بالالاردىڭ بۇل ونەر بايقاۋىنا قاراعاندى, پاۆلودار, پەتروپاۆل, الماتى, استانا, قوسشى قالالارىنىڭ جاس ونەرپازدارى قاتىسىپ, ەل نامىسىن قورعاعان ەدى. وڭىرىمىزدەن بارعان ەلۋ جىلدىق تاريحى بار بوتاقارا كەنتىندەگى «رۋحانيات» ونەر ورتالىعىنىڭ «رۋحانيات» ءانسامبلى «ەر-تۇران» كۇيىن كۇمبىرلەتە ورىنداپ, قاتىسۋشىلاردان قارا ءۇزىپ, باس جۇلدەنى جەڭىپ الدى. انسامبل قۇرامىنداعى ونەرلى جاستار جەكە ورىنداۋ بويىنشا دا باق سىناسىپ, ءوز جاس ساناتتارى بويىنشا جۇلدەلى ءبىرىنشى ورىنعا يە بولدى.
اتاپ ايتساق, نۇرعيسا ءسالىموۆ, ەراسىل يگىلىك, نۇرمۇحامەد ۇكىباس, بەكارىس سەرىك, نۇراسىل قۋاندىق لاۋرەات اتاندى. №2 مۋزىكالىق مەكتەپتىڭ شاكىرتى نۇراسىل جالەل ۇلى داۋىلپاز اسپابىن از عانا ۋاقىتتىڭ ىشىندە ۇيرەنىپ العان. ول جەكە ءوزى قۇرمانعازى ساعىرباي ۇلىنىڭ «بالبىراۋىن» كۇيىن ورىنداعان. ياعني ەكى اسپاپتا دا ەركىن وينايدى. مۇنىمەن قوسا, جاس ونەرپاز «قاراقات» مەكتەپ ستۋدياسىندا ءتالىم الىپ ءجۇر.
«تۋعان كۇنىمە اكەم دومبىرا سىيلادى. سودان ونى تەز ۇيرەنگىم كەلىپ, ۇيىرمەگە جازىلدىم. داۋىلپازدا ويناۋدى جاقىندا عانا مەڭگەرىپ الدىم. بۇل اسپاپ دومبىراعا قاراعاندا جەڭىل. قازىر «اداي» كۇيىن ۇيرەنىپ ءجۇرمىن. جيىرماعا جۋىق كۇي تارتا الامىن», – دەيدى ونەرلى نۇراسىل.
مۇنىمەن قوسا, انسامبلدەگى نۇرعيسا ءسالىموۆ حالىق اندەرى اتالىمىندا ونەر كورسەتىپ, جۇلدەلى ەكىنشى ورىننان كورىندى.
انسامبل جەتەكشىسى جازيراش بيماردەنوۆا ۇكىلەپ اپارعان شاكىرتتەرىنىڭ جوعارى ونەر كورسەتكەنىنە ءدان ريزا.
– ءۇمىتىمىز اقتالدى. ونەرلى بالالارىمىز ۇلتتىق اسپاپتا كۇي ورىنداۋ, حالىق اندەرىن ايتۋ, ەسترادالىق باعىت بويىنشا دا باق سىناستى. وسى رەتتە, اتا-انالارىنا ايرىقشا العىسىمدى جەتكىزگىم كەلەدى. شاكىرتتەرىم ءبىرىنشى رەت حالىقارالىق بايقاۋدان جۇلدەلى بولىپ تۇر. ونىڭ ۇستىنە باس جۇلدە العانى ءبىز ءۇشىن زور مارتەبە, – دەيدى جەتەكشى ۇستاز.
قاراعاندى وبلىسى
