاسار الديار كۇرەكپەن قاپقا توپىراق سالىپ تۇر. ال 9 جاستاعى ءامينا قاپتى اشىپ وتىر. ولاردىڭ جانىندا تاعى بىرنەشە بالا ءجۇر. ءبارى دە اتىراۋ قالاسىنداعى «اۆانگارد» شاعىن اۋدانىندا تۇرادى. «تاسقىن سۋ كەلمەسە ەكەن», دەيدى بالالار.
اتىراۋعا كومەككە كەلگەندەردىڭ سانىندا شەك جوق. بۇل ءۇردىس الەۋمەتتىك جەلىدە تاريح بولىپ قاتتالىپ جاتقان دا شىعار. ماسەلەن, «Nomad» كومانداسىنىڭ كاسكادەرلەرى شاھار ماڭىنداعى اۋىلدىڭ جاعالاۋىن بەكىتىپ ءجۇر.
«تاۋ بوپ ۇيىلگەن توپىراقتى ەندى عانا قاپتاپ بولا بەرگەن ەدىك, تاعى ءبىر «كاماز» توپىراق توگىپ كەتتى. ءبىز قاپتاردى جاعاعا توسەپ ءجۇرمىز. كاسكادەرلەر بارىن سالىپ جاتىر», دەيدى اكتەر سانجار ءمادي.
اتىراۋ وبلىسى
