پرەمەر-ءمينيستردىڭ ورىنباسارى اقتوبە وبلىسىمەن شەكارا اۋماعىن تىكۇشاقپەن شولىپ ءوتتى. جەم وزەنىندەگى زاقىمدالعان بوگەتتىڭ جاعدايىنا باعا بەردى. كەشە ونىڭ بۇزىلۋى ناتيجەسىندە قۇلسارى قالاسىنىڭ ەكىنشى جانە ءۇشىنشى ۋچاسكەلەرى, سونداي-اق «جادىراسىن-2», «بولاشاق», «ۆاحتالىق كەنت» شاعىن اۋداندارى, «قاراعاي» ەلدى مەكەنى سۋ استىندا قالدى.
بۇگىن, 6 ساۋىردەگى جاعداي بويىنشا اتىراۋ وبلىسىنىڭ ءۇش اۋدانىندا كۇردەلى سۋ تاسقىنى جاعدايى ساقتالىپ وتىر. ەكى ەلدى مەكەنگە كولىكپەن قاتىناۋ مۇمكىن ەمەس.
قۇلسارى قالاسىندا 2,6 مىڭ جەكە تۇرعىن ءۇي مەن اكىمشىلىك عيمارات سۋ استىندا قالعاندىقتان 5 ساۋىردەن بەرى قاۋىپتى ايماقتان 15 632 ادام شىعارىلدى. تۇرعىنداردى ەۆاكۋاتسيالاۋ جالعاسىپ جاتىر.
قازىر جاعالاۋدى نىعايتۋ ءۇشىن توپىراق تولتىرىلعان 45,9 مىڭ قاپ, 174,3 مىڭ توننا ينەرتتى ماتەريال توسەلدى. 5 ساۋىردە كاسپي تەڭىزىنە قاراي سۋ وتكىزۋ قابىلەتىن ارتتىرۋ ءۇشىن جەم وزەنىندە مۇز جارۋ جۇمىستارى جۇرگىزىلدى. تاعى ءبىر رەت مۇز جارۋ جوسپارلانعان.
اكىمدىك پەن كۇشتىك قۇرىلىمداردىڭ 600-گە جۋىق قىزمەتكەرى, 148 تەحنيكا, 2 ءجۇزۋ قۇرالى جانە 500 ەرىكتى جۇمىلدىرىلدى.
ءوڭىردىڭ 5 ەلدى مەكەندە – ميالى, جانگەلدين, كوزدىقارا اۋىلدىق وكرۋگتەرى, اققورا, جاسقايرات اۋىلدارىندا قاۋىپ-قاتەر سەيىلدى.
