قازىردىڭ وزىندە بيۋدجەتتەن تىس قاراجات ەسەبىنەن 71 وتباسىنا كەلتىرىلگەن زالال وتەلدى. وتكەن اپتادا اقتوعاي اۋدانىنىڭ جالاۋلى اۋىلىندا جەرگىلىكتى اۋقىمداعى توتەنشە جاعداي رەجىمى جاريالانعان ەدى. اتالعان ەلدى مەكەندە 14 ءۇي توپان سۋدىڭ استىندا قالدى. اۋىلدىڭ ويپاڭ جەرىندە ورنالاسقان جانە سۋ باسۋ قاۋپى جوعارى ۇيلەردى سۋ باسۋ ماسەلەسىن شەشۋ ءۇشىن وڭىرلىك جەدەل شتابپەن سىيىمدىلىعى 200 مىڭ تەكشە مەتر بولاتىن 3 قازانشۇڭقىر قازۋ تۋرالى شەشىم قابىلداندى. ناتيجەسىندە, اۋىلدى سۋ باسۋ ماسەلەسىن كەشەندى تۇردە شەشۋگە مۇمكىندىك تۋىپ, قاۋىپتىڭ بەتى ءبىرجولا قايتتى.
بۇعان قوسا ءساۋىر ايىنىڭ باسىندا ەرتىس اۋدانى ۇزىنسۋ اۋىلىنا تاسقىن قاۋپى تونۋىنە بايلانىستى رەسپۋبليكالىق ماڭىزى بار «اتامەكەن – ەرتىس – رۋسسكايا پوليانا» اۆتوجولىنىڭ 207 شاقىرىمى بۇزىلدى. ەرىگەن قار سۋى سول ارقىلى اعىزىپ جىبەرىلدى. جەكسەنبى كۇنى اتالعان جول بولىگى قايتادان قالپىنا كەلتىرىلىپ, كولىكتەر قايتا جۇرە باستادى.
وڭىرلىك توتەنشە جاعدايلار دەپارتامەنتىنەن حابارلاعانداي, قازىرگى ساتتە اقتوعاي, شارباقتى, تەرەڭكول اۋداندارى بويىنشا 3 ۋچاسكە باقىلاۋدا تۇر.
«سۋ تاسقىنىنا قارسى جۇمىستار – اياقتالۋ ساتىسىندا. اقتوعاي اۋدانىنداعى 2 تۇرعىن ءۇي سۋ استىندا قالىپ وتىر. وبلىس بويىنشا سۋ تاسقىنىنا قارسى ءىس-شارالارعا بارلىعى 59 ادام, 28 بىرلىك تەحنيكا, 12 موتوپومپا جۇمىلدىرىلدى. وتكەن تاۋلىكتە 90 مىڭ تەكشە مەتردەن اسا ەرىگەن سۋ سورىلىپ, 744 توننا ينەرتتى ماتەريال توگىلدى», دەپ مالىمدەدى دەپارتامەنتتەن.
وڭىردەگى جاعداي تۇراقتالۋىنا بايلانىستى پاۆلودارلىق قۇتقارۋشىلار كورشىلەس سولتۇستىك قازاقستان وبلىسىنا كومەككە اتتاندى. بارلىعى 53 ادام, قاجەتتى قۇتقارۋ جابدىقتارى مەن ءجۇزۋ قۇرالدارى بار 10 تەحنيكا شىقتى.
پاۆلودار وبلىسى
