قىزىلجار ءوڭىرىنىڭ تۋماسى ە.بوكەتوۆ اتىنداعى قاراعاندى ۋنيۆەرسيتەتىنىڭ ەكونوميكا فاكۋلتەتىنە وقۋعا ءتۇسىپ, 1994 جىلى بىتىرگەننەن كەيىن ماماندىعى بويىنشا ەلدە جۇمىس ىستەيدى. 2008 جىلى وتباسىمەن اباي قالاسىنا كوشىپ كەلەدى. شاعىن قالانىڭ جايلىلىعىن سەزىنگەن ولار ءبىرجولا ورنىعادى. جۇبايى سايلاۋ «اباي» شاحتاسىنا جۇمىسقا تۇرىپ, ءوزى كاسىپكەرلىكپەن اينالىسۋعا نيەت ەتەدى.
ءاليا ويعا العان جوسپارىن 2015 جىلى جۇزەگە اسىردى. بيزنەس-جوسپارى اكىمدىك تاراپىنان قولداۋ تاۋىپ, 1,8 ميلليون تەڭگە گرانتقا قول جەتكىزەدى. مەملەكەتتىڭ قاراجاتىنا توپار جىلىجايلارىنان ساڭىراۋقۇلاق تسەحىن جالعا الادى. ءوزىنىڭ تۋعان ولكەسى سولتۇستىك قازاقستان ساڭىراۋقۇلاقتىڭ شانتەرەللا, روسسۋلا, بالدىركوك سەكىلدى تۇرلەرىنە وتە باي. ال جاڭا قونىس اۋدارعان قالاداعى دۇكەن سورەلەرىنەن پولياك شامپينونىنان باسقاسىن تاپپاي, تاڭعالعانى بار. بۇل كاسىپ ءتۇرى سول كەزدە ويىنا كەلىپ, ساڭىراۋقۇلاقتىڭ ءتۇر-ءتۇرىن وسى جەردە دە ءوسىرۋ ماقساتىمەن جۇمىسقا كىرىسىپ كەتەدى.
ساراتوۆ قالاسىندا ءبىلىمىن جەتىلدىرىپ, الماتىدان ارنايى تەحنولوگ شاقىرتادى. بىرتە-بىرتە شارۋاسى دوڭگەلەپ, كاسىپپەن جەتى جىل اينالىسادى. الايدا جىل سايىن وسكەن تسەح اقىسىن تولەۋ قيىنعا سوعىپ, كاسىبىن توقتاتۋ تۋرالى شەشىم قابىلدايدى.
ءاليانىڭ ساڭىراۋقۇلاقتارىنا ابدەن سۇرانىس ارتىپ, ونى ءوسىرۋدىڭ جولدارىن سۇراۋشىلار كوبەيەدى. بىلگەنىمەن بولىسكەندى و باستان ءجون كورەتىن جان «اتامەكەن» كاسىپكەرلەر پالاتاسى ارقىلى «قالالىق فەرمەر» وقۋ ورتالىعىن اشىپ, ءىسىن جاڭا باستاعاندار مەن تاجىريبەسى از كاسىپكەرلەرگە جىلىجاي شارۋاشىلىعىن جۇرگىزۋدىڭ قىر-سىرىن ۇيرەتەدى. قازىر دە وسىنداي يگى ىسپەن اينالىسادى. ماسەلەن, وتكەن جىلدىڭ ماۋسىمىندا 17 تىڭداۋشى وسى كۋرستى ءبىتىرىپ شىعىپ, كاسىپتەرىن ىلگەرىلەتىپ وتىر. جىلىجايعا ىقتيمال قاۋىپتەر, فورس-ماجورلىق جاعدايلار, دەمپينگ, وسىمدىك اۋرۋلارى تۋرالى دارىستەر وقىپ بەرەدى. ءتىپتى بيزنەس-جوسپار ۇلگىلەرىن ۇسىنادى, كوپجىلدىق تاجىريبەسىمەن بولىسەدى.
مۇنىمەن قوسا جىلىجايدىڭ جۇمىسى ءوزىنىڭ سۇيىكتى حوببيىنە اينالىپ كەتكەندىكتەن, اۋەلدەگى ءىسىن جالعاستىرىپ, 2020 جىلى اباي قالاسىنداعى بۇرىنعى شاحتاقۇرىلىس باسقارماسىنىڭ قاڭىراپ, قيراعان جىلىجايىنىڭ عيماراتىن سەنىمدىك باسقارۋعا الادى. اۋماعى 1 مىڭ شارشى مەتر بولاتىن عيماراتتىڭ ساۋ-تامتىعى قالماعان ەكەن. اۋەلگى جۇمىستى سونى قالپىنا كەلتىرۋدەن باستايدى. سۋىن, جىلۋىن, ەلەكتر جەلىلەرى مەن توراپتارىن قايتا جالعاتىپ, قوستىرۋعا قانشاما كۇشىن سارپ ەتەدى.
«وسىنىڭ نەگىزىندە 2022 جىلى «اگروحورۆەست» جەكەمەنشىك كاسىپورنىن قۇردىم. بۇگىندە كاسىپورىندا التى ادام ەڭبەك ەتەدى. مۇندا قىزعالداق, قيار, كوكونىس وسىرەمىز. وتكەن جىلى 10 مىڭ تال قىزعالداق, 3 توننا قىزاناق پەن 20 توننا قيار ءوندىرىپ, تۇتىنۋشىلارعا جونەلتىپ, ءتاۋىر تابىس تۇسىردىك. بىلتىر وبلىس اكىمىنىڭ 3,8 ميلليون تەڭگە گرانتىن ۇتىپ الدىم. وسى قاراجات ەسەبىنەن ءوندىرىس كولەمىن ۇلعايتۋدى ويلاستىرىپ وتىر. ماقساتىم – تەك تابىسقا كەنەلۋ ەمەس, حالىقتى ساپالى ونىمدەرمەن قامتاماسىز ەتۋ», دەيدى ءاليا.
كاسىپكەر كەلىنشەك – وتباسىندا اياۋلى انا, ادال جار. ۇيدەگى ءۇش بالاسىنىڭ بابىن تاۋىپ, ودان بولەك اۋداننىڭ قوعامدىق ومىرىنە دە بەلسەنە ارالاسىپ, ءوڭىر ومىرىنە ۇلكەن ۇلەسىن قوسىپ ءجۇر. قايىرىمدىلىق اكتسيالارىنان دا قالىس قالمايدى. ماسەلەن, «جاردەم» مۇگەدەكتەر قوعامىنا كومەكتەسىپ, كەمباعال جانداردىڭ اتاۋلى كۇنى 9 قازاندا ولارعا ارناپ داستارقان جايادى. جىلدا بۇل داعدىسىنان اينىعان ەمەس. كاسىپكەردىڭ تاعى ءبىر تاماشا قىرى – ۇستەل تەننيسىنەن سپورت شەبەرلىگىنە ۇمىتكەر. وبلىستىق جارىستاردا اباي اۋدانىنىڭ نامىسىن قورعايدى. سپورتتان دا, كاسىپكەرلىكتەن دە العان العىسحاتتارى مەن ماراپاتتارى سورەسىندە سىڭسىپ تۇر. ول – باستىسى ەڭبەكتەن قاشپايتىن, ەرىك-جىگەرى مول تاۋەكەلشىل جان. قاي شارۋاعا بولسىن بەل بۋىپ, ماقساتىنا جەتكەنشە تىنىم تاپپايدى. سول تاۋەكەلى ءتۇبى تابىس اكەلەتىنىن جاقسى تۇسىنەدى.
قاراعاندى وبلىسى,
اباي اۋدانى
