دەپۋتات مۇقاش ەسكەندىروۆ مەملەكەتتىك ساتىپ الۋ راسىمدەرىنە بايلانىستى ەسكەرتۋلەر وڭىرلەردە ءجيى قويىلاتىن سۇراقتاردىڭ ءبىرى ەكەنىن جاسىرمادى.
«بۇل ماسەلە كاسىپكەرلەر مەن اكىمشىلەردى الاڭداتادى, ال شەشىم بولماعان جاعدايدا ادامداردىڭ ءومىر ساپاسىنا تىكەلەي اسەر ەتەدى. ۇزاق قۇرىلىس, ءساتسىز كونكۋرستار, ۇزاق جانە شۋلى سوت پروتسەستەرى اۋرۋحانالاردى كۇردەلى جوندەۋگە, جاڭا مەكتەپ سالۋعا, الەۋمەتتىك قىزمەتتەر كورسەتۋگە مۇمكىندىك بەرمەيدى. كەيدە, ۋاقتىلى جانە ساپاسىز وتكىزىلگەن كونكۋرستار ماڭىزدى ينفراقۇرىلىم نىساندارىنىڭ جۇمىسىن تەجەيدى», دەپ ءتۇسىندىردى مۇقاش ەسكەندىروۆ.
ايتا كەتەيىك, «مەملەكەتتىك ساتىپ الۋ تۋرالى» جاڭا زاڭ جوباسى مەملەكەت باسشىسىنىڭ مەملەكەتتىك ساتىپ الۋدىڭ ساپالى جاڭا جۇيەسىن قۇرۋ جونىندەگى تاپسىرماسىن ىسكە اسىرۋ ماقساتىمەن ازىرلەندى.
جوبانىڭ ماڭىزدى جاڭاشىلدىقتارى:
- كونكۋرستاردىڭ باعالىق ەمەس كريتەريلەرىن كوزدەيتىن ساتىپ الىناتىن تاۋارلاردىڭ ساپاسىن ارتتىرۋ جونىندەگى نورمالار;
- مەملەكەتتىك اقپاراتتىق جۇيەلەردىڭ وبەكتيۆتى دەرەكتەرىنە نەگىزدەلگەن ءونىم بەرۋشىلەردىڭ رەيتينگىن باعالاۋداعى تاسىلدەردى وزگەرتۋ;
- جەتكىزۋشىلەر مەن اكىمشىلەردىڭ جاۋاپكەرشىلىگىن ارتتىرۋ;
- شاعىمدانۋ راسىمىنە وزگەرىستەر ەنگىزۋ;
- مەملەكەتتىك ساتىپ الۋدى وتكىزۋ مەرزىمىن ەكى ەسەگە قىسقارتۋ;
- وتاندىق تاۋار وندىرۋشىلەردى قولداۋ جانە مەملەكەتتىك ساتىپ الۋلاردا جەرگىلىكتى قامتۋدى ارتتىرۋ بويىنشا ايتارلىقتاي شارالار پاكەتى.
ودان بولەك الەۋمەتتىك, ەكونوميكالىق جانە ەكولوگيالىق اسپەكتىلەردى ەسكەرە وتىرىپ, تاۋارلاردى, جۇمىستاردى, كورسەتىلەتىن قىزمەتتەردى ساتىپ الۋعا نەگىزدەلگەن «تۇراقتى مەملەكەتتىك ساتىپ الۋ» ينستيتۋتىن ەنگىزۋ ۇسىنىلدى.
«تۇراقتى مەملەكەتتىك ساتىپ الۋدى» ەنگىزۋ اقشانى وڭتايلى جانە ءتيىمدى جۇمساۋعا, وتاندىق وندىرۋشىلەردى, سونداي-اق مۇگەدەك ادامداردى قولداۋعا, قورشاعان ورتانى قورعاۋعا باعىتتالعان.
سونداي-اق دەپۋتاتتار جەرگىلىكتى قامتۋ ۇلەسىن ارتتىرۋعا باعىتتالعان قوسىمشا نورمالاردى ۇسىندى. ۇسىنىستاردىڭ ءبىرى بويىنشا وففتەيك كەلىسىمشارتتارى بويىنشا وندىرىلەتىن ءونىمدى ءبىر كوزدەن ساتىپ الۋعا بولادى.
وڭىرلىك جەتكىزۋشىلەردى قولداۋ ماقساتىندا دەپۋتاتتار قوسالقى مەردىگەرلىك جۇمىستار كولەمىنە 30% ليميت بەلگىلەۋدى ۇسىندى.
زاڭ جوباسى بويىنشا جۇمىس ەكىنشى وقىلىمعا دەيىن جالعاسادى.
