فوتو: Polisia.kz
جامبىل وبلىسىندا ورنالاسقان شارۋا قوجالىعىنىڭ اۋماعىندا 40 000 دوزادان اساتىن ماريحۋانا ەسىرتكى زاتى تاركىلەندى.
ەسىرتكى زاتتارىن اسا ءىرى مولشەردە ساقتادى دەگەن كۇدىكپەن پاۆلودار وبلىسىنىڭ 47 جاستاعى تۇرعىنى ۇستالدى. ەر ادام مەركى اۋدانىندا مالشى بولىپ جۇمىس ىستەيدى. كۇدىكتىنىڭ ايتۋىنشا, ول جابايى قاراسورانى تاۋىپ, ونى جيناپ, كەپتىرىپ, ءوزى تۇتىنۋ ءۇشىن ساقتاعان.
ىزدەۋ بارىسىندا كۇدىكتىنىڭ كۇرتەشەسىنە جاسىرىلعان ماريحۋانا وراماسى تابىلدى. تاركىلەنگەن زاتتىڭ قوماقتى بولىگى جاقىن ماڭداعى مال فەرماسىندا ساقتالعان. ودان بولەك شارۋا قوجالىعىنىڭ اۋماعىنداعى قورادان 3 پوليەتيلەن پاكەت جاسىرىلعان ورىن تابىلدى. وندا جابايى قاراسورانىڭ ساباقتارى بولعان.
«سونىمەن قاتار ەسىرتكى شەگۋگە ارنالعان پلاستيكالىق بوتەلكە تابىلدى. كۇدىكتى ماريحۋانانى قىستا ءوزى تۇتىنۋ ءۇشىن دايىنداعانىن مويىندادى. پوليتسەيلەر بارلىعى 40 كەلى 240 گر كەپتىرىلگەن ماريحۋانا ەسىرتكى زاتىن تاركىلەدى. ۇستالعان ادام ۇرلىق جاساعانى ءۇشىن بۇرىن سوتتى بولعان. ول ءوز كىناسىن مويىندادى», دەيدى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى ءالىم باجىقباەۆ.
