مازمۇندى ءىس-شاراعا ۋنيۆەرسيتەتتىڭ باسقارما توراعاسى-رەكتور مىندەتىن ۋاقىتشا اتقارۋشى گۇلجان سۇگىرباەۆا, شىمكەنت قالاسى اكىمىنىڭ ورىنباسارى سارسەن قۇرانبەك, قالالىق ءبىلىم باسقارماسىنىڭ باسشىسى نۇرگۇل شامشيەۆا, زيالى قاۋىم وكىلدەرى قاتىستى.
ءىس-شارا بارىسىندا قوناقتار كوللەدجدىڭ سالتاناتتى اشىلۋ لەنتاسىن قيىپ, جۇرەكجاردى لەبىزىن ءبىلدىردى. العاشقى ءسوز كەزەگى تيگەن رەكتور مىندەتىن ۋاقىتشا اتقارۋشى گ.سۇگىرباەۆا جينالعان قاۋىمدى قايتا تۇرلەنگەن جاڭا وقۋ عيماراتىمەن قۇتتىقتاپ, الاش قايراتكەرى اتىنداعى كوللەدج ستۋدەنتتەرىن سول اتقا ساي لايىقتى ءبىلىم الۋعا شاقىردى.
«كوللەدجدى ج.ايماۋىت ۇلىنىڭ اتىمەن اتاۋىمىزدىڭ رامىزدىك ءمانى بار. ويتكەنى الاش ارىسىنىڭ ءومىرىنىڭ سوڭعى ساتتەرى شىمكەنتتە وتكەن. سوندىقتان بۇرىنعى تەحنيكۋم بولعان قازىرگى پەداگوگيكالىق ۋنيۆەرسيتەتپەن قايراتكەر تاعدىرى تىعىز بايلانىستى. قازاق پەداگوگيكاسىنىڭ باستاۋ بۇلاعىندا تۇرعان تۇلعاعا بىلتىر وقۋ ورداسىندا مەموريالدى تاقتا ورناتتىق. ال كوللەدجدى اشۋداعى باستى ماقساتىمىز – ۇرپاق ساباقتاستىعىن جالعاپ, وزىق ويلى, باسەكەگە قابىلەتتى بىلىكتى ماماندار دايارلاۋ بولىپ وتىر», دەدى ول.
قالا اكىمىنىڭ ورىنباسارى س.قۇرانبەك كوللەدجدىڭ ءبىلىم بەرۋدەگى باعىت-باعدارىنا توقتالىپ, الاش يدەياسىنىڭ تاريحي مازمۇنى تۋرالى وي تولعادى.
قۇتتىقتاۋ لەگىنەن كەيىن قوناقتار ج.ايماۋىت ۇلىنا ارناپ اشىلعان بيۋستكە گۇل شوعىن قويدى. ۋنيۆەرسيتەتتىڭ ونەرپاز جاستارى كورنەكتى قالامگەردىڭ «الاش ۇرانى», «الاش مارشى» اتتى اندەرىن ورىندادى. سودان كەيىن جينالعاندار وقۋ عيماراتىنىڭ وقۋ-وندىرىستىك شەبەرحاناسىمەن, سپورت الاڭىمەن تانىستى.
كوللەدجدە باستاپقى كەزدە پەداگوگيكا سالاسىنىڭ ءۇش باعىتى بويىنشا ماماندار وقىتىلادى. ولار: «باستاۋىش ءبىلىم بەرۋ پەداگوگيكاسى مەن ادىستەمەسى», «مۋزىكالىق ءبىلىم بەرۋ», «كوركەم ەڭبەك». ۇستازداردىڭ ايتۋىنشا بۇل كوللەدج تۇلەكتەرىنىڭ ۋنيۆەرسيتەتكە دايىن ستۋدەنت بولىپ كەلۋىنە سەپتىگىن تيگىزەدى. سونىمەن بىرگە جوعارى وقۋ ورنىنا ءتۇسۋ تالابىن جەڭىلدەتىپ, قىسقا مەرزىم ىشىندە ديپلوم الىپ, مۇعالىم اتانۋىنا مۇمكىندىك بەرەدى. كەلەشەكتە بۇل كوللەدجدە ج.ايماۋىت ۇلى مۇراسىن جالعاستىرۋشى پەداگوگ ماماندار دايارلانادى. ال ارناۋلى وقۋ ورنىنىڭ اشىلۋىمەن شىمكەنتتەگى كاسىپتىك ءبىلىم بەرۋشى مەكەمەلەر قاتارى تاعى دا كوبەيە ءتۇستى.
شىمكەنت
