«قوستاناي وبلىسىندا سۋ تاسقىنىنا قارسى ءىس-شارالار ءجۇرىپ جاتىر. وبلىس اكىمى قۇمار اقساقالوۆ جەدەل شتاب وتىرىسىندا حالىقتى جانە ولاردىڭ مال-مۇلكىن دەر كەزىندە ەۆاكۋاتسيالاۋدى تاپسىردى. وڭىرلىك شتابتار سۋ تاسقىنىنا قاۋىپ ءتونۋى مۇمكىن ەلدى مەكەندەردىڭ تۇرعىندارىنا ەۆاكۋاتسياعا ءازىر بولۋ كەرەگىن ءتۇسىندىرىپ, قاجەتتى زاتتارىن, قۇندى دۇنيەلەرىن, قۇجاتتارىن بۋىپ-ءتۇيىپ دايىن وتىرۋعا, مالىن بوساتىپ جىبەرۋ تۋرالى كەڭەس بەردى», دەپ حابارلادى وبلىس اكىمدىگىنىڭ ءباسپاسوز قىزمەتى.
بۇگىنگە دەيىن قوستاناي وبلىسى بويىنشا 1392 ادام ەۆاكۋاتسيالاندى. جەرگىلىكتى اتقارۋشى ورگاندار ەلدى مەكەندەردىڭ اينالاسىنا اينالدىرا قۇم قاپ قالاپ, بوگەت تۇرعىزىپ جاتىر. اۆاريالىق-قۇتقارۋ جۇمىستارىنا 2 مىڭعا جۋىق ادام جۇمىلدىرىلعان.
