تاسقىننىڭ الدىن الۋ ماقساتىندا ۇلتتىق ۇلان 6636 اسكەري ءبولىمىنىڭ 140 اسكەري قىزمەتشىسى جانە 6 تەحنيكاسى ەرىكتىلەرمەن بىرگە جۇمىستار جۇرگىزىپ جاتىر. ءبولىم كومانديرىنىڭ ورىنباسارى, پودپولكوۆنيك تالعات قىرىقباەۆتىڭ ايتۋىنشا, ۇلاندىقتار ەلىمىزدىڭ بارلىق ايماعىندا قيىندىققا تاپ بولعان حالىققا كومەگىن اياپ جاتقان جوق. جىبەك جولى اۋىلىن قورعاۋ ماقساتىندا دا العاشقىلاردىڭ ءبىرى بولىپ كومەككە اتتانىپ وتىر.
– ءبىز تەك جىبەك جولى اۋىلىمەن شەكتەلىپ وتىرعان جوقپىز. ەلورداعا جاقىن ورنالاسقان تالاپكەر اۋىلىندا دا اسكەري ءبولىمنىڭ 140-قا جۋىق اسكەري قىزمەتشىسى سۋ تاسقىنىنىڭ الدىن الۋ شارالارى جونىندەگى جۇمىستاردى ەكى اۋىسىممەن جۇرگىزىپ جاتىر. ۇلتتىق ۇلان ءاردايىم حالىقپەن بىرگە! – دەدى ول.
جەكە قۇرام جىبەك جولى اۋىلىنداعى قاراسۋ كوشەسىندە ورنالاسقان مەكتەپتىڭ سپورت زالىنا ورنالاسىپ, تاماقتاندىرۋدى دا ۇيىمداستىرعان. ەرجان اتتى اۋىل تۇرعىنى ۇلتتىق ۇلاننىڭ اسكەري قىزمەتشىلەرىنە تۇرعىنداردىڭ اتىنان العىسىن جەتكىزدى.
– 6636 اسكەري ءبولىمنىڭ باسشىلىعى مەن ساربازدارىنا العىس ايتامىن. سۋ باسۋ قاۋپى ءبىزدىڭ جەرىمىزگە دە كەلدى. دەگەنمەن ساربازدار قولدارىنان كەلگەن كومەكتەرىن جاساپ جاتىر. «كۇشىمىز – بىرلىكتە!» دەگەن ۇراندى جالاۋ ەتكەن اسكەرىمىزگە راقمەت. وتان الدىنداعى بورىشتارىن ادال اتقارىپ, امان-ەسەن وتباسىلارىنا ورالسىن دەگەن تىلەگىمدى ايتامىن. ەلىمىزدىڭ اسپانى اشىق بولسىن, وسىنداي ساتتە اۋىزبىرشىلىگىمىز بەن ءبىر-بىرىمىزگە دەگەن قامقورلىعىمىزدى كورسەتۋىمىز قاجەت, – دەدى اۋىل تۇرعىنى.
