ع.بەيسەمباەۆ وتكەن جىلى مەملەكەت باسشىسىنىڭ قاتىسۋىمەن وتكەن باس شاھاردى دامىتۋ ماسەلەلەرىنە ارنالعان كەڭەستەن كەيىن وقۋ-اعارتۋ مينيسترلىگى مەن استانا اكىمدىگى ەلوردانىڭ ءبىلىم جۇيەسىن دامىتۋدىڭ 2029 جىلعا دەيىنگى جول كارتاسىن قابىلداعانىن ەسكە سالدى. بۇل قۇجاتتا وسى سالاعا قاتىستى وزەكتى ماسەلەلەر, سونىڭ ىشىندە ءۇشاۋىسىمدى وقىتۋ پروبلەماسىن شەشۋ قامتىلعان.
ء«بىزدىڭ باستى مىندەتىمىز – بالالارعا بارىنشا قاۋىپسىز ءارى قولايلى جاعداي جاساۋ. بۇل ماسەلەدە ەلوردانىڭ ءبىلىم جۇيەسى وزگە وڭىرلەرگە ۇلگى بولۋعا ءتيىس. مينيسترلىك ءوز تاراپىنان نەگىزگى مىندەتتەردى شەشۋدە قالا اكىمدىگىن قولداۋدى جالعاستىرۋعا دايىن. بىرلەسكەن جۇمىستىڭ ارقاسىندا بىلتىر 12 جاڭا مەكتەپ اشىلدى. ونىڭ 10-ى مينيسترلىكتىڭ قولداۋىمەن پايدالانۋعا بەرىلدى. بيىل تاعى 27 مەكتەپ سالىنادى. ينفراقۇرىلىمدى دامىتۋمەن قاتار جوعارى بىلىكتى كادرلارمەن قامتاماسىز ەتۋ ماسەلەسى دە شەشىلەدى. ەلوردالىق 18 پەداگوگ كادر رەزەرۆىنە كىردى, 7 پەداگوگ باسشىلىق لاۋازىمعا تاعايىندالدى», دەدى ول.
بۇگىندە باس قالادا 175 جالپى ءبىلىم بەرەتىن مەكتەپ, 550 بالاباقشا, 33 كوللەدج جۇمىس ىستەيدى. مينيستر كەزدەسۋ اياسىندا ءبىلىم ۇيىمدارىنىڭ جۇمىسىمەن تانىسىپ, بالالارمەن سويلەستى. ساباقتارعا قاتىستى. مۇعالىمدەرمەن كەزدەسۋىندە ع.بەيسەمباەۆ پەداگوگتەردى قولداۋ الداعى ۋاقىتتا دا جالعاساتىنىن ايتتى. مينيستر ءوز سوزىندە پەداگوگتەردىڭ دەنساۋلىعىن نىعايتۋعا, بىلىكتىلىگىن ارتتىرۋ ءۇشىن شەتەلدە تاجىريبە الماسىپ, تاعىلىمدامادان وتۋىنە ەرەكشە نازار اۋدارىلاتىنىن جەتكىزدى.
