فوتو: قورعانىس مينيسترلىگىنىڭ ءباسپاسوز قىزمەتى
دەسانتشىلار 11 ساۋىردە ايماق تۇرعىندارىنا كومەك كورسەتۋ ءۇشىن س-295 اسكەري-كولىكتىك ۇشاعىمەن جەتكىزىلگەن بولاتىن. وبلىس ورتالىعىنا تاياۋ سەرەبرياكوۆ كەنتىنە 100 ادام تارتىلدى. ول جەردە كوشىم وزەنى كوتەرىلىپ, تاسقىن سۋ جەرگىلىكتى تۇرعىنداردىڭ ۇيلەرىنە قاۋىپ توندىرگەن ەدى. ءبىر تاۋلىك ىشىندە الماتى دەسانتتىق-شابۋىلداۋ قۇراماسىنىڭ اسكەري قىزمەتشىلەرى 45 توننادان استام قۇم سالىنعان قاپشىقتاردى تاسىپ, بوگەن جاسادى.
«قازىرگى ۋاقىتتا كوشىم وزەنىنىڭ جاعاسىن نىعايتۋ ءۇشىن ءبىر جارىم مىڭ قاپشىق قۇم توسەلدى. وزەن بويىندا سۋ باسۋ قاۋپى جوعارى ەكى ۋچاسكە انىقتالىپ وتىر. ونىڭ ءبىرىنشىسىنىڭ ۇزىندىعى 120 مەتر, ال ەكىنشىسى 40 مەترلىك. قاپشىقتان تۇرعىزىلعان بوگەتتەردىڭ بيىكتىگى جارتى مەتردەن ەكى مەترگە دەيىن جەتەدى. ءبىزدىڭ ەسەپتەۋىمىز بويىنشا ەكىنشى ۋچاسكەنى نىعايتۋعا 3,5 مىڭنان استام قاپ قاجەت بولادى», دەدى جەرگىلىكتى باسقارۋ ورگانىنىڭ وكىلى امانگەلدى جۇماعاليەۆ.
دەسانتشىلاردىڭ جانقيارلىق ەڭبەگى نازاردان تىس قالعان جوق. تۇسكى استىڭ الدىندا كەنتكە ورال قالاسىنداعى جوعارى ينجەنەرلىك-تەحنولوگيالىق كوللەدجدىڭ جاس وقىتۋشىلارىنان قۇرالعان ەرىكتىلەر كەلىپ, اسكەري قىزمەتشىلەردىڭ باعا جەتپەس كومەگى ءۇشىن ريزاشىلىقتارىن ءبىلدىرىپ, داستارحاندارىنا تاتتىلەر تارتۋ ەتتى.
جەتىسۋ گارنيزونىنىڭ اسكەري قىزمەتشىلەرى زاشاعان قالاسىنداعى كىرپىش زاۋىتىندا, شاعان-نابەرەجنىي اۋدانىندا جانە جاس ناتۋراليستەر ستانتسياسىندا سۋ تاسقىنىنا قارسى جۇرگىزىلگەن ءىس-شارالارعا قاتىستى. دەسانتشىلار 40 مىڭنان استام قاپ دايىنداپ, ۇزىندىعى 150 مەترلىك بوگەت سالدى.
