فوتو: senate.parlam.kz
«مينيسترلىكتەر مەن اكىمدىكتەردىڭ سۋ قويمالارىن سالۋ, ەرىگەن قار سۋىن جيناۋ جانە وزەن ارنالارىن تازارتۋ جونىندەگى ون جىل بۇرىنعى وراسان زور جوسپارلارى قاعاز جۇزىندە قالدى», دەگەن سەرىك شايداروۆ ەلىمىزدە جىل سايىن سۋ تاسقىنى وقيعالارى قايتالاناتىنىن ايتتى. ونىڭ ايتۋىنشا, بيلىك مۇنداي اپاتتاردىڭ الدىن الا الماي, كەيىن تەك سالدارىمەن كۇرەسەدى.
«جىل سايىن كوزبەن كورىپ, تەكسەرۋدىڭ قورىتىندىسى بويىنشا 537 گيدروتەحنيكالىق قۇرىلىستى جوندەۋ قاجەت ەكەنى انىقتالدى, ونىڭ ىشىندە 427 گيدروتەحنيكالىق قۇرىلىس كوممۋنالدىق مەنشىكتە تۇر. 2024 جىلى كوممۋنالدىق مەنشىكتەگى بوگەتتەرگە كوپ فاكتورلى تەكسەرۋ جۇرگىزۋ مەن قاۋىپسىزدىك دەكلاراتسياسىن رەسىمدەۋگە 20 ءوڭىردىڭ تەك 5-ەۋىندە عانا بيۋدجەتتەن قارجى كوزدەلگەن. 2025-2026 جىلدارعا ەشقانداي وبلىستا قارجى قاراستىرىلماعان. جاعداي نەگە بۇلاي؟ ەڭ الدىمەن, قولدانىستاعى زاڭنامانىڭ جەتىلمەگەندىگى سەبەپ بولىپ وتىر», دەدى سەناتور.
سەناتوردىڭ ايتۋىنشا, مۇنداي قۇرىلىستاردى پايدالانۋ, كۇتىپ ۇستاۋ جانە جوندەۋ ءۇشىن قارجى كەرەك. 2010-2012 جىلدارى يەسىز بوگەتتەردى انىقتاۋ قورىتىندىسىنا سايكەس ولاردىڭ بارلىعى سوت شەشىمى بويىنشا اۋداندىق كوممۋنالدىق مەنشىككە ءوتتى. قولدانىستاعى زاڭناما اياسىندا ولاردى باسقارۋ ءۇشىن اۋداندار وبلىستىق كوممۋنالدىق مەنشىككە بەرۋى كەرەك ەدى, ال ولار ءوز كەزەگىندە قارجى جۇمساماۋ ءۇشىن قاراماعىنا قابىلداماعان.
«گيدروتەحنيكالىق قۇرىلىستاردىڭ شامامەن 75%-ى اۋداندىق كوممۋنالدىق مەنشىكتە. ماسەلەنى قىسقا مەرزىمدە زەردەلەپ, زاڭناماعا وزگەرىس ەنگىزىپ, اۋداندار مەن قالالارعا وكىلەتتىك بەرۋ كەرەك. وبلىستاعى جەرگىلىكتى اتقارۋشى ورگاندارىندا دا گيدروتەحنيكالىق قۇرىلىستاردى كۇتىپ ۇستاۋ جانە پايدالانۋ جونىندەگى مەملەكەتتىك كاسىپورىندار قۇرۋ قۇقىعى فۋنكتسياسى بار, گيدروتەحنيكالىق قۇرىلىستاردى وبلىستىق جانە اۋداندىق كوممۋنالدىق مەنشىككە جاتقىزۋ شارتتارىن ايقىنداۋ قاجەت دەپ سانايمىز», دەدى سەناتور.
سەرىك شايداروۆ ءاربىر ەلدى مەكەننىڭ باس جوسپارىندا اۋماقتاردى تابيعي قۇبىلىستاردىڭ قاۋىپتى اسەرىنەن قورعاۋ جونىندەگى شارالاردى تىركەۋدى جانە دايىنداۋدى, ولاردى ىسكە اسىرۋدى, سونداي-اق ەلدى مەكەندەردى ينجەنەرلىك قورعاۋ جونىندەگى ينۆەستيتسيالىق جوبالاردىڭ قاي جەردە ىسكە اسىرىلعانىن تەكسەرۋدى ۇسىندى.
