«قازىر ەلىمىزدەگى سۋ تاسقىنىمەن كۇرەس قارقىندى ءجۇرىپ جاتىر جانە ونىڭ قاۋپى ءالى باسەڭدەگەن جوق. قارعىن سۋمەن كۇرەسكە قولداعى بارلىق كۇش پەن رەزەرۆ, ادام رەسۋرسى مەن قاجەتتى تەحنيكالار تۇگەل جۇمىلدىرىلدى. سۋ باسقان وڭىرلەردىڭ تۇرعىندارى, ولارمەن بىرگە 20 مىڭنان استام ۆولونتەر مەملەكەتتىك ورگاندارمەن بىرىگىپ جۇمىس ىستەپ جاتىر. وتانداستارىمىز اۋىزبىرلىك پەن جاناشىرلىق تانىتىپ, جۇدىرىقتاي جۇمىلدى. ءوز كاسىبىنە ادال توتەنشە جاعداي قىزمەتكەرلەرى, اسكەري قىزمەتشىلەر, ىشكى ىستەر قىزمەتكەرلەرى مەن مەملەكەتتىك قىزمەتشىلەر تاۋلىك بويى جۇمىس ىستەپ جاتىر. قازىر ءاربىر ادام, ءاربىر تەحنيكا مەن ەڭبەك كۇشى وتە ماڭىزدى. كوپ رەسۋرستى قاجەت ەتەتىن وسى ءبىر قيىن ساتتە ءبىز اقپارات تاراتۋدا ءدال وسىنداي جۇيەلى تۇردە قيمىلداپ, ۇلكەن جاۋاپكەرشىلىك تانىتۋىمىز قاجەت», دەدى مينيستر.
ايدا بالاەۆانىڭ ايتۋىنشا, اقپارات سالاسىنا جۇرگىزىلگەن مونيتورينگ بارىسىندا جالعان اقپارات دەڭگەيىندەگى 29 فاكت انىقتالعان. ول حابارلامالاردىڭ بارلىعىنا ۋاكىلەتتى ورگاندار تاراپىنان ءتيىستى تەكسەرۋ جۇرگىزىلىپ, شىنايى ەمەس ەكەنى بەلگىلى بولىپ وتىر. «جالعان اقپاراتتار كوبىنە مەسسەندجەرلەر ارقىلى تارالادى. ەڭ كوپ تاراعان اقپاراتتار قاتارىنا بوگەتتەردىڭ بۇزىلۋى, رەسپۋبليكالىق ماڭىزى بار جولداردى سۋ باسۋى, سۋ قويمالارىنداعى, ەلەكتر ستانسالارىنداعى جانە باسقا دا ستراتەگيالىق وبەكتىلەردەگى اپاتتار, اۋىز سۋدىڭ لاستانۋى, ەۆاكۋاتسيالاۋ ورىندارى, قاراجات جيناۋ جانە تولەۋ تۋرالى جالعان مالىمەتتەر جاتادى», دەدى مينيستر.
ول اقتوبەدەگى سۋ قويماسى شليۋزدەرىن اشۋ تۋرالى الەۋمەتتىك جەلىدە جالعان اقپاراتتى كەيىن اقتوبە وبلىسىنىڭ اكىمدىگى جوققا شىعارعانىن, سونداي-اق قوستاناي وبلىسىنىڭ اكىمدىگى ب.مايلين اۋدانىنداعى ايات وزەنى ارقىلى وتەتىن كوپىردىڭ ءبىر بولىگىنىڭ قۇلاۋى, وڭىردەگى مال قورىمدارىن سۋ باسقانى تۋرالى حابارلامانى رەسمي تۇردە تەرىستەگەنىن مىسالعا كەلتىردى. وسى فاكتىلەر بويىنشا توتەنشە جاعدايلار قىزمەتكەرلەرى سول جەرلەرگە ارنايى بارعانىمەن, اقپاراتتىڭ راستالماعانىن ەرەكشە اتاپ وتكەن سالا باسشىسى باسقا جەردە شىن كومەككە مۇقتاج جاندار كۇتىپ وتىراتىنىن, ولاردىڭ اراسىندا بالالاردىڭ بار بولۋى مۇمكىن ەكەنىن ۇمىتپاۋعا شاقىردى. ونىڭ ايتۋىنشا, دەنساۋلىق ساقتاۋ مينيسترلىگى دە سۋ باسقان اۋماقتاردا جۇقپالى اۋرۋلاردىڭ ءورشۋ قاۋپى جانە ەپيدەميولوگيالىق قىزمەت تاراپىنان جاعدايدى باقىلاۋدىڭ جەتكىلىكسىزدىگى تۋرالى جالعان اقپارات تاراعانىن مالىمدەپ وتىر.
«تاسقىننان زارداپ شەككەندەرگە ارنالعان تولەمدەر تۋرالى دا ادەيى جالعان حابارلامالار تاراتۋ ۇلكەن قاۋىپ توندىرەدى. كەيىنگى كۇندەرى سۋ تاسقىنىنان زارداپ شەككەندەرگە مەملەكەت باسشىسى تاراپىنان ۋادە ەتىلەدى دەگەن ميلليونداعان دوللار تولەمدەرى, پرەمەر-مينيستر مەن ۇكىمەت مۇشەلەرىنىڭ اتىنان اقشالاي قاراجات جيناۋ تۋرالى جالعان حابارلامالار پايدا بولدى. مۇنداي اقپاراتقا سەنبەۋگە شاقىرامىن. الاياقتار سۋ تاسقىنى جاعدايىن وزدەرىنىڭ جەكە ماقساتىنا پايدالانا باستادى. تەرىس نيەتتىلەر ازاماتتاردىڭ جەكە دەرەكتەرى مەن قارجىلىق رەسۋرستارىن ۇرلاۋ ءۇشىن ينتەرنەتتە «تولەمدەر ءۇشىن جسن-ءدى تەكسەرىڭىز», «3 ميلليون تەڭگەگە دەيىن وتەماقى الۋ», «مەملەكەتتەن مۇمكىندىگىنشە تەزىرەك جاردەماقى الۋ» دەگەن سياقتى حابارلامالار جاريالايدى», دەپ اتاپ ءوتتى ايدا بالاەۆا.
مادەنيەت جانە اقپارات ءمينيسترى جارنامالارىن سەنىمدى كورسەتۋ ءۇشىن قىلمىسكەرلەر وتاندىق بانكتەر مەن مەملەكەتتىك مەكەمەلەردىڭ اتاۋىن پايدالاناتىنىن, مىسالى, Facebook, Instagram جانە Telegram جەلىلەرىندە ەڭبەك جانە حالىقتى الەۋمەتتىك قورعاۋ مينيسترلىگىنىڭ ءارتۇرلى بانكپەن بىرلەسىپ تولەيتىن تولەمدەرى تۋرالى حابارلامالار ءجيى جاريالاناتىنىن جەتكىزدى. سونداي-اق قارجى مينيسترلىگى جاڭا قاۋلى قابىلداپ, شىعىننىڭ ورنىن تولتىرىپ جاتىر ەكەن دەگەن جالعان اقپارات جۇرگەنىن ايتتى. ادامداردى جاڭىلىستىرۋ ءۇشىن الاياقتار ءار جازبانىڭ استىنا العىسسوزدەرى بار بوت پىكىرلەرىن جازادى.
«بۇل كورىنەۋ جالعان حابارلامالاردىڭ بارلىعى مەملەكەتتىك ورگاندار ارقىلى جەدەل تەرىسكە شىعارىلىپ, بارلىق فاكتى بويىنشا قۇقىق قورعاۋ ورگاندارىنا حابارلامالار جىبەرىلدى. بارلىق انىقتالعان زاڭسىز فاكتىلەرگە قۇقىقتىق باعا بەرۋ, جەدەل-ىزدەستىرۋ جانە ءىس جۇرگىزۋ ءۇشىن ماتەريالدار قۇقىق قورعاۋ ورگاندارىنا جولداندى. سوندىقتان تەك رەسمي جانە راستالعان اقپاراتقا سەنىڭىزدەر. بارلىق كۇماندى فاكتىلەردى بىرنەشە رەت تەكسەرىڭىز جانە كۇماندى حابارلامالاردى ءارى قاراي تاراتپاڭىز!», دەپ ەسكەرتتى مينيستر.
ايدا بالاەۆا بارلىق جالعان حابارلامانىڭ ماقساتى – ۇرەي تۋدىرۋ, حالىقتى جىككە ءبولۋ, مەملەكەتتىك قىزمەتشىلەر مەن ۆولونتەرلەردىڭ كەلىسىلگەن جۇمىسىن ۇيىمداستىرۋدى بۇزۋ جانە قاراپايىم حالىقتىڭ قايعى-قاسىرەتىن پايدالانىپ تەز پايدا تابۋ ەكەنىن اتاپ ءوتتى. «سونداي-اق سۋ تاسقىنى مەن زارداپ شەككەن وڭىرلەردى قالپىنا كەلتىرۋ شارالارىن وبەكتيۆتى تۇردە جاريالاپ جۇرگەن باق وكىلدەرىنە ارنايى العىسىمدى بىلدىرگىم كەلەدى» دەدى مينيستر.
