فوتو: ntime.kz
10 كۇن ىشىندە ىزدەۋدە جۇرگەن 71 ادام ۇستالىپ, بەلگىلەنگەن تۇرعىلىقتى جەرىنە كەلمەگەن 24 سوتتالعان ازامات انىقتالدى. ارنايى قابىلداۋ-تاراتۋ ورنىنا 661 ادام ورنالاستىرىلدى. ولاردىڭ اراسىندا بەلگىلى ءبىر تۇرعىلىقتى جەرى جوق ادامدار, قۇجاتتارى جوق شەتەلدىكتەر بار.
رەيدتىك ءىس-شارالار بارىسىندا تىيىم سالىنعان زاتتاردى زاڭسىز ساقتاۋ مەن الىپ ءجۇرۋدىڭ 362 فاكتىسى انىقتالىپ, 92 كگ ەسىرتكى, 35 اتىس قارۋى جانە 161 سۋىق قارۋ تاركىلەندى.
– جول قوزعالىسىن قاداعالاۋ كەزىندە جىلدامدىق رەجيمىن ساقتاماۋدىڭ 22 مىڭ فاكتىسى, قارسى جولاققا شىعۋدىڭ 337 فاكتىسى تىركەلدى. اۆتوكولىكتى ماس كۇيدە باسقارعان 437 جۇرگىزۋشى ۇستالدى. جۇرگىزۋشى كۋالىگىنەن ايىرىلسا دا, كولىك تىزگىندەگەن 267 ادام انىقتالدى, – دەدى دەپارتامەنت باستىعى – ءىىم رەسمي وكىلى شىڭعىس الەكەشەۆ.
بەينەباقىلاۋ كامەرالارىنىڭ كومەگىمەن 125 قىلمىس اشىلدى.
– كوشى-قون زاڭناماسىنىڭ ساقتالۋىنا باقىلاۋ كۇشەيتىلدى. 29 مىڭ جالدامالى پاتەر, پوليتسيا ەسەبىندە تۇرعان, شارتتى تۇردە سوتتالعان 74 مىڭ ادام تەكسەرىلدى. اكىمشىلىك قاداعالاۋدى بۇزۋدىڭ 90 فاكتىسى انىقتالدى. قۇقىق بۇزۋشىلىققا قايتا جول بەرگەندەر قاماۋعا الىندى. قورعاۋ نۇسقاماسىنا قاراماستان وتباسىندا زورلىق-زومبىلىق جاساعان 337 اگرەسسور قاماۋعا الىندى, – دەدى سپيكەر.
«قۇقىقتىق ءتارتىپ» ىس-شاراسى كەزىندە 61 مىڭنان استام قۇقىق بۇزۋشىلىق انىقتالدى. قوعامدىق ءتارتىپتى بۇزعان 18 مىڭ ادام جاۋاپقا تارتىلدى. ۋاقىتشا بەيىمدەۋ ورتالىقتارى مەن مەديتسينالىق ايىقتىرعىشتارعا 5 مىڭ ادام جەتكىزىلدى. كوشەدە جانە ويىن-ساۋىق ورىندارىندا زاڭدى وكىلدەرىنسىز تۇنگى ۋاقىتتا بولعان 7 مىڭعا جۋىق كامەلەتكە تولماعان بالا انىقتالدى.
تەمەكى ونىمدەرىن زاڭسىز تاراتۋ فاكتىلەرىن انىقتاۋ بويىنشا رەيدتەر جۇرگىزىلدى. جەكەلەگەن قوعامدىق ورىنداردا تەمەكى ونىمدەرىن تۇتىنۋدىڭ 1,5 مىڭ فاكتىسى توقتاتىلدى. كامەلەتكە تولماعاندارعا تەمەكى ونىمدەرىن ساتۋدىڭ 174 فاكتىسى انىقتالدى. 21 جاسقا تولماعان ادامدارعا تەمەكى ونىمدەرىن ساتقان 186 كاسىپكەر جاۋاپقا تارتىلدى. شەگىلمەيتىن تەمەكى ونىمدەرىن ساتۋ مەن تاراتۋدىڭ 1,5 مىڭنان استام فاكتىسى تىركەلدى. شەگىلمەيتىن تەمەكى ونىمدەرىن وندىرگەن جاسىرىن ەكى تسەح انىقتالدى.
