اقتوعاي اۋدانىندا كۇردەلى جاعداي قالىپتاسقان. وسى اپتانىڭ باسىندا جالاۋلى اۋلىندا جەرگىلىكتى اۋقىمداعى تابيعي سيپاتتاعى توتەنشە جاعداي جاريالاندى. مۇندا 14 ءۇيدى توپان سۋ باسىپ قالدى. جالاۋلى اۋلى ويپاڭ جەردە ورنالاسقاندىقتان, جاعداي كۇردەلى بولىپ تۇر. سۋ ورتاسىندا قالعان باسپانالاردىڭ تۇرعىندارىنا جەرگىلىكتى بيلىك حال-قادىرىنشە كومەكتەسىپ, ولاردى ۋاقىتشا تۋىستارىنىڭ ۇيىنە ورنالاستىردى. مالدارى قۇرعاق جەرگە ايداپ شىعارىلدى.
اۋماقتاعى شولاقسور اۋلى دا قاۋىپ كوزىندە قالعان بولاتىن. جەرگىلىكتى اتقارۋشى ورگانداردىڭ وكىلدەرى مەن تجد قىزمەتكەرلەرى كۇش بىرىكتىرىپ, اۋىلدى سۋ باسۋدان امان الىپ قالدى.
«شولاقسور اۋلىنىڭ اينالاسىنداعى توپىراق ءۇيىندىسى, بوگەت توپىراقپەن جانە قۇم تولتىرىلعان قاپشىقتارمەن نىعايتىلدى. اۋىلعا كىرەتىن جولدىڭ اينالاسى دا بيىكتەتىلدى. وسىلايشا, تۇرعىن ۇيلەر مەن جەرگىلىكتى ۇيىمداردى سۋ باسۋعا جول بەرىلمەدى. 2 تەحنيكا جانە 2 ءجۇزۋ قۇرالى جۇمىلدىرىلدى. اتالعان ەلدى مەكەندەگى سۋ دەڭگەيىنىڭ وزگەرۋىن تجد-نىڭ 6 قىزمەتكەرى باقىلاپ وتىر. بارلىق تارتىلعان كۇش پەن قۇرال قازىر جالاۋلى اۋلىنا باعىتتالدى», دەپ حابارلادى وڭىرلىك توتەنشە جاعدايلار دەپارتامەنتىنەن.
كەشەگى جاعداي بويىنشا اۆتوكولىك جولدارىنىڭ ءبىر بولىگىندە جانە پاۆلودار, اقتوعاي, تەرەڭكول, ۋسپەن, ەرتىس, شارباقتى اۋداندارى بويىنشا جالپى سانى 10 ۋچاسكەدەگى جاعداي باقىلاۋدا تۇرعانى بەلگىلى بولدى. وبلىس بويىنشا سۋ تاسقىنىنا قارسى ءىس-شارالارعا بارلىعى 435 ادام, 145 تەحنيكا, 47 موتوپومپا, 2 ءجۇزۋ قۇرالى جۇمىلدىرىلعان. وتكەن تاۋلىكتە 108 876 تەكشە مەتر سۋ سورىلىپ, 2 850 قاپ, 150 توننا ينەرتتى ماتەريال توسەلدى.
ءبىلىم بەرۋ باسقارماسى اقتوعاي اۋدانىنا قاراستى شۇعا, جالاۋلى اۋىلدارىنىڭ وقۋشىلارى ءتورتىنشى توقساندى قاشىقتان وقي باستاعانىن حابارلادى. جالپى سانى 104 بالا ونلاين تۇردە ءبىلىم الىپ جاتىر.
وڭىرلىك توتەنشە جاعدايلار دەپارتامەنتى باستىعىنىڭ ورىنباسارى ولەگ ترەششەۆتىڭ ايتۋىنشا, قارعىن سۋ قازىرگى ۋاقىتتا وبلىستىڭ وڭتۇستىك ايماقتارىنا قاراي ويىسا تۇسكەن. كەيىنگى كۇندەرى توپىراقتاعى توڭنىڭ بەتى ءجىپسىپ, سۋ جاقسى سىڭە باستاعان. ايتسە دە سولتۇستىكتەگى, رەسەيمەن شەكارالاس اۋىلدارعا قاۋىپ ءتونۋى مۇمكىن. بۇل وڭىرلەردە قار ءالى تولىق ەري قويماعان. ەلدى مەكەندەردەن قار شىعارىلىپ, ارىقتار قازىلىپ جاتىر.
بۇگىندە ارنايى كوميسسيا بارلىق سۋ باسقان ۇيگە كەلتىرىلگەن زالالدى باعالاۋ جۇمىستارىنا كىرىستى. كوميسسيا جۇمىسىنىڭ قورىتىندىسى بويىنشا بارلىق زارداپ شەككەندەرگە وبلىس بيۋدجەتىنىڭ رەزەرۆىنەن جانە بيۋدجەتتەن تىس قاراجات ەسەبىنەن كومەك كورسەتىلەدى.
جەلەزين اۋدانىنداعى ميحايلوۆكا, ۆەسەلايا روششا اۋىلدارىندا قۇتقارۋشىلار قىزىل سۋدى ارىق قازۋ ارقىلى بۇرىپ جاتىر. بارلىعى 6 جەدەل توپ پەن 60-تان اسا تەحنيكا بار.
«كەيىنگى كۇندەرى تەرەڭكول اۋدانىنىڭ تومارلى جانە جەلەزين اۋدانىنىڭ ۆەسەلايا روششا, ميحايلوۆكا اۋىلدارىنا دالادان اققان سۋدىڭ اعىنى ەداۋىر ءوستى. ولاردى توسقاۋىل بوگەتتەر جاساپ, سۋدىڭ اعىسىن بۇرۋعا ارنالعان ارىقتاردى قازۋ ارقىلى توقتاتۋ مۇمكىن بولدى. بۇل اۋىلدارداعى ۇيلەردى سۋ باسۋ قاۋپى جويىلدى, بىراق جۇمىس تاۋەكەلدەر تولىقتاي جويىلعانعا دەيىن جالعاسادى», دەپ اتاپ ءوتتى ءوڭىر باسشىسى اسايىن بايحانوۆ.
پاۆلودار وبلىسى
