فوتو: وكق
«سۋ باسقان اۋدانداردا 300-گە جۋىق جەدەل جاردەم بريگاداسى جۇمىس ىستەپ جاتىر. 30 پسيحولوگ جۇمىلدىرىلدى. جۇكتى ايەلدەر مەن بالالاردىڭ جاعدايىنا ەرەكشە نازار اۋدارىلىپ جاتىر. ماسەلەن, وتكەن تاۋلىكتە قۇلسارى قالاسىنداعى پەرزەنتحانادان 12 ايەل, ونىڭ ىشىندە 5 جۇكتى ايەل مەديتسينالىق ۇيىمدارعا كوشىرىلدى», دەدى سپيكەر.
سۋ تاسقىنى باستالعاننان بەرى بارلىعى 84 جۇكتى ايەل ەۆاكۋاتسيالانىپ, مەرزىمى جاقىن 31 ايەل اۋرۋحاناعا جاتقىزىلعان. قازىر ۋاقىتشا ورنالاستىرۋ پۋنكتتەرىندە 990 بالا بار.
«4 مىڭنان استام سۋ سىناماسىنىڭ 133 سىناماسى گيگيەنالىق نورماتيۆتەرگە سايكەس كەلمەيدى. جالپى, سايكەس كەلمەيتىن سىنامالار بويىنشا كورسەتكىش وتكەن ەكى جىلدىڭ قورىتىندىسى بويىنشا ورتاشا رەسپۋبليكالىق جىلدىق كورسەتكىشتەن اسپايدى. وڭىرلەردە سانيتاريالىق-ەپيدەميولوگيالىق سالاۋاتتىلىقتى قامتاماسىز ەتۋ جۇمىستارى جالعاسىپ جاتىر جانە مينيسترلىكتىڭ تۇراقتى باقىلاۋىندا تۇر», دەدى ۆەدومستۆونىڭ رەسمي وكىلى.
