پارتيانىڭ ساتباەۆ قالاسىنداعى ۇيلەستىرۋشىسى احان جايلاۋباەۆ باستاعان اقجولدىقتار اكادەميكتىڭ اللەياسىنداعى ورىندىقتاردى سىرلاپ, جەردى قوپسىتىپ, گۇل ەگۋگە ازىرلەپ قويدى. عالىمنىڭ تاستۇعىرداعى بەينەسى جۋىلىپ, تازالاندى. مۇسىندەگى كومەسكىلەنە باستاعان «قانىش يمانتاي ۇلى ساتباەۆ 1899-1964 ج.ج.» دەگەن جازۋىن دا جاڭارتىپ ءىلدى. زەينەتكەر زيادين سۇلەيمەنوۆ ءوز قارجىسىنا جاس كوشەتتەر ساتىپ اكەلىپ, وتىرعىزدى.
«جەزقازعاننىڭ جەر بايلىعىن تاۋىپ, سونى ەل يگىلىگىنە اينالدىرعان قانىش اتامىزعا قانداي قۇرمەت كورسەتسەك تە ارتىعى بولمايدى. تاياۋ كۇندەرى عالىمنىڭ 125 جىلدىق مەرەيتويى اتاپ وتىلەدى. سول مەرەيتوي قارساڭىندا «اقجولدىقتار» اللەيانى اباتتاندىرۋ جۇمىستارىن باستادى. ەندى اللەيانىڭ اينالاسىنا قورشاۋ جۇرگىزەمىز. جاز بويى سۋارۋ, كۇتىم جاساۋدى دا ءوز موينىمىزعا الامىز. وسى ىستە بەلسەندىلىك تانىتقان ء ومىرحان قۇداسپاەۆ, ەرجان ەلەباەۆ, ەرىك جاڭبىرشينوۆ, مارحات حاميتوۆ, ماحان راحىمبەرديەۆ, دوسجان قاپانوۆ ءتارىزدى ازاماتتاردىڭ ەسىمدەرىن ايرىقشا اتاپ وتكىم كەلەدى», دەيدى پارتيا مۇشەسى ۇلىتاۋ وبلىستىق ءماسليحاتىنىڭ دەپۋتاتى بەكزات دايراباي ۇلى.
اقجولدىقتار 12 ساۋىردە ءمۇسىن الدىندا مەرەكەلىك ءىس-شارا ۇيىمداستىرىپ, گۇل شوقتارىن قويۋدى دا ويلاستىرىپ وتىر.
ۇلىتاۋ وبلىسى,
ساتباەۆ قالاسى
