«قىزىل جارتى اي» قوعامىنىڭ پاۆلودار وڭىرلىك فيليالىنىڭ ديرەكتورى گۇلنار يساقانوۆا ەرىكتىلەر ناۋرىز ايىنىڭ سوڭىنان بەرى قارعىن سۋدان زارداپ شەككەن اۋىلداردى ارالاپ, كومەك كورسەتىپ جاتقانىن ايتتى.
«بۇعان دەيىن ءبىزدىڭ ۆولونتەرلەر ۋسپەن, اقتوعاي, ەرتىس اۋداندارىنداعى سۋ باسقان اۋىلدارعا باردى. ءبىز ۋسپەن اۋلى مەن اقتوعايدىڭ جالاۋلى اۋلىنداعى توپان سۋ ورتاسىندا قالعان ۇيلەردى ارالاپ, قارعىن سۋدان كەلگەن زياندى ءوز تاراپىمىزدان باعالادىق. ادامدارعا جىلى كورپەلەر مەن جىلىتقىشتار, ەتىكتەر, جىلى كيىمدەر تاراتتىق. جالاۋلى اۋلىندا 14 ءۇيدى سۋ باسقان ەكەن. ونداعى 3–4 ءۇي بوس تۇر, وتباسى مۇشەلەرى وزگە جەرگە ورنالاسقان. قالعاندارىنا گۋمانيتارلىق كومەك كورسەتتىك. تۇرعىندارعا جىلى كۇرتەشەلەر, ەتىكتەر, جىلىتقىشتار بەردىك. جالپى سالماعى 200 كگ بولاتىن گۋمانيتارلىق كومەك كورسەتىلدى. بۇعان قوسا كەشە ەرتىس پەن اققۋلى اۋداندارىنىڭ ارقايسىسىنا 300–400 كگ گۋمانيتارلىق كومەك جونەلتىلدى», دەپ حابارلادى فيليال جەتەكشىسى.
قوعام وكىلدەرى جاقىن كۇندەرى ءوز سەرىكتەستەرىنەن تاعى 5 تونناداي كومەك كەلەتىنىن, ولاردىڭ دەنىن كيىم-كەشەكتەر قۇرايتىنىن ايتادى. بۇل كومەكتى تەرەڭكول, ۋسپەن, جەلەزين, ماي اۋداندارىنا جىبەرۋ جوسپاردا تۇر. گ.يساقانوۆانىڭ سوزىنشە, سۋ باسقان اۋىلدارعا ۆولونتەرلەردىڭ تۇراقتى كومەگىنىڭ قاجەتى جوق. سوندىقتان ولار تۇرعىنداردىڭ كۇندەلىكتى ومىرىنە قاجەتتى زاتتار مەن بۇيىمداردى جەتكىزىپ بەرىپ تۇر. بۇگىندە پاۆلودار وبلىسى بويىنشا «قىزىل جارتى اي» قوعامىنىڭ 10 وكىلى جۇمىس ىستەپ جاتىر.
بۇعان قوسا پاۆلودارداعى جاستار باستامالارىن دامىتۋ ورتالىعىندا سۋ تاسقىنىنان زارداپ شەككەندەر ءۇشىن گۋمانيتارلىق كومەك جيناۋ پۋنكتى اشىلدى. ال ەكىباستۇزداعى «Vita» ەرىكتىلەرى دە گۋمانيتارلىق اكتسيانى باستاپ كەتتى.
پاۆلودار وبلىسى
