اسكەريلەر – الدىڭعى شەپتە
توتەنشە جاعداي رەجىمى جاريالانعان اۋداندارعا اسكەريلەر جۇمىلىپ, سۋدى بوگەپ, تاسقىننىڭ الدىن الۋ ءىس-شارالارىنا جاردەمدەسكەن. مىسالى, وتكەن تاۋلىكتە سۋ تاسقىنىنا قارسى ءىس-شارالارعا 1 500-دەن اسا اسكەري قىزمەتشى, 104 بىرلىك اۆتوموبيل تەحنيكاسى, 3 ارميالىق اۆياتسيا تىكۇشاعى تارتىلعان. قورعانىس مينيسترلىگىنىڭ رەسمي وكىلى رۋسلان جانگۋلين ءباسپاسوز ءماسليحاتىندا اۋە كولىگىمەن 39 ادام قاۋىپسىز اۋماققا جەدەل جەتىپ, 4 توننادان اسا جۇك تاسىمالدانعانىن ايتتى. سولتۇستىك قازاقستان وبلىسى اۋماقتىق قورعانىس بريگاداسىنىڭ جاۋىنگەرلەرى پەتروپاۆل قالاسىنىڭ ماڭىنداعى زارەچنىي اۋىلىنىڭ ايماعىنا ەسىل وزەنىنىڭ بوگەتىن نىعايتۋ ءۇشىن بىرەر كۇندە مىڭداعان قاپ قۇم دايىنداپتى. اسكەريلەر مۇنىمەن شەكتەلمەي, توتەنشە جاعدايلار دەپارتامەنتى, پوليتسيا قىزمەتكەرلەرىمەن بىرگە زارەچنىي تۇرعىندارىن قاۋىپسىز ايماققا كوشىرۋ جۇمىستارىنا ارالاسقان.
– سولتۇستىك قازاقستان وبلىسى بەسكول اۋلىندا استانادان كەلگەن 68665 اسكەري ءبولىمىنىڭ اسكەري قىزمەتشىلەرى اۋىلدىڭ اينالاسىن نىعايتۋ ءۇشىن 8 مىڭ قاپ قۇم تولتىردى. ەكىنشى توپ «قازاۆتوجول» ۇلتتىق كومپانياسى» اق ماماندارىمەن بىرلەسىپ, پەتروپاۆل قالاسىنىڭ ماڭىنداعى اينالما جولدى نىعايتىپ جاتىر. قالعان ەكى توپ جىلىجاي, جاعالاۋ اۋىلدارىنىڭ توڭىرەگىن, سونداي-اق اينالما جول بويىمەن قۇم سالىنعان قاپتاردى توسەۋمەن اينالىستى. وسى ءبولىمنىڭ ءجۇز اسكەري قىزمەتشىسى پەتروپاۆل قالاسىنىڭ زارەچنوە ماڭىنداعى بوگەتتى كۇشەيتۋگە كىرىستى, – دەدى سپيكەر.
اتىراۋ وبلىسىنىڭ قۇلسارى قالاسىندا ماڭعىستاۋ وبلىسىنداعى اۋماقتىق قورعانىس بريگاداسىنىڭ 187 اسكەري قىزمەتشىسى اۋىسىممەن بوگەتتى قالپىنا كەلتىرۋگە جۇمىلعان. مۇز كەپتەلىستەرىن جويۋ جانە سۋ اعىنىن باسەڭدەتۋ ءۇشىن اسكەري ينجەنەرلەر قۇلسارى قالاسىنان 30 شاقىرىم قاشىقتىقتاعى جەم وزەنىندە ۇزبەي مۇز جارىپ جاتىر. ينجەنەرلەر وسى ۋاقىتقا دەيىن باس-اياعى 8 جارىلىس ۇيىمداستىرعان.
اقتوبە وبلىسى ويىل وزەنىندەگى پاروم وتكەلىمەن قوناەۆ گارنيزونىنىڭ اسكەري ينجەنەرلەرى 235 ازاماتتى ەۆاكۋاتسيالاپ, 29 تونناعا جۋىق جۇك تاسىمالداعان. پاروم وتكەلىنىڭ كومەگىمەن 817 ازامات ەۆاكۋاتسيالانعان. اقتوبە وبلىسىنىڭ كەلەشەك ەلدى مەكەنىنىڭ تۇرعىندارىنىڭ مۇلكىن قورعاۋعا «باتىس» وڭىرلىك قولباسشىلىعىنىڭ اسكەري قىزمەتشىلەرى جۇمىلعان.
جالپى, 27 ناۋرىز بەن 9 ءساۋىر ارالىعىنداعى جەدەل ءىس-شارالارعا قارۋلى كۇشتەردەن 3 مىڭنان اسا اسكەري قىزمەتشى, 173 بىرلىك اسكەري تەحنيكا, 14 تىكۇشاق, 4 اسكەري-كولىك ۇشاق جۇمىلدىرىلعان. قارۋلى كۇشتەردىڭ جەكە قۇرامىنىڭ كومەگىمەن 2,5 مىڭعا جۋىق ادام, ونىڭ ىشىندە 745 بالا ەۆاكۋاتسيالاندى. سونداي-اق 115 توننادان اسا جۇك تاسىمالدانىپتى.
مال شىعىنى قالاي وتەلەدى؟
سۋ تاسقىنى كەزىندە شىعىندى بارىنشا ازايتۋ ماقساتىندا اۋىل شارۋاشىلىعى مينيسترلىگىنىڭ ماماندارى وبلىس اكىمدىكتەرىمەن بىرلەسىپ 88 مىڭنان اسا مالدى قاۋىپسىز اۋماققا شىعارعان. اۋىل شارۋاشىلىعى مينيسترلىگىنىڭ رەسمي وكىلى ولجاس تىلەبالديننىڭ حابارلاۋىنشا, سوڭعى دەرەكتەر بويىنشا ولگەن مال سانى – 8,1 مىڭ باس. ونىڭ ىشىندە ۇساق مال – 6 مىڭ, ءىرى قارا – 1,5 مىڭ, جىلقى باسى – 514. رەسپۋبليكالىق ەپيزووتياعا قارسى جاساق مالدىڭ ولەكسەسىن جويۋعا قارقىندى كىرىسكەن. پرەمەر-ءمينيستردىڭ تاپسىرماسىمەن بۇل ءىس-شارا كۇشەيتىلگەن رەجىمدە جالعاسادى. سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ زاردابىن جويۋ جونىندەگى رەسپۋبليكالىق شتاب مالىنان ايىرىلعان تۇرعىندارعا وتەماقى تولەۋ الگوريتمىن ازىرلەپ, بەكىتتى. مەنشىك يەلەرىن, سوسىن ولاردىڭ شىعىندارىن انىقتاۋ ءۇشىن ارنايى كوميسسيا قۇرىلعان. ياعني تابيعي اپات سالدارىنان مالىنان ايىرىلعان تۇرعىندار ت ۇلىگى تۋرالى مالىمەتتى كورسەتە وتىرىپ, جەرگىلىكتى كوميسسياعا ءوتىنىش بەرۋگە ءتيىس. ۇلتتىق ستاتيستيكا بيۋروسى جاريالاعان مالدىڭ ءتۇرى, جاس شاماسى, نارىقتاعى قۇنى تۋرالى مالىمەتتەر نەگىزىندە مەنشىك يەلەرىنىڭ مۇكاممال شىعىنى ناقتىلانادى.
ەرىكتىلەردىڭ ەرلىگى
ەلدىڭ 3 وبلىسىندا توتەنشە جاعداي رەجىمى جاريالانعاندا 29 ناۋرىزدان باستاپ استانا قالاسىندا ەرىكتىلەر قايىرىمدىلىق ۇيىمدارىمەن بىرلەسىپ گۋمانيتارلىق كومەك جيناۋ ءۇشىن 9 پۋنكت اشقان. بۇل يگى ىسكە 30 ۆولونتەرلىك ۇيىم جۇمىلدىرىلىپ, اعايىننان جەتكەن جىلۋدى بۋىپ-تۇيۋمەن اينالىسقان. استانا قالاسى ەرىكتىلەر فرونت-ءوفيسىنىڭ باسشىسى ەلۆيرا ەسمۇحانوۆا ەلوردادان تاسقىننان زارداپ شەككەن وڭىرلەرگە 550 توننا گۋمانيتارلىق كومەك جونەلتىلگەنىن ايتتى. يگى ىسكە كاسىپكەرلەر, مەملەكەتتىك ورگاندار, قاۋىمداستىقتار, ەرىكتىلەر, سونداي-اق ەلدەگى احۋالعا الاڭداپ وتىرعان قالا تۇرعىندارى ءبىر كىسىدەي ۇلەس قوسقان. وڭىرلەرگە ازىق-ت ۇلىكپەن قوسا, جىلىتقىش تەحنيكا, قايىق, گەنەراتور, كۇرەك, 400 مىڭ قاپ بالالار زاتتارى, گيگيەنا قۇرالدارى, شاتىر, توسەك-ورىن جابدىقتارى, تاعىسىن تاعى اسا قاجەتتى تۇرمىستىق زاتتار جونەلتىلگەن. بۇل – ءبىر عانا استانا قالاسىنداعى ەرلىكتىلەردىڭ ەڭبەگى. تاسقىننان امان وزگە وبلىس, قالانىڭ ەرىكتىلەرى دە وسىلاي بىرىگىپ, قولدان كەلگەن كومەگىن ايانىپ قالمايتىنىن بايقاتتى.
«قازگيدرومەت» رمك بولجامىنشا, الداعى كۇندەرى ەل اۋماعىنىڭ باسىم بولىگىندە اۋا رايى تۇراقسىز بولادى. سولتۇستىك-باتىستا, سولتۇستىكتە, شىعىستا, رەسپۋبليكانىڭ وڭتۇستىك-شىعىسىنداعى تاۋلى ايماقتاردا, ەلدىڭ شىعىسىندا تۇندە جاۋىن-شاشىن مول تۇسەدى. باتىس ولكەلەر دە جاۋىندى بولادى. تەك وڭتۇستىك-باتىستا, ەلدىڭ وڭتۇستىگىندە عانا جاۋىن جاۋمايدى دەگەن بولجام بار. ءبىراز ءوڭىردى تۇمان باسىپ, جەل كۇشەيەدى دەسەدى. قازىرگى قولايسىز اۋا رايىنا قاراماستان سۋ استىندا قالعان وڭىرلەرگە كومەككە اسىققان قۇتقارۋشى, اسكەريلەر, مەديتسينا ماماندارى مەن ەرىكتىلەرگە اماندىق تىلەيمىز.
