سالتاناتتى ءىس-شاراعا وبلىس اكىمىنىڭ ورىنباسارى مارالبەك سەيىلوۆ, اۋعانستانداعى وبلىستىق سوعىس ارداگەرلەرى كەڭەسىنىڭ توراعاسى بايرام مامەدوۆ, وبلىستىق تاجىك-اۋعان شەكاراسىنداعى ۇرىس قيمىلدارى ارداگەرلەرى كەڭەسىنىڭ توراعاسى اسحات ابدۋلين, اسكەرگە شاقىرىلۋشىلاردىڭ تۋىستارى مەن جاقىندارى قاتىستى.
– بۇگىن سىزدەر وڭىرىمىزدەگى ۇقك شەكارا قىزمەتىنىڭ جاعالاۋ كۇزەتىنە قىزمەت ەتۋگە اتتانىپ بارا جاتىرسىزدار. سىزدەرگە مىقتى دەنساۋلىق, اسكەري قىزمەتتە تاباندىلىق جانە وقۋ-جاۋىنگەرلىك مىندەتتەردى ورىنداۋدا جەتىستىك تىلەيمىن. وتان قورعاۋ جولىنداعى قىزمەتتەرىڭىز ءساتتى ءوتسىن, – دەدى وبلىستىڭ قورعانىس ىستەرى جونىندەگى دەپارتامەنتىنىڭ باسشىسى, پودپولكوۆنيك رۋسلان بالتەمىروۆ.
ءىس-شارا بارىسىندا جاستارعا قارۋلى كۇشتەردەن ەستەلىك سىيلىقتار تاپسىرىلدى. مەملەكەتتىك قۇرىلىمدار مەن جۇرتشىلىق جىلى لەبىزدەرىن ءبىلدىرىپ, اق جول تىلەدى.
– قىزمەتتەرىڭدى ابىرويمەن اتقارىپ, امان-ەسەن ورالۋلارىڭا تىلەكتەسپىن. ءبىز سەندەردى ماقتان تۇتامىز. وتانىمىزدىڭ ناعىز قورعاۋشىسى بولاتىندارىڭا سەنىمدىمىز, – دەدى اسكەرگە شاقىرىلۋشىلاردىڭ ءبىرىنىڭ اناسى شىنار قيانوۆا.
كوكتەمگى اسكەرگە شاقىرۋ ناۋقانى بارىسىندا ماڭعىستاۋ وڭىرىنەن 18-27 جاس ارالىعىنداعى 600-دەن استام جاس جىگىتتى مەرزىمدى اسكەري قىزمەتكە شاقىرۋ جوسپارلانىپ وتىرعانىن ايتا كەتۋ كەرەك. ونىڭ 250-گە جۋىعى قارۋلى كۇشتەر قاتارىنا, 240-تان استام ادام ۇلتتىق ۇلانعا جانە 100-دەن استام اسكەرگە شاقىرىلۋشى ۇقك شەكارا قىزمەتىنە قىزمەت ەتۋگە اتتانباق.
