فوتو: tolqyn.kz
توتەنشە جاعداي جاريالانعان وڭىرلەردە دارىگەرلەر تىنىم تاپپاي, تاۋلىك بويى جۇمىس ىستەيدى. مەديتسينا قىزمەتكەرلەرى اۋىل-ايماقتاعى جۇكتى ايەلدەردى ەۆاكۋاتسيالاپ, بوسانۋ مەرزىمى تاياعانداردى اۋرۋحاناعا جەدەل جەتكىزۋگە تىرىسادى. ناق قازىر سۋ استىندا قالعان ايماقتاردا 3 مىڭ دارىگەر مەن 300 جەدەل جاردەم بريگاداسى تۇرعىندارعا مەديتسينالىق كومەك كورسەتەدى. سانيتارلىق-گيگيەنالىق جانە ەپيدەمياعا قارسى ءىس-شارالارعا 900-گە جۋىق ارنايى مامان تارتىلعان. توتەنشە جاعداي جاريالانعان وڭىردە تۇرعىنداردىڭ دەنساۋلىعىن قاداعالاپ, ءدارى-دارمەكپەن جانە مەديتسينالىق بۇيىمدارمەن قامتاماسىز ەتۋ جايى – نازاردا. اسىرەسە اق جەلەڭدىلەر جۇكتى ايەلدەردىڭ, بالالار مەن قارتتاردىڭ جاعدايىنا ءجىتى نازار اۋدارادى.
دەنساۋلىق ساقتاۋ مينيسترلىگى توتەنشە جاعداي رەجىمى جاريالانعان وڭىرلەردە اۋىزسۋمەن جابدىقتاۋ ساپاسىن دا باقىلايدى. ەپيدەمياعا قارسى جانە پروفيلاكتيكالىق ءىس-شارالار اياسىندا سانيتارلىق-ەپيدەميولوگيالىق باقىلاۋ كوميتەتىنىڭ اۋماقتىق بولىمشەلەرى سۋمەن جابدىقتاۋ كوزدەرىنىڭ نىساندارىن ۇدايى تەكسەرىپ وتىرادى. قازىردىڭ وزىندە سۋدىڭ سانيتارلىق-حيميالىق جانە ميكروبيولوگيالىق كورسەتكىشتەرىنە قاتىستى 4 مىڭنان اسا سىناما الىنىپ, زەرتتەلىپ, ونىڭ ىشىندە گيگيەنالىق تالاپتارعا سايكەس كەلمەيتىن 133 سىناما انىقتالىپتى. دەنساۋلىق ساقتاۋ مينيسترلىگى وسىنداي ءىس-شارالاردىڭ كومەگىمەن سۋ تاسقىنى كەزىندە ەپيدەميالىق جاعدايدى مەيلىنشە باقىلاۋعا تىرىسادى. مىسالى, قازىر ەلدە سۋ تاسقىنىنا ءتان ينفەكتسيالار بويىنشا جاعداي تۇراقتى. جۇقپالى اۋرۋلاردىڭ الدىن الۋ ماقساتىندا سانيتارلىق-ەپيدەميولوگيالىق قىزمەت ماماندارى اۋىزسۋمەن قامتۋعا كوپ كوڭىل بولە باستاعان. سۋدىڭ ساپاسى مەن قاۋىپسىزدىگىن سىنايتىن زەرتحانالىق باقىلاۋ ناتيجەلەرىنە زەر سالساق, جۇقپالى اۋرۋلاردىڭ سۋ ارقىلى تارالۋ قاۋپى بايقالمايدى ەكەن. سۋ تاسقىنى كەزىندە پروفيلاكتيكالىق, ەپيدەمياعا قارسى ءىس-شارالاردى جۇرگىزىپ, سۋ باسقان ۋچاسكەلەردە اسا قاۋىپتى جۇقپالى اۋرۋلاردىڭ تارالۋىنا جول بەرمەۋ بويىنشا كومەك كورسەتۋ ءۇشىن وڭىرلەرگە قوعامدىق دەنساۋلىق ساقتاۋ ۇلتتىق ورتالىعىنىڭ ماماندارى جىبەرىلگەن.
كەيىنگى اپتالاردا الەۋمەتتىك جەلىدە سۋ باسقان اۋماقتاردا ينفەكتسيالىق اۋرۋلاردىڭ ءورشۋ قاۋپى تۋرالى حابارلامالار تاراي باستادى. دەنساۋلىق ساقتاۋ مينيسترلىگى وسى سيپاتتاعى شىندىققا جاناسپايتىن, جالعان اقپاراتقا سەنبەۋگە شاقىرادى.
«سۋ تاسقىنىنا بايلانىستى سانيتارلىق-ەپيدەميولوگيالىق قىزمەتتىڭ (سەس) جۇمىسى كۇشەيتىلگەن رەجىمگە اۋىستىرىلدى. ينفەكتسيالىق سىرقاتتانۋشىلىق بويىنشا ەپيدەميالىق جاعداي تۇراقتى, سۋ تاسقىنى كەزەڭىنە ءتان نوزولوگيالار بويىنشا ينفەكتسيالىق سىرقاتتانۋشىلىقتى تىركەۋ كورسەتكىشى وتكەن جىلداردىڭ ورتاشا رەسپۋبليكالىق كورسەتكىشىنەن (2022-2023 جىلدار) اسپايدى. بارلىق وبەكتىدە ينفەكتسيالىق اۋرۋلاردىڭ پروفيلاكتيكاسى ماقساتىندا سەس ورگاندارى اۋىزسۋمەن جابدىقتاۋدى باقىلاۋدى كۇشەيتتى. ەپيدەميالىق جاعداي تۋرالى سەنىمدى اقپارات الۋ ءۇشىن رەسمي دەرەككوزدەرگە, دەنساۋلىق ساقتاۋ مينيسترلىگىنە, سانيتارلىق-ەپيدەميولوگيالىق باقىلاۋ كوميتەتىنە, جەرگىلىكتى جەرلەردەگى دەنساۋلىق ساقتاۋ باسقارماسىنا حابارلاسۋدى سۇرايمىز», دەلىنگەن مينيسترلىكتىڭ رەسمي حابارلاماسىندا.
«كەمەدەگىنىڭ جانى – ءبىر» دەگەن. توتەنشە جاعداي كەزىندە قۇتقارۋشىلارمەن قاتار مەديتسينا قىزمەتكەرلەرى دە قايىققا مىنگەسىپ, سۋ باسقان اۋدانداردىڭ تۇرعىندارىن ەۆاكۋاتسيالاۋعا جاردەمدەسىپ جاتىر. مىسالى, اقتوبە وبلىسى ايكە اۋىلىنىڭ دارىگەرلىك امبۋلاتورياسىنىڭ مەديتسينا قىزمەتكەرلەرى جۇرگەنەۆ اۋىلىنىڭ 530 تۇرعىنىن اۋدان ورتالىعىنا قايىقپەن ەۆاكۋاتسيالاۋعا كومەكتەسىپتى. ولاردىڭ اراسىندا قارتتار مەن بالالار, جۇكتى ايەلدەر كوپ ەكەن. ەلدەگى احۋالدى ءتۇسىنىپ, قۇتقارۋشىلارمەن بىرگە يىق تىرەسە تۇرعىندارعا جاردەمدەسىپ جۇرگەن مەديتسينا ماماندارىنىڭ ەڭبەگى زور.
