- فريستايلدان يتاليانىڭ كەزا-ين-ۆالمالەنكو قالاسىندا وتكەن الەم بىرىنشىلىگىندە اناستاسيا گورودكو جەكە موگۋلدان التىننان السا, پاراللەلدى موگۋلدا كۇمىسپەن كۇپتەلدى. باسەكەنىڭ ەكىنشى تۇرىندە ول امەريكالىق كايلي كاريوتيستەن عانا قالىپ قويدى.
- سپورتتىق گيمناستيكادان حورۆاتيانىڭ وسيەك قالاسىندا ۇيىمداستىرىلعان Challenge Cup تۋرنيرىندە ءىلياس ءازيزوۆ قولا جۇلدەگە قول جەتكىزدى. ەركىن جاتتىعۋدا ول كۇمىس مەدالدى موينىنا ىلسە, «ات» جاتتىعۋىندا الدىنا جان سالمادى.
- كوركەم گيمناستيكادان بولگاريادا جالاۋى جەلبىرەگەن Sofia Cup حالىقارالىق تۋرنيرىندە ەريكا جايلاۋوۆا كوپسايىستى قولا مەدالمەن قورىتىندىلادى. دارىندى سپورتشىمىز تەك جەرگىلىكتى گيمناسشىلار بوريانا كولەين مەن ەلۆيرا كراسنوبوەۆاعا عانا ەسە جىبەردى. تاعى ءبىر قازاق قىزى ايىم مەيىرجانوۆا ءتورتىنشى ورىنعا تابان تىرەدى.
- وتاندىق تاەكۆوندوشىلار لا-نۋسيادا ۇيىمداستىرىلعان G1 Spain Open تۋرنيرىندە ءۇش جۇلدە ولجالادى. تارقاتىپ ايتساق, ازىرەت دۇيسەنبەك (54 كگ) – التىن, ابدۋراحمون ماريپوۆ (74 كگ) – كۇمىس جانە جاۆوۆيرحون يسلاموۆ (58 كگ) قولا مەدالداردى مويىندارىندا جارقىراتتى.
- شايبالى حوككەيدەن اندوررادا ەكىنشى ديۆيزيونداعى كوماندالار اراسىنداعى الەم بىرىنشىلىگىندە قازاقستاننىڭ ايەلدەر قۇراماسى ەكى كەزدەسۋ وتكىزدى. العاشقى تۋردا جەرلەستەرىمىز مەكسيكانى 4:2 ەسەبىمەن ۇتسا, ودان كەيىن تايپەيدى تىزە بۇكتىردى – 3:0. الداعى كۇندەرى قىزدارىمىز يسلانديا, بەلگيا جانە يسپانياعا قارسى وينايدى.
- 20 ساۋىردە ەكاتەرينبۋرگتە جالاڭ قولمەن جۇدىرىقتاسۋدان ءدۇبىرلى دودا ۇيىمداستىرىلادى. سول جارىستا قازاق فايتەرى اسىلجان «ساق» باقىتجان ۇلى رەسەيلىك يسلام «دجانگو» جاگورازوۆپەن ايقاسادى. وتاندىق «الاش پرايد» كلۋبىنىڭ مۇشەسى وسى كۇنگە دەيىن 21 رەت وكتاگونعا شىعىپ, 15 رەت جەڭىسكە جەتتى. بەس رەت ۇتىلىپ, تاعى ءبىر باسەكەدە تەڭ ەسەپ تىركەلدى. ال رەسەي سپورتشىسى 21 كەزدەسۋدىڭ 11-ىندە باسىمدىق تانىتتى.
- بوكستان قازاقستاننىڭ جاستار قۇراماسىنىڭ اعا جاتتىقتىرۋشىسى بولىپ قايرات ءساتجانوۆ تاعايىندالدى. بۇعان دەيىن دە ول ۇزاق جىلدار بويى ءدال وسى قىزمەتتى اتقارعان. سول كەزدەرى وتاندىق بىلعارى قولعاپ شەبەرلەرى حالىقارالىق ارەنادا وراسان زور تابىسقا قول جەتكىزدى. كەيىننەن ۇلتتىق قۇراماسىنىڭ تىزگىنىن ۇستادى. ءساتجانوۆتىڭ جەتەكشىلىگىمەن 2021 جىلى سەربيادا وتكەن الەم چەمپيوناتىندا جەرلەستەرىمىز 2 التىن, 2 كۇمىس, 1 قولا مەدالدى ولجالاپ, جالپىكوماندالىق ەسەپتە ەكىنشى ورىندى يەلەندى.
- گرەكيا مەن ليۋكسەمبۋرگە قارسى وتكەن سوڭعى ەكى كەزدەسۋدەگى ساتسىزدىكتەردەن كەيىن فۋتبولدان قازاقستان قۇراماسى فيفا-نىڭ جاڭارتىلعان رەيتينگىندەگى جاعدايىن ناشارلاتىپ الدى. جەرلەستەرىمىز قازىر 103-ورىندا تۇر. وزگەلەردى ايتپاعاندا, ءبىزدىڭ اياقدوپ شەبەرلەرىمىز كورشىلەس تاجىكستان (99-ورىن) مەن قىرعىزستاننان (100-ورىن) دا قالىپ قويدى. وزبەكتەر – 64-ورىندا. ال كوش باسىنداعى كوماندالار – ارگەنتينا, فرانتسيا, بەلگيا, انگليا, برازيليا, پورتۋگاليا, نيدەرلاند, يسپانيا, يتاليا جانە حورۆاتيا.
