تاۋەلسىز ساراپشىلار بىزگە ەكونوميكانىڭ ەميتەنت پەن ينۆەستور قىزمەتتەردىڭ تولىق سپەكترىن الاتىن ءبىر ناقتى پلاتفورما بولۋى كەرەكتىگىن, ءبىزدىڭ ەل ەكى بيرجا ۇستايتىنداي دەڭگەيگە جەتپەگەنىن ءجيى ايتاتىن.
ۇب توراعاسىنىڭ ايتۋىنشا, مەملەكەت باسشىسى بيرجالاردى بىرىكتىرۋدى ەمەس, بيرجالاردىڭ الەۋەتىن بىرىكتىرۋدى تاپسىردى. بۇل ءارتۇرلى سۇراقتار, ويتكەنى بيرجالاردىڭ بىرىگۋى ءبىر زاڭدى تۇلعانىڭ قۇرىلۋىن بىلدىرەدى.
«ناۋرىز ايىنىڭ سوڭىنا دەيىن شەشىمدى ازىرلەۋ تاپسىرىلدى. بۇل شەشىمدى ءبىز, ياعني ۇلتتىق بانك, قارجى نارىعىن رەتتەۋ جانە دامىتۋ اگەنتتىگى جانە احقو ازىرلەدىك», دەدى تيمۋر سۇلەيمەنوۆ.
ول بۇل شەشىم قازىر پرەزيدەنت اكىمشىلىگىنىڭ قاراۋىندا ەكەنىن اتاپ ءوتتى. ونى ماقۇلداعان سوڭ ۇلتتىق بانك ونى جاريالاپ, جۇزەگە اسىرۋعا كىرىسە الادى. جوسپارعا سايكەس, كەلەسى جىلعا دەيىن بيرجالار بىرلەسىپ ارەكەت ەتە باستايدى.
ۇلتتىق بانك باسشىسى كوپتەگەن ەلدەردە باعالى قاعازدار نارىعى ەكونوميكانى قارجىلاندىرۋدىڭ ماڭىزدى جولدارىنىڭ ءبىرى بولىپ تابىلاتىنىن قوستى. دەگەنمەن, بۇگىندە قازاقستان ەكونوميكاسىن تەك بانكتەر قارجىلاندىرادى. ونىڭ ويىنشا, قور نارىعىن دامىتپاي, جالپى ەكونوميكانىڭ دامۋى تۋرالى ويلاۋ قيىن بولادى.
سوندىقتان ۇلتتىق بانك بيرجالىق ينفراقۇرىلىم مۇمكىندىگىنشە جاقىن بولۋى كەرەك, ال وتىمدىلىك بىركەلكى بولۋى كەرەك, وسىلايشا كەز كەلگەن قۇرال ەكى پلاتفورمادا دا قولجەتىمدى بولۋى كەرەك دەپ ەسەپتەيدى. ۇلتتىق بانكتىڭ پرەزيدەنت اكىمشىلىگىنە جولداعان شەشىمىنىڭ ءمانى دە وسى.
AIX پەن KASE بىرىكتىرۋ سحەماسى 2024 جىلدىڭ ناۋرىز ايىندا ۇسىنىلاتىنى بۇرىن حابارلانعان بولاتىن. قازاقستان قارجىگەرلەرى قاۋىمداستىعىنىڭ باسشىسى ەلەنا باحمۋتوۆا قوس بيرجانى KASE بازاسىندا بىرىكتىرۋ كەرەك دەگەن ويعا باسىمدىق بەرەدى. ونىڭ ايتۋىنشا, مۇندا نەگىزگى وتىمدىلىك شوعىرلانعان, وعان قوسا ول – جەكە پلاتفورما. وتىمدىلىك ءالى دە الماتىدا جوعارى.
قارجى نارىعىن رەتتەۋ جانە دامىتۋ اگەنتتىگىنىڭ ءباسشىسى مادينا ابىلقاسىموۆا قوس بيرجانى بىرىكتىرۋدە قاتار ەلىنىڭ تاجىريبەسىنە سۇيەنۋ قاجەت ەكەنىن ايتادى. ال تاۋەلسىز ساراپشىلار بولسا, قوس بيرجانى ءبىر جەردەن باسقارۋ بيۋدجەتتى وڭتايلاندىرۋعا مۇمكىندىك دەگەن ويعا باسىمدىق بەرەدى.
قازاقستان قور بيرجاسىنىڭ قۇرىلعانىنا بيىل – 31 جىل. 1993 جىلدىڭ 17 قاراشاسىندا شەتەل ۆاليۋتاسىنىڭ ساۋدا-ساتتىعىن ۇيىمداستىرۋ ءۇشىن وتاندىق بانكارالىق ۆاليۋتالىق بيرجاسى قۇرىلىپ, بىرنەشە جىلدان كەيىن ونىڭ اتاۋى قازاقستان قور بيرجاسى دەپ وزگەرتىلگەن. قۇرىلعان ساتتەن باستاپ KASE – قازاقستانداعى قور جانە ۆاليۋتالىق نارىقتارعا قىزمەت كورسەتەتىن, قارجى نارىعىنىڭ اجىراماس ينفراقۇرىلىمى بولىپ تابىلاتىن جانە وتاندىق ەكونوميكادا ماڭىزدى ورىن الاتىن بيرجا.
ال AIX 2017 جىلى «استانا» حالىقارالىق قارجى ورتالىعىن دامىتۋ شەڭبەرىندە قۇرىلعان. «استانا» حالىقارالىق قارجى ورتالىعى, شانحاي قور بيرجاسى, جىبەك جولى قورى جانە AIX-كە ساۋدا پلاتفورماسىن دا ۇسىناتىن NASDAQ – AIX اكتسيونەرى. بيرجا اعىلشىن قۇقىعىنىڭ قاعيدالارىنا نەگىزدەلگەن نورماتيۆتىك-قۇقىقتىق بازا شەڭبەرىندە جۇمىس اتقارادى, وسى ارقىلى سەنىمدى ينۆەستيتسيالىق ورتانى قامتاماسىز ەتەدى.
