فوتو: aikyn.kz
«سۋ تاسقىنى كەزەڭى باستالعالى 107 119 ادام قۇتقارىلدى, ونىڭ 38 457-ءسى بالالار. ۋاقىتشا ورنالاستىرۋ ورتالىقتارىندا 7414 ادام بولسا, ونىڭ 3173-ءى بالالار. 11 674 ادام ۇيلەرىنە ورالدى. 9,3 ميلليون تەكشە مەتر ەرىگەن سۋ سورىلىپ, 1,9 ميلليون قاپ پەن 1,2 ميلليون توننا ينەرتتى ماتەريال توسەلدى. اۆاريالىق-قۇتقارۋ جۇمىستارىنا 35 339 ادام مەن 4 مىڭنان استام بىرلىك تەحنيكا جۇمىلدىرىلدى», دەدى ەراسىل سايپاش ورتالىق كوممۋنيكاتسيالار قىزمەتىندە وتكەن بريفينگتە.
ونىڭ ايتۋىنشا, وسى ساعاتتا 8 وبلىستا 4870 جەكە تۇرعىن ءۇي, 1264 اۋلا اۋماقتارى جانە 2035 ساياجاي سۋ استىندا قالىپ وتىر, بۇل اتىراۋ, اقتوبە, اقمولا, قوستاناي, شىعىس قازاقستان, سولتۇستىك قازاقستان وبلىستارى. 3 مىڭنان استام تۇرعىن ءۇي مەن 2 مىڭعا جۋىق اۋلا اۋماقتارىنان سۋ بۇرىلدى.
رەسپۋبليكانىڭ 8 وبلىسىندا اقتوبە, قوستاناي, باتىس قازاقستان, اقمولا, قاراعاندى, اتىراۋ, سولتۇستىك قازاقستان وبلىستارىندا جانە ۇلىتاۋ وبلىستارىندا 36 جەرگىلىكتى توتەنشە جاعداي تىركەلدى.
«توتەنشە جاعدايلار مينيسترلىگى ازاماتتاردى اسا ساق بولۋعا, سۋ تاسقىنى كەزەڭىندە قاۋىپسىزدىك شارالارىن قاتاڭ ساقتاۋعا, ءتيىستى رۇقساتسىز ۇيلەرى مەن ەۆاكۋاتسيالاۋ پۋنكتتەرىنەن شىقپاۋعا شاقىرادى», دەپ ەسكە سالدى ەراسىل سايپاش.
