فوتو: atr.kz
«قازىر ەلىمىزدىڭ كوپتەگەن وڭىرلەرىندە سۋ تاسقىنى ءجۇرىپ, ادامدار زارداپ شەگىپ جاتىر. وسىنى ەستىپ, كورىپ وتىرعان ماڭعىستاۋ حالقى دا ءۇنسىز قالمادى. قازىر قور قۇرىلىپ, قاراجات جينالىپ جاتىر. جانە ءوڭىرىمىزدىڭ ءار ازاماتى زارداپ شەگىپ جاتقان اعايىنعا قاداري-حالىنشە كومەك كورسەتىپ جاتىر. قازىر ءبىز دوستىق ءۇيىنىڭ جانىندا تۇرمىز. وسىنداعى اسسامبلەيا ءۇيى قىزمەتكەرلەرى جيناعان گۋمانيتارلىق كومەگىن بەينەۋ اۋدانىنا جونەلتكەلى جاتىرمىز. بۇل جەردە نەگىزىنەن ازىق-ت ۇلىكتەر مەن توسەك جابدىقتارى بار. سەبەبى, قۇلسارى قالاسىن سۋ الۋىنا بايلانىستى قالا حالقىنىڭ باسىم بولىگى بەينەۋگە ەۆاكۋاتسيالاندى. بۇل كومەك سۋ تاسقىنىنان زارداپ شەككەن اتىراۋ حالقى ءۇشىن جينالدى. ءارى قاراي دا بۇل يگىلىكتى شارالار جالعاسىن تابادى», دەدى مو قازاقستان حالقى اسسامبلەيا ءۇيى جانىنداعى اقساقالدار كەڭەسىنىڭ توراعاسى وڭايبەك ءابدىلوۆ.
ماڭعىستاۋ وڭىرىنەن كورشى وبلىس تۇرعىندارىنا كومەك تولاستار ەمەس.
«قازىر قۇلسارى قالاسىنان بەينەۋگە 8 مىڭنان استام ادام ەۆاكۋاتسيالاندى. كەي اۋدانداردا ۇيلەر تولىعىمەن سۋ استىندا قالدى. سوندىقتان ادامدار كومەككە مۇقتاج. 1 ءساۋىر كۇنى ءبىرىنشى گۋمانيتارلىق كومەك جىبەرىلدى. بۇگىن ەكىنشى اۋىر جۇك كولىگى اتتانىپ بارا جاتىر. وسى ورايدا ماڭعىستاۋ تۇرعىندارىنا ۇلكەن راقمەتىمدى بىلدىرگىم كەلەدى. بۇل اكتسيا «جۇرەكتەن جۇرەككە» دەپ اتالادى», دەدى ماڭعىستاۋ وبلىستىق ءماسليحاتىنىڭ دەپۋتاتى, وبلىس اكىمىنىڭ قازاقستان حالقى اسسامبلەياسى ماسەلەلەرى جونىندەگى ورىنباسارى يرينا بەلياەۆا.
