فوتو: قازاقستان پرەزيدەنتىنىڭ رەسمي سايتى
پرەزيدەنتتىڭ ايتۋىنشا الەمدىك قوعامداستىقتىڭ بەلسەندى جانە جاۋاپتى قاتىسۋشىسى رەتىندە قازاقستان تۇراقتى نەگىزدە بىتىمگەرشىلىك باستامالاردى ىلگەرىلەتۋ جولىمەن حالىقارالىق جانە وڭىرلىك قاۋىپسىزدىكتى قامتاماسىز ەتۋگە بارىنشا ۇلەس قوسادى. ءبىزدىڭ ەلىمىز جاپپاي قىرىپ-جويۋ قارۋىن قارۋسىزداندىرۋ جانە تاراتپاۋ, يادرولىق قارۋدان ازات ايماقتار قۇرۋ ىسىندە جالپىعا تانىلعان كوشباسشى ەكەنى بەلگىلى.
«جاھاندىق انتيادرولىق قوزعالىستاعى ءوز تاجىريبەسىن پايدالانا وتىرىپ, قازاقستان يران يادرولىق باعدارلاماسى بويىنشا كوپجاقتى كەلىسسوزدەردى ۇيىمداستىرۋعا ەلەۋلى ۇلەس قوستى. 2013 جىلى استانادا كەلىسسوزدەردىڭ ەكى راۋندى ۇيىمداستىرىلدى, ولار «التىلىق توبى» مەن يراننىڭ فورماتىن جاڭعىرتۋعا ىنتالاندىردى. وسى كۇش-جىگەردىڭ ناتيجەسى رەتىندە 2015 جىلى يران بويىنشا بىرلەسكەن جان-جاقتى ءىس-قيمىل جوسپارىنا قول قويىلعانى بەلگىلى. قازاقستاننىڭ حالىقارالىق تۇراقتىلىق پەن قاۋىپسىزدىكتى قامتاماسىز ەتۋگە قوسقان تاعى ءبىر ماڭىزدى ۇلەسى كوپجىلدىق سيريالىق قاقتىعىستى رەتتەۋ ءۇشىن ءوز الاڭىن ۇسىنۋ بولىپ تابىلادى. 2017 جىلدان باستاپ قازىرگى ۋاقىتقا دەيىن استانا پروتسەسى اياسىندا كەلىسسوزدەردىڭ 21 راۋندى وتكىزىلدى. وسى حالىقارالىق تۇعىرنامانىڭ سيرياداعى قاقتىعىستى رەتتەۋگە قوسقان ۇلەسىن بۇۇ جانە كوپتەگەن الەمدىك كوشباسشىلار مويىندادى», دەدى مەملەكەت باسشىسى.
پرەزيدەنت سونىمەن قاتار, قازاقستاننىڭ سىرتقى ساياساتىنىڭ ماڭىزدى باعىتى بۇۇ شەڭبەرىندەگى بىتىمگەرشىلىك قىزمەتى ەكەنىن, 2014 جىلدان باستاپ 600-دەن استام قازاقستاننىڭ اسكەري قىزمەتشى بۇۇ بىتىمگەرشىلىك ميسسيالارىنا قاتىسقانىن, قازىرگى ۋاقىتتا ءبىزدىڭ بىتىمگەرشىلەرىمىز ليۆانداعى, باتىس ساحاراداعى, ورتالىق افريكا رەسپۋبليكاسىنداعى, كونگو دەموكراتيالىق رەسپۋبليكاسىنداعى بۇۇ ميسسيالارىنا قاتىسىپ جاتقانىن, 2022 جىلدان باستاپ بۇۇ-نىڭ ماليدەگى ميسسياسىنا دا قاتىسقانىن اتاپ ءوتتى.
«بيىل 15 ناۋرىزدان باستاپ ءبىزدىڭ مەملەكەتىمىزدىڭ تاريحىندا تۇڭعىش رەت وتاندىق بىتىمگەرشىلىك كونتينگەنت گولان جوتاسىندا بۇۇ ميسسياسىندا 7 ايەلدى قوسا العاندا, 139 ادامنان تۇراتىن دەربەس بولىمشە رەتىندە ورنالاستىرىلدى. ءسىزدى قىزىقتىراتىن جاڭا باستامالارعا كەلەتىن بولساق, مۇندا ارميان-ءازىربايجان قاتىناستارىن رەتتەۋ توڭىرەگىندەگى احۋال تۋرالى ماسەلە تۋىندايدى. ءسوزسىز, قازاقستان بۇل تاقىرىپقا نەمقۇرايلى قارامايدى. ءبىز دوستاس ەكى مەملەكەت اراسىندا تەز ارادا بەيبىت شارت جاسالۋىنا مۇددەلىمىز. ەرەۆان مەن باكۋ اراسىندا بەرىك جانە ۇزاق مەرزىمدى بەيبىتشىلىك ورناتۋ ءبىزدىڭ ەلىمىزدىڭ مۇددەسىنە ساي كەلەدى. بىتىمگەرشىلىك باستامالاردىڭ باستاماشىسى جانە جاقتاۋشىسى رەتىندە قازاقستان بەيبىت جانە تۇراقتى دامۋعا باعىتتالعان كەز كەلگەن كۇش-جىگەردى قولداۋعا دايىن», دەدى پرەزيدەنت.
