ايماق باسشىسى دۇيسەنبى كۇنى ساعات تاڭعى سەگىزدەن باستاپ, قاراعاندى قالاسى جانە قازىبەك بي اۋدانىنىڭ اكىمدەرىمەن بىرگە وڭتۇستىك-شىعىستىڭ ءبىر بولىگىن ارالاپ شىقتى. كوشە تازالىعىنا كوڭىلى تولماعان اكىم ەسكەرتۋ جاسادى.
«سۋ تاسقىنى كەزەڭى ءوتتى. ەندىگى ماسەلە – بارلىعىمىز تازالىققا كوڭىل ءبولىپ, بىرىگىپ قالانى رەتكە كەلتىرۋىمىز قاجەت. ءبىر قاراساڭىز, قوقىستان تازارتقان سياقتى, بىراق, قۇرىلىس قالدىقتارى جاتىر. جۇمىستى نەگە سوڭىنا دەيىن جەتكىزىپ ىستەمەسكە؟ جاياۋ ءجۇرىپ, تازالىققا بارىنشا ءمان بەرىڭىزدەر», دەدى ايماق باسشىسى اۋدان اكىمى ەرالى وسپانوۆقا.
مۇنىمەن قوسا, الەۋمەتتىك نىساندار مەن جەكە كاسىپورىنداردىڭ اۋماعىن ارالاپ, ولاردىڭ دا قوقىستارى شىعارىلماعاندىعىن كورىپ, مەيلىنشە جۇمىستى كۇشەيتۋ كەرەكتىگىن اتاپ ءوتتى.
«قىستان كەيىن, ارينە, قوقىس كوپ. تازارتۋ جۇمىستارىن ۇيىمداستىرۋعا بايلانىستى كەمشىلىكتەر بار ەكەنىن مويىنداۋىمىز كەرەك. مەردىگەرلەردىڭ جۇمىسىنا قاتىستى سۇراقتار بار. بيزنەس, پيك ءوز اۋماعىن دا تازارتۋى كەرەك. الدىمىزدا قىستان كەيىن قالانىڭ تازالىعىن تەز رەتكە كەلتىرۋ مىندەتى تۇر. ءبىز قالا, اۋدان اكىمدەرىمەن بىرگە جاياۋ ءجۇرىپ, ءار كوشەنى تەكسەرەتىن بولامىز», دەدى وبلىس اكىم.
قازىبەك بي اۋدانىنىڭ اكىمى اۋدان تۇرعىندارىن 13 ءساۋىر كۇنگى جالپى قالالىق سەنبىلىككە قاتىسۋعا شاقىرادى. ول ارنايى قاپتار بەرىلەتىنىن, ونى الۋ ءۇشىن الەۋمەتتىك جەلىلەردەگى پاراقشالارعا ءوتىنىم قالدىرۋ كەرەكتىگىن ايتادى. قوقىستى پوليگونعا شىعارۋ ءۇشىن جۇمىستى ۇيىمداستىرامىز دەدى.
ال سەيسەنبى كۇنى ەرتەمەن ءاليحان بوكەيحان اۋدانىن, مايقۇدىقتى ارالادى. بۇل اۋدان اۋماعىنا سەنبىلىك جۇرگىزىلسە دە, پلاستيك بوتەلكەلەر, پاكەتتەردىڭ جەر-جەردە شاشىلىپ جاتقانىن كورگەن ايماق باسشىسى مەردىگەرلەرگە جۇمىسشىلار سانىن كوبەيتىپ, ءوز ۋچاسكەلەرىن جەدەل ءارى تياناقتى تۇردە رەتكە كەلتىرۋ قاجەتتىگىن اتاپ ءوتتى.
«ۇيلەردىڭ جانىنان وتكەنىمىزدە بالكوندارىنىڭ استىندا تۇرمىستىق قوقىستار وتە كوپ ەكەنىن بايقادىم. وكىنىشكە قاراي, ونى تۇرعىندار تەرەزەدەن, بالكوننان تاستايدى. سوندىقتان, سەنبىلىككە, تازالىق جۇمىستارىنا قالا تۇرعىندارىن دا بارىنشا تارتۋ كەرەك. مۇنىمەن قوسا, كاسىپكەرلەر ءوز نىساندارىنىڭ جانىن تازالاۋى كەرەك», دەدى ەرماعانبەت قابدۋلا ۇلى.
بۇل اپتا باسىندا ەلىمىزدە «تازا قازاقستان» ەكولوگيالىق اكتسياسى باستالدى. مۇنداي يگىلىكتى ىسكە قاراعاندىلىقتار دا ءبىر كىسىدەي جۇمىلادى. اۋقىمى كەڭ اكتسيانىڭ العاشقى اپتاسى «تازا ولكە» دەپ اتالادى. ياعني, جۇما بويى اۋدان-قالا, ءتىپتى اۋىلداردا سەنبىلىك ۇيىمداستىرىلادى. ەكولوگيالىق اكتسيا باستالعان كۇنى ءاليحان بوكەيحان اتىنداعى اۋداندا سەنبىلىك ۇيىمداستىرىلىپ, 1000 قاپ قوقىس سىرتقا شىعارىلدى. دەگەنمەن, اپتا سوڭىنا دەيىن سەنبىلىك جالعاساتىن بولادى. بۇعان اۋدان تۇرعىندارى اتسالىسىپ, اۋلالارىن تازارتىپ جاتىر.
سەيسەنبى كۇنى «تازا ولكە» اپتالىعى اياسىندا ۇيىمداستىرىلعان سەنبىلىك قازىبەك بي اۋدانىندا ءوتتى. ەرىكتىلەر, ەكوبەلسەندىلەر مەن قالا تۇرعىندارى ءتۇس اۋا قاپتارىن قولىنا الىپ, پلاستيك قۇتىلار مەن پاكەتتەردى جينادى. كاسىپكەرلەر دە قالىس قالعان جوق. وزدەرىنىڭ نىساندارىنىڭ الدىن قوقىستان تازارتتى.
قاراعاندى قالاسى جاستار رەسۋرستىق ورتالىعىنىڭ ديرەكتورى عازيز زۇلقارناي سەنبىلىككە 30 ەرىكتى قاتىسىپ جۇرگەنىن, اپتا سوڭىنا دەيىن 15 ۋچاسكەنى تازارتاتىنىن جەتكىزدى.
مۇنداي سەنبىلىكتەر وبلىسىمىزدىڭ بارلىق اۋدان-قالاسىندا ءوتىپ جاتىر. ەكولوگياسىن ويلاعان ەل-جۇرت ەلدى مەكەندەرىنىڭ ءىشى-سىرتىنىڭ تازالىق جۇمىستارىنا بەلسەنە كىرىسكەن. ساران قالاسىنىڭ تۇرعىندارى وتباسىمەن بىرگە اۋلالارىنا شىعىپ, سەنبىلىككە قاتىسىپ جاتىر. ايتپاقشى, مۇنداعى قالا اكىمدىگى الەۋمەتتىك جەلى ارقىلى ەڭ ۇزدىك اۋلا مەن اۋدانعا كونكۋرس جاريالاعان. بالقاش قالاسىندا دا كوشەدەگى قوقىستار شىعارىلىپ جاتىر. كورشىلەر ءبىراۋىزدان كوتەرىڭكى كوڭىل-كۇيمەن جۇمىلا كەتىپ, كەلەسى ءبىر كوشەگە ەستافەتا ارقىلى جولدادى. قارقارالى قالاسىنداعى سەنبىلىككە 100 دەن اسا تۇرعىن شىعىپ, 35 گەكتار اۋماقتىڭ قوقىسىن تازالاعان.
تاعى ءبىر جالپى قالالىق سەنبىلىك 13 ءساۋىر كۇنىنە جوسپارلانىپ وتىر. وسى ورايدا, قالا تۇرعىندارىنان ەكواكتسياعا بەلسەندى قاتىسۋى سۇرالادى. ءبىر ايى بويى, ياعني, 11 مامىرعا دەيىن اۋدان-قالا, ەلدى مەكەن تازالىعىنا ەل بولىپ جۇمىلاتىن بولامىز. بارلىعى – ءوزىمىز ءۇشىن.
قاراعاندى وبلىسى
