الىبەك ناۋتيەۆ اتىراۋ وبلىسىنداعى تاسقىن سۋعا بايلانىستى جاعدايمەن تانىستى. ول توتەنشە جاعدايعا بايلانىستى تاسقىن سۋمەن كۇرەس جونىندەگى شتابتىڭ جۇمىسىنا قاتىستى. دەپۋتات تالدىكول, سارايشىق, تاڭداي, ەسماحان, كوزدىقارا اۋىلدارى مەن ماحامبەت اۋدانىندا بولدى.
«جايىق وزەنىندەگى باتىس قازاقستان وبلىسى ايماعىنان كەلە جاتقان تاسقىن سۋ ەكپىنى وتە قاتتى. وزەن بويىنداعى ەلدى مەكەندەر حالقى تاسقىن سۋعا قارسى جاعانى بەكىتۋ جۇمىستارىن ۇيىمداستىرىپ, تاباندىلىقپەن كۇرەسۋدە. ماحامبەت اۋدانىندا 17 ەلدى مەكەن جايىق وزەنى بويىندا ورنالاسقان. ءبىزدىڭ شتاب قاجەتتى جابدىقتار جانە جانار-جاعارمايمەن قامتۋ ماقساتىندا ۇيىمداستىرۋ شارالارىن جۇزەگە اسىرىپ جاتىر. تاسقىننان قورعانۋ جۇمىستارى بارلىق ەلدى مەكەندەردە جۇرگىزىلىپ جاتىر. دەگەنمەن ءالى دە قوسىمشا تەحنيكا, قاپشىق كەرەك», دەدى سەناتور ناۋتيەۆ.
دەپۋتات شاكارىم بۇقتۇعۇتوۆ تاسقىن سۋعا قارسى شارالارعا كومەك كورسەتۋ ءۇشىن شىعىس قازاقستان وبلىسىنا اتتاندى. دەپۋتات شەمويحا اۋدانىندا جەرگىلىكتى تۇرعىندارمەن جانە اۋدان باسشىلىعىمەن كەزدەسىپ, اۋداننىڭ نەگىزگى سۋ ايدىنى – ۇبە وزەنىننىڭ احۋالىن تەكسەردى. ول سونداي-اق گلۋبوكوە اۋدانىندا بەلوۋسوۆ سۋ قويماسىنىڭ جاعدايى مەن ەلدى مەكەندەگى سۋ بۇرۋ جۇيەسىن مۇقيات زەردەلەدى جانە, توتەنشە جاعدايلار قىزمەتىنىڭ دايىندىعىنا كۋا بولدى.
«ريددەر قالاسىندا وزەندەردىڭ, بۇلاقتار مەن كانالدار ارنالارىن تازارتۋ بويىنشا ايتارلىقتاي جۇمىس اتقارىلدى. ول جۇمىستار اۋقىمدى تاسقىننىن الدىن الۋعا كومەكتەستى. بۇل باعىتتا جۇمىستى جالعاستىرۋ كەرەك, ويتكەنى ەرىگەن قار سۋىنىڭ ەكىنشى تولقىنى مەن جاۋىن-شاشىن بولادى. وسىعان بايلانىستى تاسقىن سۋعا قارسى الدىن الۋ شارالارى بويىنشا جۇمىستاردى كۇشەيتۋ قاجەت», دەدى سەناتور.
