ارنادان سۋ بوساتۋ شارالارىنىڭ جالپى ۇزاقتىعى 60 كۇنگە ۇلاسادى. وسى ارالىقتا جالپى كولەمى 120 ملرد تەكشە مەتر سۋ شىدەرتى وزەنى ارقىلى كەڭ دالاعا جوڭكىلىپ, شابىندىق ءۇشىن پايدالانىلاتىن كولتابانداردى, اقكول-جايىلماداعى اۋليەكول كولدەر جۇيەسىن (شامامەن 9 كول بار) تولىقتىرىپ, بالىق رەسۋرسىن قالپىنا كەلتىرۋگە وڭ اسەرىن تيگىزەدى. ەكىنشى تۇرعىدان بۇل اۋماقتاردىڭ تابيعي بالانسىن ۇستاپ تۇرۋعا, ەكولوگيالىق احۋالدى جاقسارتۋعا نەگىزدەلگەن.
وڭىرلىك جەر قويناۋىن پايدالانۋ, قورشاعان ورتا جانە سۋ رەسۋرستارى باسقارماسىنىڭ باسشىسى ايگەرىم قابىلتاەۆانىڭ مالىمەتىنشە, العاشقى كەزەكتە بوساتىلاتىن 87,4 ملن تەكشە مەتر سۋعا رەسپۋبليكالىق بيۋدجەتتەن 4 ملرد تەڭگەدەي قاراجات بولىنگەن.
– قانىش ساتباەۆ اتىنداعى سۋ ارناسىنان شىدەرتى وزەنىنىڭ ساعاسىمەن سۋ بوساتۋ كەيىنگى 15-20 جىلدا جاقسى جولعا قويىلىپ وتىر. كۇنكورىسى ءتورت ت ۇلىك مالعا قاراپ وتىرعان اۋىلداعى جۇرتتىڭ ۇمىتپەن كۇتەتىن وقيعاسى بۇل. اقكول-جايىلما اۋماعى مەن اقتوعاي اۋدانىنىڭ قىر جاق بولىگىندە جازدا وتە قۇرعاق كليمات قالىپتاسادى. كولتاباندار ىلعالدانباسا, وسىمدىك بىتكەن جازدىڭ باسىندا-اق قۋراپ قالادى. وڭتايلى اۋا رايى مەن توپىراق ىلعالىنىڭ جاي-كۇيىن ەسكەرە وتىرىپ, 5 ساۋىردەن سۋ ارناسىنان شىدەرتى وزەنىنىڭ ساعاسى ارقىلى سۋ بوساتىلا باستادى. بيىل جالپى كولەمى 120 ملن تەكشە مەتر سۋ جىبەرىلۋى كەرەك. قازىر رەسپۋبليكالىق بيۋدجەتتەن قوسىمشا قاراجات سۇرالىپ وتىر. سۇرانىسىمىز ورىندالسا, قازىرگى 87,4 ملن تەكشە مەتردەن بولەك, تاعى 32,6 ملن تەكشە مەتر سۋ جىبەرىلەدى. ناتيجەسىندە, جوسپارىمىز ورىندالادى. بۇل وتكەن جىلعى مەجەمەن تەڭ ءارى سۋ جىبەرۋ شارالارى ادەتتەگىدەي ءۇش بىردەي گيدروقۇرىلعى ارقىلى جۇزەگە اساتىنىن ەسكەرتكىم كەلەدى. نەگىزگى سۋ كولەمى №112 گيدروقۇرىلعى ارقىلى وتەدى. وزگە بولىگى №108 جانە №109 سۋ شىعارۋ جۇيەلەرىنەن تۇسەدى, – دەپ اتاپ ءوتتى ءا.قابىلتاەۆا.
بۇل كولەمدەر جاراتىلىستانۋ عىلىمىنىڭ نەگىزدەمەلەرىمەن ەسەپتەلگەن, شىدەرتى مەن ولەڭتى اۋماقتارىن تولىعىمەن سۋلاندىرۋعا مۇمكىندىك بەرەدى دەپ كۇتىلىپ وتىر. بىلتىر اقتوعاي اۋدانىنداعى شىعاناق كولىنە العاشقى رەت 15 ملن تەكشە مەتر سۋ اعىپ باردى. ناتيجەسىندە, ول جەردەگى ەكوجۇيە جاقسارا ءتۇستى. سۋ بوساتۋ شارالارىنىڭ ناتيجەسىندە ەكىباستۇزدىڭ اۋىلدىق ايماعى مەن اقتوعاي اۋدانىنىڭ اۋماعىندا جالپى كولەمى 21 مىڭ گەكتاردان اسا شابىندىق القاپتاردى سۋ باسادى. وسى ەكى ايماقتىڭ ىرگەلەس قونعان ەلدى مەكەندەرىندە 50 مىڭنان اسا مال بار. تۇرعىندار قولداعى ت ۇلىكتەرىنە جاز بەن كۇزدە مال ازىعىن جەتكىلىكتى جيناپ الادى.
ال ەرتىس وزەنىنە سۋ جىبەرۋ شارالارى شامامەن 15-16 ساۋىرگە جوسپارلانىپ وتىر. سالاارالىق كوميسسيا كەلەسى اپتادا ارنايى جيىن وتكىزىپ, بيىل قانشا سۋ جىبەرىلەتىنىن انىقتاۋى كەرەك. قازىرگى ۋاقىتتا بۇقتىرما مەن ءشۇلبى سۋ قويمالارىنىڭ كەمەرىنە كەلىپ تۇرعانى حابارلاندى. شۇلبىدەن تومەنگە قاراي اقىرىنداپ سۋ جىبەرىلىپ جاتىر. ماماندار بيىل ەرتىس وزەنى جايىلمالارىنىڭ كەمى 70 پايىزىن سۋ باسادى دەپ بولجاپ وتىر.
پاۆلودار وبلىسى
