وسىعان بايلانىستى وتكەن جيىندا وبلىس اكىمى نۇرلىبەك نالىباەۆ بيىل ايماقتا 187 مىڭ گەكتار القاپقا داقىل ەگىلەتىنىن اتاپ ءوتتى. كۇرىش كولەمى بىلتىرعىدان 5 مىڭ گەكتارعا ازايىپ, 83,9 مىڭ گەكتارعا ەگىلەدى. مەملەكەتارالىق سۋ شارۋاشىلىعى ۇيلەستىرۋ كوميسسياسىنىڭ 86-وتىرىسىندا ۆەگەتاتسيا كەزەڭىندەگى سۋ ءليميتى بەلگىلەنگەننەن كەيىن ەگىس كولەمى قايتا ناقتىلانادى.
«مەملەكەت باسشىسىنىڭ اۋىل شارۋاشىلىعىنداعى جالپى ءونىم كولەمىن الداعى 5 جىلدا 2 ەسە ارتتىرۋ جونىندەگى تاپسىرماسىن ورىنداۋدى بيىلدان باستاۋىمىز كەرەك. ول ءۇشىن ۇكىمەت ماقۇلداعان ەگىن شارۋاشىلىعى ينديكاتورلارى بويىنشا بيىلعا بولجانعان كولەمدى اگروتەحنيكالىق تالاپتاردى ساقتاپ, مەرزىمىندە ەگۋ قاجەت. قازىرگى مالىمەت بويىنشا «شاردارادان» جوعارىداعى «توقتاعۇل», ء«اندىجان», «قايراققۇم», «شارباق» سۋ قويمالارىندا 12,1 ملرد تەكشە مەتر سۋ بار, بۇل وتكەن جىلداعىدان 700 ملن تەكشە مەترگە كەم. «شاردارا» مەن «كوكسارايدىڭ» دا جاعدايى ءماز ەمەس. ونداعى جينالعان سۋ وتكەن جىلعىدان 1 ملرد تەكشە مەترگە از. ۆەگەتاتسيالىق كەزەڭدە «شاردارا» سۋ قويماسىنا جوعارىدان قوسىمشا 3 ملرد تەكشە مەتر سۋ تۇسپەسە, جاعداي قيىنداي تۇسەدى. سوندىقتان جوعارىدان كەلەتىن سۋدىڭ ءار تامشىسىن ەسەپتەيتىن كەز جەتتى», دەدى ايماق باسشىسى.
تاپشىلىقتىڭ زاردابىن جەڭىلدەتۋ ءۇشىن وسى جىلى 4,2 مىڭ گەكتارعا سۋ ۇنەمدەيتىن وزىق تەحنولوگيا قولدانىلادى. «تاڭ لتد» جشس 800 گەكتارعا ەگەتىن جۇگەرى, «Qaratau Fruits» شق 80 گەكتارلىق قارقىندى باقتى, «ەر ءالى» شق 15 گەكتار القاپتى, مايدا شارۋاشىلىقتار 1 800 گەكتار, جەكە قوجالىقتار 1 005 گەكتار كوكونىس, باقشانى تامشىلاتىپ سۋارادى. جاڭبىرلاتىپ سۋارۋ ادىسىمەن «رزا اگرو» جشس 260 گەكتارعا سۇرلەمدىك جۇگەرى, «Gamil Pro» شق 200 گەكتار جوڭىشقا, «جەتىكول جەر» جشس 40 گەكتار كۇنباعىس ەگۋدى جوسپارلاپ قويعان.
كوكتەمگى دالا جۇمىستارىنا قاجەتتى قارجى – 26,7 ملرد تەڭگە. وسى كۇنگە دەيىن كانالداردىڭ 134 شاقىرىمى تازالانىپ, گيدروتەحنيكالىق قۇرىلىستاردىڭ 75-ءى جوندەۋدەن ءوتتى. تەحنيكالار تولىق جوندەلىپ, ناۋقانعا كىرىسىپ كەتتى. تۇقىمنان تاپشىلىق جوق. جىل باسىندا تىڭايتقىش جەتكىزۋشىلەر جانە وندىرۋشىلەرمەن جاسالعان كەلىسىمدەر ناتيجەسىندە بۇگىنگى كۇنگە 52,8 مىڭ توننا تىڭايتقىش شارۋاشىلىقتارعا جەتكىزىلىپ بەرىلدى. بۇل – قاجەتتىلىكتىڭ 83 پايىزى. شارۋاشىلىقتار سۇرانىسىنا سايكەس وبلىسقا بولىنگەن 12,9 مىڭ توننا ارزانداتىلعان ديزەلدىڭ 40 پايىزى جەتكىزىلىپ, 1 ءليترى 250 تەڭگەدەن بوساتىلىپ وتىر.
جيىندا شارۋاشىلىقتاردىڭ «اگرارلىق نەسيە كورپوراتسياسى» ارقىلى «كەڭ دالا» باعدارلاماسىمەن 2,5 ملرد تەڭگە نەسيە الۋى, اۋىسپالى ەگىس ءتارتىبىن قاتاڭ ساقتاۋ, سۋ ۇنەمدەۋ تەحنولوگياسى قولدانىلاتىن ەگىس كولەمىن ۇلعايتۋ ماسەلەلەرى تالقىعا ءتۇستى.
جىلدارعا جالعاسىپ كەلە جاتقان سۋ تاپشىلىعى كىمگە دە وڭاي ءتيىپ وتىرعان جوق. «ارال-سىرداريا» باسسەيندىك ينسپەكتسياسى ەگىسكە قاجەتتى سۋ ءليميتىن ءساۋىر ايىنىڭ باسىندا ناقتىلاۋعا ءتيىس. ال «قازسۋشار» مەكەمەسىنىڭ وبلىستىق فيليالى كوكتەمگى سۋ الۋ ناۋقانى باستالعانعا دەيىن سۋ شارۋاشىلىعى نىساندارىن جوندەۋدى تولىق اياقتاۋعا جاۋاپتى بولىپ وتىر.
قىزىلوردا وبلىسى
