قازاقستان مۇسىلماندارى ءدىني باسقارماسى بەرگەن مالىمەتكە قاراعاندا, كەشە استانا قالاسىنان قۇلسارى قالاسىنا قاراي تاعى 2 فۋرا كومەك اتتانىپتى. ال وسى كۇندەرى باس ءمۇفتي ناۋرىزباي قاجى تاعان ۇلى قوستاناي وبلىسىندا سۋ باسقان ەلدى مەكەندەردىڭ حالقىمەن كەزدەسىپ ءجۇر. كەشە جۇمىس ساپارىمەن اتالعان وڭىرگە بارعان قمدب توراعاسى ءمۇفتيات جانىنداعى «زەكەت جانە قايىرىمدىلىق» قورىنىڭ ەرىكتىلەر توبىمەن جۇزدەسىپ, ناسيحات ايتتى.
«ون ادام جۇرگەن جەردە ءىز قالادى, مىڭ ادام جۇرگەن جەردە جول قالادى» دەگەن قاناتتى ءسوز بار. سىزدەر ىزگى ىستەرگە ءىز بەن جول قالدىرىپ جۇرگەن قايىرىمدى جانسىزدار. «قايىرىمدىلىق جاساساڭ – قايىرىن ءوزىڭ كورەسىڭ» دەمەكشى, جاقسىلىق جاساۋ – قانىمىزعا سىڭگەن قاسيەتتىڭ ءبىرى. قازىر ناعىز حالىققا كومەكتەسەتىن ءسات. ەل باسىنا كۇن تۋعاندا بارشامىز بىرلىگىمىزدى تانىتىپ, ءاردايىم حالىقتىڭ جانىنان تابىلۋىمىز كەرەك», دەدى ناۋرىزباي قاجى تاعان ۇلى.
بۇگىندە «زەكەت جانە قايىرىمدىلىق» قورىنىڭ قوستاناي وبلىسىنداعى 400-گە تارتا ەرىكتىسى ورتاق ىسكە جۇمىلدىرىلعان. كەشە باس ءمۇفتي اتالعان قور تاراپىنان ۇيىمداستىرىلعان قايىرىمدىلىق ءىس-شاراسىنا قاتىستى. سۋ تاسقىنىنان زارداپ شەككەن 300 وتباسىنا الەۋمەتتىك ماڭىزى بار ازىق-ت ۇلىك سەبەتتەرى تاراتىلعان جيىندا ول «پايعامبارىمىزدىڭ (س.ع.س.) كۇللى ادامزاتقا وسيەت رەتىندە جولداعان «ادامداردىڭ ەڭ جاقسىسى – ادامدارعا پايدالى بولعاندارى», دەگەن ءحاديسىن مىسالعا كەلتىردى. سونىمەن بىرگە ناۋرىزباي قاجى تاعان ۇلى قوستاناي اۋدانىندا تاسقىن سۋدان زارداپ شەككەن تۇرعىندارمەن كەزدەسىپ, جۇبانىش سوزدەرىن ايتتى. «سابىرلىق ادامعا سەنىم ۇيالاتاتىن, بولاشاققا ۇمىتپەن قاراۋعا, پەندەگە قاجىر مەن قايرات بەرەتىن ەڭ ءبىر ىزگى قاسيەت بولعاندىقتان, ءار كەز باسقا تۇسكەن قيىنشىلىققا سابىرلىق تانىتۋعا ۇمتىلايىق. بۇل قيىنشىلىقتارعا دا مويىماي, ەل باسىنا تۋعان سىناقتى بىرگە ەڭسەرەتىنىمىزگە سەنەمىز. اللا تاعالا قاۋىپتىڭ بەتىن قايتارىپ, حالقىمىزعا قالىپتى ءومىر ءناسىپ ەتكەي», دەدى باس ءمۇفتي.
ايتا كەتسەك, وسىدان بىرەر كۇن بۇرىن «زەكەت جانە قايىرىمدىلىق» قورى وكىلدەرى سۋ تاسقىنىنان زارداپ شەككەن اقتوبە وبلىسىنا بارعان بولاتىن. قور ديرەكتورى ماقساتبەك قايىرعاليەۆ اتالعان وڭىردەگى جەدەل شتابتىڭ جۇمىسىمەن تانىسىپ, ايماق تۇرعىندارىنا 500 رەزەڭكە ەتىك, 2 500 قاپ, 2 000 جورگەك, 2 000 كورپە-توسەك, 2 قايىق, قايىققا 3 قوزعالتقىش, جارىق قۇرىلعىسىنا 2 قوزعالتقىش, ت.ب. تۇرمىستىق زاتتاردى جەتكىزدى. سونداي-اق اقتوبە قالاسىندا 1 000, ويىل اۋدانىندا 300, قوبدا اۋدانىندا 200 ادامعا ىستىق تاماق بەرىلدى.
ايرىقشا اتاپ وتەر جايتتىڭ ءبىرى – قوردىڭ اقتوبە وبلىسى وكىلدىگى «ەل ۇلەسى – پاتەرگە» جوباسى بويىنشا 746-باسپانانىڭ كىلتىن تاسقىننان زارداپ شەگىپ, ءۇيسىز قالعان جالعىسباستى اناعا تابىستادى. 2-توپتاعى مۇگەدەك بالالاردى اسىراپ وتىرعان زينا جولداليقىزى قيىن ساتتە قولۇشىن سوزعان قمدب وكىلدەرىنە العىسىن جاۋدىردى. ايتا كەتەيىك, بۇل – رامازان ايىنداعى «30 كۇندە 30 باسپانا» اكتسياسى اياسىندا بەرىلىپ وتىرعان 26-باسپانا.
